(បរទេស)៖ សហព័ន្ធគ្រប់គ្រងបាល់ទាត់ប្រចាំទ្វីបអឺរ៉ុប UEFA និងតំបន់អាមេរិកខាងជើង Concacaf បានប្រកាសព្រមគ្នាមិនចូលរួមព្រឹត្តិការណ៍បាល់ទាត់ពិភពលោក World Cup ទៀតឡើយ ប្រសិនបើគម្រោងការលក់ភាគហ៊ុនរបស់ FIFA ទទួលបានជោគជ័យ។

ពីគេហទំព័រកីឡា BBC បានចេញផ្សាយថា UEFA បានកោះប្រជុំសមាជិកទាំង ៥៥ប្រទេសជាបន្ទាន់មួយកាលពីថ្ងៃព្រហស្បតិ៍ម្សិលមិញ និងបានឆ្នោតគាំទ្រ ៥៥-០ តែម្តង ដើម្បីពហិការ និងដើរចេញពី FIFA ផងដែរ។

ចំណែកឯ Concacaf សហព័ន្ធគ្រប់គ្រងបាល់ទាត់ប្រចាំតំបន់អាមេរិកខាងជើង ដោយរួមមានសហរដ្ឋអាមេរិក ម៉ិចស៊ិក និងកាណាដា ដែលទើបធ្វើម្ចាស់ផ្ទះ World Cup 2026 រួមគ្នានោះ ដោយមាន ៤១ប្រទេសសរុប ក៏បានទាត់ចោលនូវគម្រោងលក់ភាគហ៊ុន FIFA ទៅឲ្យវិនិយោគិនខាងក្រៅនេះដែរ។

ទោះជាយ៉ាងណា គម្រោងការថ្មីរបស់សហព័ន្ធអន្តរជាតិ FIFA អាចដំណើរការទៅបាន ដរាបណាឆ្លងកាត់ការបោះឆ្នោតពី ២១១ប្រទេសជាសមាជិក គ្រាដែលប្រធាន លោក Gianni Infantino ទទូចឲ្យមានការគំទ្រ តាមរយៈសន្យាបន្ថែមប្រាក់ឧបត្ថម្ភប្រចាំឆ្នាំទៀតផង។

គិតមកទល់ពេលនេះដែរ សេតវិមាន ក៏មិនទាន់មានវាចាអ្វីទាក់ទិននឹងលោក Infantino ដែរ បើទោះបីជាវិនិយោគិនដែលនឹងចូលទៅទិញភាគហ៊ុន FIFA ត្រូវបានគេសង្ស័យថា មានជាប់ពាក់ព័ន្ធនឹងលោក Donald Trump ក៏ដោយ៕