(ភ្នំពេញ)៖ ឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌ បានសង្កត់ធ្ងន់ថា ចំពោះករណីបើកបរដោយមិនគោរពច្បាប់បណ្តាលឲ្យមានការបាត់បង់ជីវិតមនុស្ស គឺត្រូវតែអនុវត្តច្បាប់ដោយម៉ឺងម៉ាត់ និងដោយស្មើភាព។

លោកឧបនាយករដ្ឋមន្រ្តី បានជូនសារយ៉ាងច្បាស់ថា «ទាំងមន្ត្រីអនុវត្តច្បាប់ ទាំងខាងអយ្យការ និងទាំងតុលាការ បានប្រកាន់ជំហរម៉ឺងម៉ាត់នេះ ដែលមហាជន និងអ្នកបើកបរតាមដងផ្លូវបានដឹងរឿងនេះតាំងពីដើមនីតិកាលកន្លងមក»។

ឧបនាយករដ្ឋមន្រ្តី បានបន្តទៀតថា ការបើកបរដោយធ្វេសប្រហែស និងខុសច្បាប់ គឺជាការប្រមាថជីវិតមនុស្ស ដែលបង្កើតឲ្យមានសោកនាដកម្មក្នុងគ្រួសារមួយ ដែលរងគ្រោះដោយសាររឿងនេះ។ ការធ្វេសប្រហែសមួយពេល អាចបណ្តាលឲ្យបាត់បង់ជីវិតមនុស្សម្នាក់ ឬច្រើននាក់ និងបង្កឲ្យមានទុក្ខសោកយ៉ាងធ្ងន់ធ្ងរដល់ក្រុមគ្រួសារជនរងគ្រោះ។

លោកឧបនាយករដ្ឋមន្រ្តី បានអំពាវនាវដល់អ្នកបើកបរទាំងអស់ ត្រូវតែមានការប្រុងប្រយ័ត្នខ្ពស់ និងគោរពច្បាប់ចរាចរណ៍ឲ្យបានខ្ជាប់ខ្ជួន ដើម្បីធានាសុវត្ថិភាពតាមដងផ្លូវ និងជាការគោរពដល់ជីវិតខ្លួនឯង ក៏ដូចជាជីវិតអ្នកដទៃ។

សារដ៏ម៉ឺងម៉ាត់របស់ប្រមុខក្រសួងយុត្តិធម៌ខាងលើនេះ ស្របពេលដែលមហាជនកំពុងរង់ចាំតាមដានពីចំណាត់ការលើស្រ្តីអ្នកបើកឡានឈ្មោះ សាម​ ម៉ីជូ ដែលបានបង្កគ្រោះថ្នាក់ចរាចរណ៍បណ្តាលឲ្យមន្រ្តីសាធារណការម្នាក់ស្លាប់ ហើយករណីនេះត្រូវបាន ប្រជាពលរដ្ឋចែកចាយព្រោងព្រាត និងបញ្ចេញមតិយ៉ាងផុសផុលនៅតាមបណ្តាញសង្គម។

យ៉ាងណាក៏ដោយស្រ្តី សាម ម៉ីជូ ត្រូវបានឪពុកម្តាយនាំខ្លួនមកប្រគល់ជូនស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី៣០ ខែកក្កដា ឆ្នាំ២០២៦។ ក្រោយមកដល់ស្នងការដ្ឋាននគរបាលរាជធានីភ្នំពេញ នគរបាលជំនាញបានសួរចម្លើយ និងក្រោយបញ្ចប់កំណត់ហេតុរួចមក នគរបាលបានសម្រេចឃាត់ខ្លួន ដាក់ខ្នោះ និងវាស់កម្ពស់ ដើម្បីបន្តកសាងសំណុំរឿងបញ្ជូនទៅកាន់តុលាការចាត់ការបន្តទៀត។

«ការចូលរួមអនុវត្តច្បាប់ចរាចរណ៍ប្រកបដោយស្មារតីទទួលខុសត្រូវ គឺជាកត្តាចាំបាច់ក្នុងការកាត់បន្ថយគ្រោះថ្នាក់ចរាចរណ៍ និងរួមចំណែកកសាងសង្គមមួយដែលមានសុវត្ថិភាព និងសណ្តាប់ធ្នាប់ល្អ»!