វេជ្ជបណ្ឌិត គួង ឡូ៖ គ្មានសុខភាពទេ បើគ្មានសុខភាពផ្លូវចិត្ត! សុខភាពផ្លូវចិត្តល្អ ជាមូលដ្ឋានគ្រឹះនៃសុខភាពទាំងមូល
31-07-2026 15:02
(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានថ្លែងលើកឡើងថា «គ្មានសុខភាពទេ បើគ្មានសុខភាពផ្លូវចិត្ត (No Health Without Mental Health)» ដោយលោកចាត់ទុកសុខភាពផ្លូវចិត្តជាមូលដ្ឋានគ្រឹះនៃសុខភាពទាំងមូល និងជាកត្តាសំខាន់ក្នុងការស្តារសុខុមាលភាពជនរងគ្រោះដោយអំពើហិង្សាទាក់ទងនឹងយេនឌ័រ។
ការលើកឡើងរបស់លោកវេជ្ជបណ្ឌិត គួង ឡូ ធ្វើឡើងក្នុងឱកាសដែលលោកអញ្ជើញចូលរួមក្នុងពិធីបិទវគ្គបណ្តុះបណ្តាលរយៈពេល ៤ថ្ងៃ ស្តីពី ការគាំទ្រផ្លូវចិត្ត និងសង្គមដល់ជនរងគ្រោះដោយអំពើហិង្សាទាក់ទងនឹងយេនឌ័រ (GBV) ដែលមានការចូលរួមពីមន្ត្រីសុខាភិបាលមកពីមណ្ឌលសុខភាពចំនួន១៣ និងមន្ទីរពេទ្យបង្អែកស្រុកជាំក្សាន្ត នៅរសៀលថ្ងៃទី៣០ ខែកក្កដា ឆ្នាំ២០២៦។
លោកវេជ្ជបណ្ឌិត គួង ឡូ បានថ្លែងវាយតម្លៃខ្ពស់ចំពោះលទ្ធផលវគ្គបណ្តុះបណ្តាលនេះ ដោយបញ្ជាក់ថា ពិន្ទុតេស្តមុនវគ្គជាមធ្យមមាន ៦៧.៥៩ភាគរយ ខណៈពិន្ទុក្រោយវគ្គបានកើនឡើងដល់ ៩៧.៩៦ភាគរយ ឬកើនឡើងជាង ៣០ភាគរយ ដែលបង្ហាញពីការកើនឡើងយ៉ាងច្បាស់នៃចំណេះដឹង និងជំនាញរបស់សិក្ខាកាម។
លោកប្រធានមន្ទីរសុខាភិបាលខេត្តព្រះវិហារ បានថ្លែងបញ្ជាក់ថា៖ អ្នកផ្តល់សេវាសុខាភិបាល ត្រូវមានទាំងចំណេះដឹង ជំនាញ និងក្រមសីលធម៌វិជ្ជាជីវៈ ព្រមទាំងស្តាប់ជនរងគ្រោះដោយការយកចិត្តទុកដាក់ មិនវិនិច្ឆ័យ និងផ្តល់សេវាប្រកបដោយភាពកក់ក្តៅ និងមេត្តាធម៌ ជាពិសេសចំពោះកុមារី ក្មេងស្រី និងស្ត្រី ដែលរងផលប៉ះពាល់ពីអំពើហិង្សា និងវិបត្តិនានា។
លោក គួង ឡូ ក៏បានថ្លែងចែករំលែកបទពិសោធន៍ជាក់ស្តែងពីកុមារនៅមណ្ឌលភៀសសឹក ដែលបានបង្ហាញអារម្មណ៍ភ័យខ្លាចតាមរយៈការគូររូបយន្តហោះចម្បាំង និងទិដ្ឋភាពសង្គ្រាម ដោយចាត់ទុកថា នេះគឺជាសញ្ញានៃការប៉ះទង្គិចផ្លូវចិត្ត ដែលត្រូវការការគាំទ្រទាន់ពេលវេលា ដើម្បីបង្ការការវិវត្តទៅជាបញ្ហាផ្លូវចិត្តធ្ងន់ធ្ងរនាពេលអនាគត។
ជាមួយគ្នានេះ លោកវេជ្ជបណ្ឌិត ក៏បានថ្លែងអំពាវនាវឱ្យមន្ត្រីសុខាភិបាលទាំងអស់ យកចំណេះដឹង និងជំនាញដែលទទួលបានទៅអនុវត្តក្នុងការងារប្រចាំថ្ងៃ ប្រកបដោយវិជ្ជាជីវៈ និងគោរពសិទ្ធិជនរងគ្រោះ ព្រមទាំងស្នើឱ្យមណ្ឌលសុខភាពទាំងអស់ដាក់តាំងស្លាករំលឹកអំពីក្រមសីលធម៌វិជ្ជាជីវៈ ដើម្បីលើកកម្ពស់គុណភាពសេវា និងពង្រឹងទំនុកចិត្តរបស់ប្រជាពលរដ្ឋចំពោះប្រព័ន្ធសុខាភិបាលរបស់យើង។
សូមបញ្ជាក់ថា វគ្គបណ្តុះបណ្តាលនេះ រៀបចំដោយមន្ទីរសុខាភិបាលខេត្តព្រះវិហារ ក្រោមការគាំទ្រថវិកាពីរដ្ឋាភិបាលកាណាដា តាមរយៈអង្គការអាដ្រា កម្ពុជា (ADRA Cambodia) ក្នុងគម្រោង «កាន់តែរឹងមាំ (Stronger Project)» ដែលអនុវត្តដោយអង្គការ TPO Cambodia៕
