(ព្រះវិហារ)៖ លោក គីម រិទ្ធី អភិបាលខេត្តព្រះវិហារ បានថ្លែងថា «លទ្ធផលប្រឡងបាក់ឌុប គឺជាជំហានដ៏សំខាន់ក្នុងការបើកទ្វារទៅកាន់ថ្នាក់ឧត្តមសិក្សា និងការចាប់យកជំនាញអាជីពក្នុងជីវិត» ខណៈក្មួយៗសិស្សានុសិស្ស គឺជាធនធានមនុស្សដ៏មានតម្លៃ ដែលនឹងក្លាយជាកម្លាំងស្នូលក្នុងការអភិវឌ្ឍប្រទេសជាតិ និងខេត្តព្រះវិហារ នាពេលអនាគត។

ការថ្លែងរបស់លោកអភិបាលខេត្តព្រះវិហារ បែបនេះ ធ្វើឡើងក្នុងឱកាសដែលលោកអញ្ជើញសំណេះសំណាលជាមួយលោកគ្រូ អ្នកគ្រូ និងសិស្សានុសិស្សថ្នាក់ទី១២ នៃវិទ្យាល័យជ័យសែន ក្នុងស្រុកជ័យសែន ខេត្តព្រះវិហារ នាព្រឹកថ្ងៃទី៣១ ខែកក្កដា ឆ្នាំ២០២៦ ដើម្បីលើកទឹកចិត្ត និងផ្តល់អនុសាសន៍ដល់បេក្ខជន មុនការប្រឡងសញ្ញាបត្រមធ្យមសិក្សាទុតិយភូមិ។

លោក គីម រិទ្ធី បានសម្តែងនូវការកោតសរសើរ និងវាយតម្លៃខ្ពស់ចំពោះការលះបង់ និងការខិតខំប្រឹងប្រែងរបស់លោកគ្រូ អ្នកគ្រូ ដែលបានបំពេញតួនាទីយ៉ាងសកម្មក្នុងការបណ្តុះបណ្តាល ផ្ទេរចំណេះដឹង និងអប់រំសិស្សានុសិស្ស រហូតឈានដល់ដំណាក់កាលត្រៀមប្រឡងបាក់ឌុប។

ទន្ទឹមនឹងនោះលោកអភិបាលខេត្តព្រះវិហារ ក៏បានថ្លែងផ្តាំផ្ញើដល់សិស្សានុសិស្សទាំងអស់ ត្រូវយកចិត្តទុកដាក់ថែរក្សាសុខភាព សម្រាកឱ្យបានគ្រប់គ្រាន់ បន្តរំលឹកមេរៀន និងពង្រឹងសមត្ថភាពលើមុខវិជ្ជានីមួយៗ ដើម្បីត្រៀមខ្លួនឱ្យបានល្អបំផុតសម្រាប់ការប្រឡង។

លោកក៏បានក្រើនរំលឹកឱ្យបេក្ខជនគោរពឱ្យបានម៉ឺងម៉ាត់នូវបទបញ្ជា និងនីតិវិធីនៃការប្រឡង ជៀសវាងការប្រព្រឹត្តខុសឆ្គងគ្រប់រូបភាព ដែលអាចប៉ះពាល់ដល់លទ្ធផលប្រឡង និងអនាគតសិក្សារបស់ខ្លួន។

លោក គីម រិទ្ធី បានថ្លែងបញ្ជាក់ថា ការប្រឡងបាក់ឌុបមិនត្រឹមតែជាការវាស់ស្ទង់សមត្ថភាពប៉ុណ្ណោះទេ ប៉ុន្តែជាចំណុចចាប់ផ្តើមនៃដំណើរឆ្ពោះទៅរកការសិក្សាថ្នាក់ឧត្តមសិក្សា ការអភិវឌ្ឍជំនាញវិជ្ជាជីវៈ និងការកសាងអនាគតដ៏រឹងមាំសម្រាប់ខ្លួនឯង ក្រុមគ្រួសារ និងសង្គមជាតិ៕