(បរទេស)៖ ប្រមុខដឹកនាំ FIFA លោក Gianni Infantino បានថ្លែងថា «គ្មាននរណាម្នាក់កំពុងលក់បាល់ទាត់ឡើយ» គ្រាដែលរូបលោកបានប្តេជ្ញាចិត្ត អំពីគម្រោងការថ្មីលក់ភាគហ៊ុនទៅឱ្យវិនិយោគិនឯកជននៅតែបន្តធ្វើដដែល។ នេះបើយោងតាមការចេញផ្សាយដោយ BBC។

លោកថា «គ្មាននរណាកំពុងលក់បាល់ទាត់។ វាពុំមែនជាអ្វីដែល FIFA ធ្វើនេះដូចគ្រប់គ្នាគិតទេ។ ពួកយើងកំពុង ដំណើរការ ដើម្បីធានាបានគ្រប់សមាជិកមានលទ្ធផលដោះស្រាយ ចំពោះបញ្ហាដែលកំពុងប្រឈមផងទេ។ FIFA គោរពរាល់មតិរិះគន់ និងការព្រួយបារម្ភនានាជាសាធារណៈ និងការប្តេជ្ញាចិត្តដោះស្រាយឱ្យបានទូលំទូលាយទៀតផង»។

នៅក្នុងសេចក្តីថ្លែងការណ៍មួយរបស់ FIFA ដែលបានចេញផ្សាយកាលពីថ្ងៃសុក្របានបញ្ជាក់ថា ដំណើរការពិគ្រោះ យោបល់ត្រូវបានរំខាន ដោយការចុះផ្សាយខុសនៃប្រព័ន្ធផ្សព្វផ្សាយ។

ទោះជាយ៉ាងណា ដើម្បីដំណើរការគម្រោងការថ្មីប្រព្រឹត្តទៅបាន លុះត្រាតែ FIFA និងលោក Infantino ទទួលបានការគាំទ្រ ១០៦សំឡេង ក្នុងចំណោមសមាជិកសរុប ២១១ប្រទេស នៅពេលសហព័ន្ធ UEFA និង CONCACAF ដែលបូកបញ្ចូលគ្នាមាន ៩៦ប្រទេស ប្រកាសវេតូទៅហើយនោះ។

គួររំលឹកផងថា លោក Gianni Infantino សញ្ជាតិស្វីស វ័យ ៥៦ឆ្នាំ បានចូលកាន់តំណែងប្រធាន FIFA ក្រោយជាប់ការបោះឆ្នោតក្នុងឆ្នាំ២០១៦ ជំនួសតំណែងលោក Sepp Blatter និងបន្តឈ្នះឆ្នោត ២លើកថែមទៀតកាលឆ្នាំ២០១៩ និងឆ្នាំ២០២៣។ រូបលោកត្រូវបានគេគិតថា នឹងបន្តឈរឈ្មោះបោះឆ្នោតក្នុងខែមីនា ឆ្នាំ២០២៧ ខាងមុខទៀតដែរ៕