(ក្រចេះ)៖ រដ្ឋបាលសង្កាត់អូរឬស្សី ខេត្តក្រចេះ នៅព្រឹកថ្ងៃទី ៣១ ខែកក្កដា ឆ្នាំ២០២៦ បានដឹកនាំក្រុមការងារចម្រុះ រួមមានក្រុមប្រឹក្សាសង្កាត់ មន្ត្រីរដ្ឋបាលសង្កាត់ មេភូមិ អនុភូមិ និងសមាជិកភូមិស្រែស្តៅ និងភូមិកាប៉ូ សហការជាមួយមន្ត្រីជំនាញនៃមន្ទីរសុខាភិបាល និងមណ្ឌលសុខភាព ចុះធ្វើយុទ្ធនាការផ្សព្វផ្សាយបង្ការជំងឺគ្រុនឈាម និងត្រួតពិនិត្យការប្រើប្រាស់ថ្នាំអាប៊ែត (Abate) ជូនដល់បងប្អូនប្រជាពលរដ្ឋក្នុងមូលដ្ឋាន។

យុទ្ធនាការនេះ មានគោលបំណងអប់រំ ណែនាំ និងអនុវត្តវិធានការសំខាន់ៗ ដើម្បីកាត់បន្ថយហានិភ័យនៃជំងឺគ្រុនឈាម។ ក្រុមការងារបានចុះត្រួតពិនិត្យ និងដាក់ថ្នាំអាប៊ែតក្នុងពាងទឹក អាងស្តុកទឹក និងប្រដាប់ប្រដាស្តុកទឹកប្រើប្រាស់តាមខ្នងផ្ទះ ដើម្បីសម្លាប់ដង្កូវទឹក។ ជាមួយគ្នានេះ ក៏បានណែនាំប្រជាពលរដ្ឋឱ្យកម្ទេចចោលនូវវត្ថុដក់ទឹកថ្លា ដូចជា សំបកកង់ឡានចាស់ៗ កំប៉ុង ដប និងសំបកដូង ដែលជាជម្រកមូសខ្លា និងជាប្រភពបង្កើនផលនៃមូសខ្លា ដែលជាភ្នាក់ងារចម្លងជំងឺគ្រុនឈាម។

អាជ្ញាធរមូលដ្ឋានក៏បានជួបជុំពិភាក្សា និងណែនាំបងប្អូនប្រជាពលរដ្ឋ ព្រមទាំងយុវជនក្នុងភូមិ ឱ្យយល់ដឹងពីរបៀបថែរក្សាអនាម័យជុំវិញខ្នងផ្ទះ និងការការពារខ្លួនពីការខាំនៃមូសខ្លា។ អាជ្ញាធរមូលដ្ឋានបានអំពាវនាវដល់បងប្អូនប្រជាពលរដ្ឋទាំងអស់ បន្តចូលរួមសហការ និងអនុវត្តវិធានការ «ស្អាត ៣ យ៉ាង» និងរួមគ្នាកម្ទេចជម្រកដង្កូវទឹកនៅតាមខ្នងផ្ទះរៀងៗខ្លួនឱ្យបានជាប្រចាំ ដើម្បីការពារសុខភាពគ្រួសារ និងសហគមន៍ទាំងមូលពីជំងឺគ្រុនឈាម៕