(ភ្នំពេញ)៖ គណៈប្រតិភូសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន ចំនួន ១១០នាក់ ដឹកនាំដោយ លោក អ៊ុំ វុទ្ធទី ប្រធានក្រុមប្រឹក្សាភិបាលសមាគម នាព្រឹកថ្ងៃទី២៨ ខែកក្កដា ឆ្នាំ២០២៦ បានអញ្ជើញធ្វើទស្សនកិច្ចសិក្សា និងស្តាប់បទបង្ហាញស្តីពី «រចនាសម្ព័ន្ធ តួនាទី និងភារកិច្ចរបស់ព្រឹទ្ធសភា» ដើម្បីពង្រឹងការយល់ដឹងអំពីស្ថាប័ននីតិប្បញ្ញត្តិកំពូលរបស់ជាតិ។

ពិធីនេះបានប្រព្រឹត្តទៅក្រោមអធិបតីភាពលោក ម៉ម ប៊ុននាង ប្រធានគណៈកម្មការទី១០ នៃព្រឹទ្ធសភា និងជាអនុប្រធានក្រុមមិត្តភាពព្រឹទ្ធសភាទ្វេភាគីកម្ពុជា-ចិន។

លោក ម៉ម ប៊ុននាង បានមានមតិស្វាគមន៍ និងសំណេះសំណាល ដោយបានគូសបញ្ជាក់អំពីទំនាក់ទំនង «មិត្តភាពដែកថែប» កម្ពុជា-ចិន ព្រមទាំងផ្តាំផ្ញើឱ្យនិស្សិតទាំងអស់ខិតខំប្រឹងប្រែងរៀនសូត្រ ក្រសោបយកចំណេះដឹង និងបច្ចេកវិទ្យា ដើម្បីក្លាយជាធនធានមនុស្សដ៏សំខាន់ និងជាសសរទ្រូងរឹងមាំក្នុងការអភិវឌ្ឍប្រទេសជាតិ។

ក្នុងឱកាសនោះ គណៈប្រតិភូទទួលបានការចែករំលែកលើប្រធានបទសំខាន់ៗចំនួនបី រួមមាន៖ «រចនាសម្ព័ន្ធ តួនាទី និងសមត្ថកិច្ចរបស់ព្រឹទ្ធសភា» ធ្វើបទបង្ហាញដោយលោក ម៉ម ប៊ុននាង, «ដំណើរការនីតិកម្ម» ធ្វើបទបង្ហាញដោយលោក យិន យូរ៉ាន់ អគ្គនាយករងសេវានីតិកម្ម និងសមភាពដែនដី, និង «តួនាទី និងភារកិច្ចរបស់អគ្គលេខាធិការដ្ឋានព្រឹទ្ធសភា» ធ្វើបទបង្ហាញដោយ លោកស្រី ឃុន សុវណ្ណនេត្រា ប្រធាននាយកដ្ឋានអភិវឌ្ឍន៍ធនធានមនុស្ស។

លោក អ៊ុំ វុទ្ធទី បានបញ្ជាក់ថា នេះជាលើកទី២ហើយ ដែលសមាគមនិស្សិតបានចូលធ្វើទស្សនកិច្ចសិក្សាស្វែងយល់អំពីព្រឹទ្ធសភា ហើយសមាគមនឹងបន្តដឹកនាំគណៈប្រតិភូនិស្សិត មកធ្វើទស្សនកិច្ចនៅព្រឹទ្ធសភានៅឆ្នាំបន្តបន្ទាប់។ ជាមួយគ្នានេះ និស្សិតក៏បានសម្តែងនូវបំណងស្នើសុំឱកាសចុះកម្មសិក្សា នៅព្រឹទ្ធសភានាពេលខាងមុខផងដែរ។

ជាកិច្ចបញ្ចប់ លោក អ៊ុំ វុទ្ធទី បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំព្រឹទ្ធសភា ដែលតែងតែផ្តល់ការគាំទ្រដល់សកម្មភាពរបស់សមាគមនិស្សិតតាំងពីដើមរៀងមក៕