សាសនិកជនរាប់ពាន់អង្គ/នាក់ ដង្ហែរពិធីបុណ្យអាសាឡ្ហ និងចូលវស្សានៅក្រុងសៀមរាប
30-07-2026 21:24
(សៀមរាប)៖ សាសនិកជនរាប់ពាន់អង្គ/នាក់ នៅរសៀលថ្ងៃទី២៩ ខែកក្កដា ឆ្នាំ២០២៦ បានដង្ហែរពិធីបុណ្យអាសាឡ្ហ និងចូលវស្សា ដើម្បីរំលឹកដល់នក្ខត្ដសម័យ និងដើម្បីទ្រទ្រង់ព្រះពុទ្ធសាសនា ព្រមទាំងការចម្រើនបុណ្យបារមីពុទ្ធបរិស័ទ្ធ។ ពិធីនេះ រៀបចំដោយព្រះគ្រូចៅអធិការ វត្ដដំណាក់ ក្រុងខេត្ដសៀមរាប ខេត្ដសៀមរាប។
ព្រះគ្រូធម្មវិសុទ្ធិរង្សី ឡាច ចន្ថា ព្រះគ្រូចៅអធិការវត្តដំណាក់ មានថេរដីការថា ពិធីដង្ហែរនេះ មានព្រះសង្ឍ ប្រជាពុទ្ធរិស័ទ្ធប្រមាណ៣ពាន់អង្គ/នាក់ចូលរួម ដោយរៀបចំក្បួនដង្ហែរចេញពីវត្ដដំណាក់ ឆ្ពោះទៅតាមផ្លូវសំខាន់ៗមួយចំនួនក្នុងក្រុងសៀមរាប និងបញ្ចប់នៅក្នុងវត្ដដំណាក់វិញ។
ព្រះគ្រូចៅអធិការ មានថេរដីការបន្តថា ទិវានេះតែងត្រូវបានប្រារព្ធឡើងជារៀងរាល់ឆ្នាំនៅថ្ងៃ ១៥កើត ខែអាសាឍ ក្នុងគោលបំណងរំលឹកព្រះពោធិសត្វ ទ្រង់ចុះចាប់បដិសន្ធិ ឬចាប់កំណើត។ ព្រះសិទ្ធត្ថ គោតម ទ្រង់ចេញសាងព្រះផ្នួស ព្រះសម្មាសម្ពុទ្ធជាម្ចាស់ ទ្រង់ចេញសម្តែងព្រះធម៌ដំបូង ហៅថា បឋមទេសនា គឺទ្រង់សម្តែងធម្មចក្កប្បវត្តនសូត្រប្រោសជដិលទាំងប្រាំនាក់ បន្ទាប់ពីការត្រាស់ដឹងឬថាជាថ្ងៃកំណើ់តព្រះធម៌ ដែលព្រះពុទ្ធទ្រង់ប្រកាសសម្តែងដំបូងបំផុត។
បុណ្យចូលព្រះវស្សា គឺជាបុណ្យមានមកតាមផ្លូវព្រះពុទ្ធសាសនា ដែលសាវ័កផ្នែកបព្វជិត តែងចូលវស្សា តាមពុទ្ធានុញ្ញាតអស់រយៈពេល៣ខែក្នុងវស្សានរដូវ ហើយត្រូវចាំ វស្សាដោយត្រឹមត្រូវ។ អង្គមានថេរដីកាអង្គបញ្ជាក់ថា ការប្រារព្ធពិធីបុណ្យធំៗនេះទៅបាន លុះត្រាប្រទេសជាតិមានសុខសន្ដិភាពផងដែរ។
លោកគ្រូធម្មាចារ្យ កែវ វិមុត នៅក្រុងសៀមរាប មានប្រសាសន៍ថា ពិធីបុណ្យអាសាឡ្ហ ចូលព្រះវស្សានេះ មានសារៈសំខាន់ខ្លាំងដែលប្រជាពុទ្ធបរិស័ទ្ធត្រូវយល់ដឹងឱ្យច្បាស់លាស់ ព្រោះជាទិវាដ៏សំខាន់បំផុតមួយនៅក្នុងព្រះពុទ្ធសាសនាថេរវាទ ។លោកគ្រូចង់ឱ្យពុទ្ធបរិសទ្ធិ ក៏ដូចជាយុវជន ស្គាល់តម្លៃឱ្យច្បាស់នៃទិវាអាសាឡ្ហបូជា និងចូលព្រះវស្សានេះ ខណៈដែលពិធីបុណ្យធំៗនៃព្រះពុទ្ធសាសនាតែងតែបានប្រារព្ធឡើងជារៀងរាល់ឆ្នាំ តាមប្រពៃណីព្រះពុទ្ធសាសនា។
ព្រះគ្រូធម្មវិសុទ្ធិរង្សី ឡាច ចន្ថា ព្រះគ្រូចៅអធិការវត្តដំណាក់ មានថេរដីការថា ចំណែកឯពុទ្ធបរិស័ទជាទាយកទាយិកា ឧបាសក ឧបាសិកាវិញ ក៏នាំគ្នាប្រារព្ធធ្វើបុណ្យចូលវស្សានោះដែរ ជាពិសេសគឺ ចាត់ចែងវស្សិកសាដក ដែលនិយមហៅថា សំពត់សាដកចំណាំវស្សា ព្រមទាំងប្រេងកាត ទៀន ធូប និងភេសជ្ជ មួយចំនួនទៀតតាមលទ្ធភាព ។
យោងតាមឯកសារ ពាក្យថា វស្សាមកអំពីពា្យបាលីថា វស្ស ប្រែថាភ្លៀង ឬរដូវភ្លៀង ដែលមានកំណត់រយៈ ពេល ៤ខែ គឺរាប់ ពីថ្ងៃ ១រោច ខែអាសាធ រហូតដល់ថ្ងៃ ១៥កើតខែកត្តិក រយៈពេលនោះ ឯង ហៅថាវស្សានរដូវ។ បានជាព្រះបរមសាស្តានៃយើង ព្រះអង្គទ្រង់ អនុញ្ញាតឲ្យព្រះភិក្ខុសង្ឃ មានកិច្ចចូលចាំវស្សា នោះពីព្រោះហេតុខាង ដើម ២យ៉ាងគឺ៖ ភិក្ខុទាំងឡាយត្រាច់ចរទៅកាន់ទីកន្លែងផ្សេងៗដទៃនោះ មាន គួរខ្លះ មិនគួរខ្លះ មានការ ដើរជាន់នៅភូតគាម ពិជគាម និងធញ្ញជាតិផ្សេងៗ ដែលជាហេតុនាំឲ្យអ្នកស្រុករិះគន់តិះដៀល និង ពោលនូវទោសដែលមានប្រការផ្សេង។ ជារដូវភ្លៀងជោកជាំផង ព្រះពុទ្ធអង្គមានបំណងកុំឲ្យបព្វជិតក្នុង សាសនា លំបាកក្នុង ការធ្វើដំណើរទៅមក គឺឲ្យនៅចាំវស្សាតែមួយ កន្លែងអស់រយៈពេល ៣ ខែ៕
