(ភ្នំពេញ)៖ British Embassy ប្រចាំទីក្រុងភ្នំពេញបានអនុម័តការធ្វើបច្ចុប្បន្នភាពលើឈ្មោះជាភាសាខ្មែរផ្លូវការរបស់ United Kingdom បន្ទាប់ពីបានពិគ្រោះយោបល់ជាមួយអ្នកជំនាញផ្នែកភាសាវិទ្យាកម្ពុជារាជបណ្ឌិត្យសភា កម្ពុជា និងសមាជិកនៃBritish Community នៅក្នុងប្រទេសកម្ពុជា និងដោយមានការអនុញ្ញាតពីក្រសួង ការបរទេស និងសហប្រតិបត្តិការអន្តរជាតិរបស់កម្ពុជា។

ឈ្មោះផ្លូវការពេញលេញរបស់ United Kingdom ជាភាសាអង់គ្លេសគឺ "The United Kingdom of Great Britain and Northern Ireland"។ ហើយឈ្មោះនេះនឹងនៅតែជាឈ្មោះពេញលេញ និងផ្លូវការជាភាសាអង់គ្លេស។ យើងបានធ្វើបច្ចុប្បន្នភាព និងទំនើបកម្មដោយបកប្រែជាភាសាខ្មែរថ្មីសម្រាប់ United Kingdom ទៅជា "រាជាណាចក្ររួមនៃព្រឹតថេន និងអៀរឡង់ខាងជើង”។ ការបកប្រែថ្មីនេះ ឆ្លុះបញ្ចាំងកាន់តែត្រឹមត្រូវអំពីរចនាសម្ព័ន្ធនយោបាយបច្ចុប្បន្នរបស់ចក្រភពអង់គ្លេសដែលជារាជាធិបតេយ្យ អាស្រ័យរដ្ឋធម្មនុញ្ញ និងការពិតដែលថាវាជាសហភាពនៃប្រទេសចំនួនបួនរួមបញ្ចូលគ្នាគឺ អង់គ្លេស ស្កុតឡែន វែលស៍ និងអៀរឡង់ខាងជើង។ ទម្រង់ខ្លីគឺ "ព្រឹតថេន” ជាពាក្យខ្មែរដែលទើបបង្កើតថ្មីដែលជាការសរសេរតាម សូរសព្ទពីពាក្យអង់គ្លេស "Britain"។

ការកែសម្រួលនេះឆ្លុះបញ្ចាំងពីការប្តេជ្ញាចិត្តរួមគ្នាក្នុងការធានាថាភាសាខ្មែរតំណាងឱ្យអត្តសញ្ញាណរបស់ United Kingdom បានយ៉ាងត្រឹមត្រូវ ខណៈពេលដែលគោរពតាមអនុសញ្ញា និងការប្រើប្រាស់ភាសាខ្មែរ។ វាក៏បានគូសបញ្ជាក់ពីតម្លៃនៃកិច្ចសហការរវាងដៃគូកម្ពុជា និង British ក្នុងការលើកកម្ពស់ការយោគយល់គ្នា ទៅវិញទៅមករវាងប្រទេសយើងទាំងពីរ។

លោក Dominic Williams MBE ឯកអគ្គរាជទូតនៃ British Embassy ប្រចាំកម្ពុជា បានមាន ប្រសាសន៍ថា៖ «ខ្ញុំពិតជាមានសំណាងណាស់ដែលបានរៀនភាសាខ្មែរក្នុងរយៈពេលដ៏វែងមួយ ហើយមានការគោរព យ៉ាងជ្រាលជ្រៅចំពោះសារៈសំខាន់ជាមូលដ្ឋានរបស់ភាសាខ្មែរនៅក្នុងវប្បធម៌កម្ពុជា។ ខ្ញុំជឿជាក់យ៉ាង មុតមាំក្នុងការរក្សាភាសាដ៏រស់រវើកនេះ។ ពេលខ្ញុំរៀនពាក្យខ្មែរដែលបកប្រែសម្រាប់ប្រទេសខ្ញុំជាលើកដំបូង ខ្ញុំបានរកឃើញថា ពាក្យខ្មែរដែលប្រើ នៅពេលបកប្រែជាភាសាអង់គ្លេស មិនបានឆ្លុះបញ្ចាំងពីភាពចម្រុះ និងទំនើបរបស់ United Kingdom ឬអត្តសញ្ញាណផ្ទាល់ខ្លួនរបស់ខ្ញុំទេ ក្នុងនាមជាមនុស្សដែលមានអត្តសញ្ញាណផ្ទាល់ខ្លួន មកពី អង់គ្លេស អៀរឡង់ខាងជើង និងវែលស៍»។

លោកបានបន្តថា៖ «ការសម្រេចចិត្តរបស់យើងក្នុងការធ្វើបច្ចុប្បន្នភាពការបកប្រែគឺជាការបង្ហាញពីការគោរពយ៉ាងជ្រាលជ្រៅ និងសារៈសំខាន់ដែលយើងមានលើភាសាខ្មែរ។ យើងមិនចង់ដាក់ការផ្លាស់ប្តូរដែលមានអារម្មណ៍ចម្លែក ចំពោះអ្នកនិយាយភាសាខ្មែរទេ ដូច្នេះយើងបានពិគ្រោះយោបល់យ៉ាងទូលំទូលាយ។ វាគួរឲ្យចាប់ អារម្មណ៍ណាស់ដែលបានរៀនពីរាជបណ្ឌិត្យសភាថា ព្រះករុណាព្រះបាទសម្តេចព្រះ នរោត្តម សីហនុ បានប្រើពាក្យត្រឹមត្រូវជាងសម្រាប់ប្រទេសខ្ញុំក្នុងទសវត្សរ៍ឆ្នាំ ១៩៦០ - "រាជាណាចក្ររួម"។ វា ពិតជាគួរឲ្យគោរពក្នុងការធ្វើឲ្យការប្រើប្រាស់ជាប្រវត្តិសាស្ត្រនេះរស់ឡើងវិញ ដូច្នេះយើងបានដាក់ ព្រះបន្ទូលរបស់ព្រះករុណាព្រះបាទសម្តេចព្រះ នរោត្តម សីហនុ ជាស្នូលនៃការបកប្រែដែលបានធ្វើ បច្ចុប្បន្នភាពរបស់យើង»។

ទន្ទឹមនេះ លោកឯកអគ្គរាជទូតក៏បានថ្លែងអំណរគុណចំពោះរាជបណ្ឌិត្យសភា ដៃគូភាសា សមាជិក British Community នៅកម្ពុជា និងក្រសួងការបរទេស និងសហប្រតិបត្តិការអន្តរជាតិ ចំពោះជំនាញ ការយកចិត្តទុកដាក់ និងកិច្ចសហការរបស់ពួកគេ ក្នុងការជួយយើងឱ្យសម្រេចបាននូវព្រឹត្តិការណ៍ដ៏សំខាន់នេះ ហើយលោកសង្ឃឹមថា ការបកប្រែថ្មីនេះ នឹងដើរតួនាទីតូចមួយក្នុងការបង្កើនមិត្តភាព និងការយោគយល់គ្នាទៅវិញទៅមក រវាងប្រទេសដ៏អស្ចារ្យទាំងពីររបស់យើង។

ការបកប្រែដែលបានធ្វើបច្ចុប្បន្នភាពនេះចូលជាធរមានភ្លាមៗ ហើយនឹងត្រូវបានប្រើប្រាស់ជាផ្លូវការក្នុងកិច្ចការ ទំនាក់ទំនងរបស់ British Embassy ប្រចាំនៅកម្ពុជា។