(មណ្ឌលគិរី)៖ លោក គង់ គឹមនី អភិបាលខេត្តមណ្ឌលគិរី បានដាក់បទបញ្ជាយ៉ាងតឹងរ៉ឹងបំផុតឱ្យបញ្ឈប់ជាបន្ទាន់នូវសកម្មភាពកាប់ឆ្ការ រុករាន និងទន្ទ្រានយកដីព្រៃឈើរដ្ឋដោយខុសច្បាប់។

លោកថា អាជ្ញាធរពាក់ព័ន្ធត្រូវបំផុសស្មារតីប្រជាពលរដ្ឋចេះស្រឡាញ់ព្រៃឈើ រួមគ្នាដាំដើមឈើ ថែទាំ និងស្រោចទឹកកូនឈើដែលបានដាំឱ្យរស់ និងលូតលាស់ល្អ។ ការលើកឡើងដូចនេះក្នុងឱកាសអបអរសាទរបុណ្យរុក្ខទិវា ៩ កក្កដា ធ្វើឡើងនៅសង្កាត់ស្ពានមានជ័យ ក្រុងសែនមនោរម្យ នាព្រឹកថ្ងៃទី៣១ ខែកក្កដា ឆ្នាំ២០២៦។

លោក គង់ គឹមនី បានលើកឡើងអំពីអត្ថប្រយោជន៍ដ៏មហាសាលនៃព្រៃឈើ និងបានបំផុសចលនាឱ្យប្រជាពលរដ្ឋគ្រប់រូបចូលរួមដាំ ថែរក្សា និងការពារធនធានធម្មជាតិ។ លោកថា ការជ្រើសរើសទីតាំងដាំកូនស្រល់ និងកូនឈើចម្រុះតាមសងខាងផ្លូវជាតិ នាពេលនេះ គឺមិនត្រឹមតែជួយបង្កើនគម្របព្រៃឈើបៃតង និងទប់ស្កាត់ការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងជួយលម្អសោភ័ណភាពដងផ្លូវយុទ្ធសាស្ត្រឆ្ពោះទៅកាន់ព្រំដែនកម្ពុជា-វៀតណាម ឱ្យកាន់តែមានភាពទាក់ទាញ និងស្រស់បំព្រងក្នុងការស្វាគមន៍ភ្ញៀវទេសចរជាតិ និងអន្តរជាតិមកកាន់ខេត្តមណ្ឌលគិរី។

អភិបាលខេត្តមណ្ឌលគិរី ក៏បានលើកឡើងពីការកាត់បន្ថយការភាយឧស្ម័នផ្ទះកញ្ចក់ និងការដាំស្តារព្រៃឈើឡើងវិញ ទប់ស្កាត់ និងបង្ក្រាបការកាប់បំផ្លាញព្រៃឈើខុសច្បាប់ និងការទន្ទ្រានដីព្រៃ។

បន្ថែមពីនេះ លោកក៏បានអំពាវនាវយ៉ាងម៉ឺងម៉ាត់ដល់អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ និងប្រជាពលរដ្ឋទាំងអស់ ឱ្យរួមគ្នារក្សា និងស្រោចទឹកកូនឈើដែលបានដាំរួចឱ្យលូតលាស់ល្អ ព្រមទាំងត្រូវបញ្ឈប់ជាបន្ទាន់នូវសកម្មភាពកាប់ឆ្ការ រានដីព្រៃ ឬទន្ទ្រានយកដីព្រៃឈើខុសច្បាប់ ដើម្បីរួមចំណែកអនុវត្ត «យុទ្ធសាស្ត្របញ្ចកោណ-ដំណាក់កាលទី១» របស់រាជរដ្ឋាភិបាលកម្ពុជា និងធានាបាននូវការអភិវឌ្ឍសេដ្ឋកិច្ច-សង្គមប្រកបដោយចីរភាព។

ក្នុងឱកាសបុណ្យរុក្ខទិវាឆ្នាំនេះ ខេត្តសម្រេចកំណត់យកទីតាំងស្ថិតក្នុងភូមិអូរស្ពាន ដើម្បីរៀបចំប្រារព្ធពិធីបុណ្យរុក្ខទិវាថ្នាក់ខេត្ត និងបានជ្រើសរើសយកកូនឈើប្រភេទស្រល់ចំនួន ១០ ០០០ ដើម សម្រាប់ដាំដុះតាមសងខាងដងផ្លូវ សាធារណៈពីចំណុចផ្លូវបំបែកដាក់ដាំ ផ្លូវជាតិលេខ៧៦ ក្រុងសែនមនោរម្យ ដល់ចំណុចប៉ុស្តិ៍ច្រកទ្វារទ្វេភាគីព្រំដែនដាក់ដាំ (កម្ពុជា-វៀតណាម) និងកូនឈើចម្រុះចំនួន ៤៥០ ដើម សម្រាប់ចែកចាយក្នុងកម្មវិធី៕