(រតនគិរី)៖ យុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងពលរដ្ឋទូទៅជាង ២ពាន់នាក់ មានជំនាញ មានការងារធ្វើ បន្ទាប់ពីទទួលបានការបណ្ដុះបណ្ដាលជំនាញដោយឥតគិតថ្លៃពីមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគិរី (PTCRK) នៃក្រសួងការងារ និងបណ្ដុះបណ្ដាលវិជ្ជាជីវៈ ។

បើយោងតាមវិទ្យាស្ថាន គិតចាប់ពីខែវិច្ឆិកា ឆ្នាំ២០២៣ មកត្រឹមថ្ងៃទី២០ ខែកក្កដា ឆ្នាំ២០២៦ នេះមានយុវជន និងពលរដ្ឋទូទៅសរុប ២,២៧១នាក់ ទទួលបានអាហារូបករណ៍ លើ១១ មុខជំនាញ ក្នុងងកម្មវិធីបណ្តុះបណ្តាលជំនាញ ១,៥លាននាក់របស់សម្ដេចធិបតី ក្នុងនោះមានក្រុមគោលដៅចំនួន ១,៧២២នាក់។

បើតាមវិទ្យាស្ថានដដែល ជំនាញទាំង១១ រួមមាន៖ អគ្គិសនី, បច្ចេកវិទ្យាព័ត៌មាន, ជួសជុលម៉ូតូ, សំណង់, សេវា កម្មសម្អាងកាយ, សេវាកម្មកាត់សក់, ការដាំ ថែទាំ និងប្រមូលផលដំណាំចេក, ការដាំ ថែទាំ និងប្រមូលផលដំណាំស្វាយចន្ទី, ការផលិតនំ, ធុរកិច្ចភេសជ្ជៈ, និងការផ្សាលោហៈដោយអគ្គិសនី (ធូប)។

សូមជម្រាបដែរថា វិទ្យសា្ថន នឹងបើកវគ្គសិក្សាថ្មី ដែលការចុះឈ្មោះចូលរៀនចាប់ពីថ្ងៃជូនដំណឹងនេះតទៅ។ ដើម្បីទទួលបានអាហារូបករណ៍សិក្ខាកាមត្រូវបំពេញលក្ខខណ្ឌដូចជា ត្រូវមានអាយុចាប់ពី១៥ឆ្នាំឡើងទៅ និងមានអត្តសញ្ញាណប័ណ្ណសញ្ញាតខ្មែរ ឬសំបុត្រកំណើត។ លើសពីនេះ សិក្ខាកាមនិងទទួលបានប្រាក់ឧបត្ថម្ភបន្ថែមជារៀងរាល់ខែប្រសិនជាមានភ្ជាប់មកជាមួយនិងបណ្ណសមធម៌ (បណ្ណក្រីក្រកម្រិត១ ឬកម្រិត២) ឬមានបណ្ណសម្គាល់គ្រួសារងាយរងហានិភ័យ៕