(រតនគិរី)៖ នៅព្រឹកថ្ងៃទី៣១ ខែកក្កដា ឆ្នាំ២០២៦ រដ្ឋបាលខេត្តរតនគិរី បានរៀបចំសិក្ខាសាលាផ្សព្វផ្សាយដ៏សំខាន់មួយ ស្តីពីផែនការសកម្មភាពជាតិសម្រាប់ការទប់ស្កាត់ និងឆ្លើយតបចំពោះអំពើហិង្សាលើកុមារ (NVAC) អនុសញ្ញាអង្គការសហប្រជាជាតិស្តីពីសិទ្ធិកុមារ (UNCRC) និងពិធីសារបន្ថែមទី៣ (OP3)។ ព្រឹត្តិការណ៍នេះបានប្រព្រឹត្តទៅនៅសាលមហោស្រពរតនៈ នៃមន្ទីរវប្បធម៌ និងវិចិត្រសិល្បៈ ក្រោមអធិបតីភាពលោក ងិន ណែល អភិបាលរងខេត្តរតនគិរី។

សិក្ខាសាលានេះមានការចូលរួមយ៉ាងផុសផុលពីសំណាក់មន្ត្រីជាន់ខ្ពស់ លោក លោកស្រី ប្រធានមន្ទីរ អង្គភាពពាក់ព័ន្ធមួយចំនួន អភិបាលរងស្រុក ក្រុង លោកនាយកប្រតិបត្តិអង្គការសម្ពន្ធសិទ្ធិកុមារកម្ពុជា និងអង្គការសង្គ្រោះជនងាយរងគ្រោះកម្ពុជា រួមទាំងតំណាងបណ្តាញដែលដឹកនាំដោយកុមារ និងយុវជនមកពីខេត្តរតនគិរី និងខេត្តមណ្ឌលគិរី។ ការជួបជុំនេះបានឆ្លុះបញ្ចាំងពីការប្តេជ្ញាចិត្តរួមគ្នាក្នុងការការពារ និងលើកកម្ពស់សិទ្ធិកុមារនៅកម្ពុជា។

សិក្ខាសាលាផ្សព្វផ្សាយនេះ ទទួលបានការគាំទ្រថវិកាពីអង្គការយូនីសេហ្វ (UNICEF) ប្រចាំប្រទេសកម្ពុជា ដោយមានគោលបំណងសំខាន់ៗជាច្រើន។ ក្នុងនោះរួមមាន ការផ្សព្វផ្សាយសម្ភារៈស្វែងរកការគាំទ្រមតិដែលបានបង្កើតឡើងស្តីពី NVAC, UNCRC និង OP3 ដើម្បីពង្រឹងការយល់ដឹងអំពីសិទ្ធិកុមារ ប្រព័ន្ធការពារ និងក្របខណ្ឌការទប់ស្កាត់អំពើហិង្សា។ លើសពីនេះ វាក៏មានគោលដៅលើកកម្ពស់ការចូលរួមប្រកបដោយអត្ថន័យរបស់កុមារ និងយុវជនក្នុងការតស៊ូមតិ និងសកម្មភាពសហគមន៍ ព្រមទាំងពង្រឹងកិច្ចសហការរវាងសាលារៀន សហគមន៍ និងអាជ្ញាធរមូលដ្ឋានក្នុងការទប់ស្កាត់អំពើហិង្សាលើកុមារ រួមទាំងអាពាហ៍ពិពាហ៍កុមារ និងអាពាហ៍ពិពាហ៍ដោយបង្ខំ (CEFM)។

តាមរយៈសិក្ខាសាលានេះ រដ្ឋបាលខេត្តរតនគិរី សង្ឃឹមថានឹងអាចរួមចំណែកយ៉ាងសកម្មក្នុងការកសាងបរិយាកាសមួយដែលកុមារគ្រប់រូបអាចលូតលាស់ដោយសុវត្ថិភាព និងទទួលបានការការពារពេញលេញពីទម្រង់នៃអំពើហិង្សាគ្រប់បែបយ៉ាង៕