អគ្គិសនីកម្ពុជា ចេញសេចក្តីបំភ្លឺករណីលោក ជ្រា ស៊ីណា នៅខេត្តត្បូងឃ្មុំ ដែលដំឡើងប្រព័ន្ធសូឡាខុសបច្ចេកទេស
30-07-2026 16:42
(ភ្នំពេញ)៖ អគ្គិសនីកម្ពុជា (EDC) បានឲ្យដឹងថា នាពេលថ្មីៗនេះ មានសារព័ត៌មានមួយចំនួនបានផ្សព្វផ្សាយចំណងជើងថា៖ «រឿងនេះថ្មីចេស ! ដោយលោកអះអាងថា លោករងភាពអយុត្តិធម៌ ពីអគ្គិសនីខេត្តត្បូងឃ្មុំ (ដោយសារលោក ដំឡើងសូឡា)» ដែលពាក់ព័ន្ធនឹងលោក ជ្រា ស៊ីណា (ហៅវ៉ា) ជាម្ចាស់អាជីវកម្មភោជនីយដ្ឋាន រស្មីផ្កាយពេជ្រ រស់នៅខេត្តត្បូងឃ្មុំ។
ពាក់ព័ន្ធនឹងករណីខាងលើនេះ អគ្គិសនីកម្ពុជា សូមធ្វើការបំភ្លឺជូនសាធារណជនមេត្តាជ្រាបអំពីអង្គហេតុ និងទិដ្ឋភាពបច្ចេកទេសជាមួយលោក ជ្រា ស៊ីណា (អតិថិជន) តំណាងឱ្យលោក អោម មុនីវណ្ណ ដូចខាងក្រោម៖ អតិថិជនរូបនេះ ពុំបានបំពេញកាតព្វកិច្ចតាមបទប្បញ្ញត្តិជាធរមាន នូវការដាក់ដំឡើងសូឡាប្រើប្រាស់នៅទីតាំងផ្ទាល់ខ្លួនជាលក្ខណៈអាជីវកម្ម ដោយយកបណ្តាញជាតិជាខ្នងបង្អែកអស់រយៈពេលប្រមាណ ២ ឆ្នាំមកហើយ ទោះបីជាមានការជូនដំណឹង និងរំលឹកពីអគ្គិសនីត្បូងឃ្មុំច្រើនដងក៏ដោយ។
លើសពីនេះ លោកបានដំឡើងសូឡាលើសពី ២៥០ផ្ទាំង ដែលមានអានុភាពលើសពី ១០០ គីឡូវ៉ាត់ លើសពីការស្វ័យប្រកាសរបស់គាត់ និងទទួលបានការអនុញ្ញាត ពីអាជ្ញាធរអគ្គិសនីកម្ពុជាត្រឹមតែ ១២០ផ្ទាំង ជាមួយអានុភាព ៥០ គីឡូវ៉ាត់ប៉ុណ្ណោះ។ ការដំឡើងបន្ថែមជាបន្តបន្ទាប់នេះ ពុំបានសុំច្បាប់អនុញ្ញាតឡើយ។
ដោយអតិថិជនពុំបានអនុវត្តស្របច្បាប់តាមបទប្បញ្ញត្តិ ហើយចេះតែសុំពន្យារពេលច្រើនលើកច្រើនសារ ដូច្នេះអគ្គិសនីត្បូងឃ្មុំបានជូនដំណឹង អំពីការអនុវត្តតាមច្បាប់ ត្រូវផ្តាច់ការផ្គត់ផ្គង់ ចរន្តអគ្គិសនី នៅចុងខែកក្កដា ឆ្នាំ២០២៦ នេះ។ ទោះជាយ៉ាងណាក៏ដោយ អគ្គិសនីត្បូងឃ្មុំបានយល់ព្រមពន្យារពេលការកាត់ចរន្ត រហូតដល់មានការដោះស្រាយ តាមគោលការណ៍ច្បាប់ពីថ្នាក់ដឹកនាំ បន្ទាប់ពីអតិថិជនបានដាក់លិខិតសុំអន្តរាគមន៍ពីស្ថាប័នពាក់ព័ន្ធ។
អាជ្ញាធរអគ្គិសនីកម្ពុជា នឹងអញ្ជើញអតិថិជនមកដោះស្រាយ នៅថ្ងៃចន្ទ ទី៣ ខែសីហា ឆ្នាំ២០២៦ វេលាម៉ោង ៩៖០០នាទីព្រឹកខាងមុខនេះ។
សរុបមក អគ្គិសនីកម្ពុជាបញ្ជាក់ថា អតិថិជនពុំបានអនុវត្តតាមច្បាប់ ហើយបែរជាផ្សព្វផ្សាយព័ត៌មានមិនត្រឹមត្រូវ និងបរិហារកេរ្ដិ៍ជាសាធារណៈតាមប្រព័ន្ធបណ្តាញសង្គម ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់អគ្គិសនីកម្ពុជា។
ដូច្នេះ ការផ្សព្វផ្សាយថា ប្រធានអគ្គិសនីត្បូងឃ្មុំ មានចេតនាធ្វើបាប គឺជាព័ត៌មានមិនពិត និងគ្មានមូលដ្ឋានច្បាស់លាស់ឡើយ។ ប៉ុន្ដែទោះបីជាយ៉ាងណាក៏ដោយ ក្រសួងរ៉ែ និងថាមពល អាជ្ញាធរអគ្គិសនីកម្ពុជា និងអគ្គិសនីកម្ពុជា កំពុងពិនិត្យ និងដោះស្រាយបញ្ហានេះយ៉ាងយកចិត្តទុកដាក់បំផុត ដើម្បីធានាបាននូវភាពត្រឹមត្រូវ និងយុត្តិធម៌។
អគ្គិសនីកម្ពុជា សូមអំពាវនាវដល់សាធារណជន និងបណ្តាញសារព័ត៌មានទាំងអស់ មេត្តាបញ្ឈប់ចែករំលែកការផ្សព្វផ្សាយព័ត៌មានមិនពិត ឬការបកស្រាយដោយខ្វះ ការយល់ដឹងច្បាស់លាស់ ជៀសវាងសាធារណជនមានការយល់ច្រឡំ និងបរិហារកេរ្ដិ៍ដល់ស្ថាប័ន៕
