(កំពង់ស្ពឺ)៖ នៅថ្ងៃទី៣០ ខែកក្កដា ឆ្នាំ២០២៦ លោកឧត្តមសេនីយ៍ឯក ហេង ធូ អគ្គនាយករង មជ្ឈមណ្ឌលជាតិ ទទួលបន្ទុកជំនាញគ្រប់គ្រងស្តង់ដារ សម្ភារ និង បច្ចេកទេស បានអញ្ជើញចូលរួមជាអធិបតី ក្នុងកិច្ចប្រជុំបូកសរុប វឌ្ឍនភាពការងារ របស់យានដ្ឋាន-វិទ្យាស្ថានហ្វឹកហ្វឺនឧដុង្គ ប្រចាំឆមាសទី១ ឆ្នាំ២០២៦។

ឧត្តមសេនីយ៍ឯក ហេង ធូ បានណែនាំ និងក្រើនរំលឹកដល់យោធិនទាំងអស់អំពីតួនាទី និងភារកិច្ចរបស់ខ្លួន ជាពិសេសការគោរពវិន័យ សីលធម៌ និងសេចក្តីថ្លៃថ្នូរ ឲ្យសាកសមជាយោធិន កងយោធពលខេមរភូមិន្ទ។

ជាមួយគ្នានេះ ឧត្តមសេនីយ៍ឯកក៏បានជំរុញ ឲ្យយោធិនទាំងអស់បន្តខិតខំបំពេញការងារ ការហ្វឹកហ្វឺន ការថែទាំ ការលាងសំអាតរថយន្តគ្រឿងចក្រ និងម៉ាស៊ីនដែលជាទ្រព្យសម្បត្តិរដ្ឋឲ្យបានល្អ ត្រឹមត្រូវស្របតាមស្តង់ដារបច្ចេកទេស ព្រមទាំងត្រូវគោរព និងអនុវត្តយ៉ាងម៉ឺងម៉ាត់នូវវេនប្រចាំការ និងវេនប្រចាំបញ្ជា។

ឧត្តមសេនីយ៍ឯក ហេង ធូ ក៏បានកោតសរសើរចំពោះកិច្ចខិតខំប្រឹងប្រែង របស់នាយទាហាន នាយទាហានរង និងពលទាហាននៃយានដ្ឋាន ក្នុងការបំពេញភារកិច្ច រៀបចំទុកដាក់ និងថែរក្សារថយន្ត គ្រឿងចក្រ ម៉ាស៊ីន និងសម្ភារៈ ក្នុងរយៈពេលឆមាសទី១ កន្លងមកនេះផងដែរ៕