(បន្ទាយមានជ័យ)៖ នៅថ្ងៃទី៣១ ខែកក្កដា ឆ្នាំ២០២៦ លោក ប្រាក់ ប៉ូលី អភិបាលរងខេត្តបន្ទាយមានជ័យ បានដឹកនាំក្រុមការងារចម្រុះខេត្ត ក្រោមការសម្របសម្រួលនីតិវិធីដោយលោក សំរិទ្ធ សុខុន ព្រះរាជអាជ្ញារង នៃអយ្យការអមសាលាដំបូងខេត្ត បានចុះត្រួតពិនិត្យទីតាំងចំនួន៣ ក្នុងក្រុងប៉ោយប៉ែត រកឃើញជនបរទេសប្រុស ៨នាក់ មកពី ២សញ្ជាតិ គឺចិន៥នាក់ និងឥណ្ឌូនេស៊ី៣នាក់។

ប្រតិបត្តិការនេះក្រោមការដឹកនាំពីលោក អុំ រាត្រី អភិបាលខេត្តបន្ទាយមានជ័យ និងលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។

របាយការណ៍បានបញ្ជាក់ថា ទីតាំងទាំង៣រួមមាន៖

*ទីតាំងទី១ (ម្ចាស់ សៅ ម៉េងគាង) ផ្ទះវីឡា មាន៥បន្ទប់ ពុំមានជនបរទេសស្នាក់នៅ ពុំមានសម្ភារសង្ស័យ
*ទីតាំងទី២ អគារកម្ពស់៤ជាន់ មាន១៥បន្ទប់ ហល១ រកឃើញជនជាតិឥណ្ឌូនេស៊ីចំនួន៣នាក់ (ប្រុស) រកឃើញសម្ភារសង្ស័យមួយចំនួនរួមមាន៖ ទូរសព្ទចម្រុះចំនួន២៣គ្រឿង កុំព្យូទ័រយួរដៃចំនួន៣ និងបន្ទប់ខលសេនធ័រចំនួន៩ ប៉ុន្តែមិនបានរកឃើញវត្ថុតាងនៅខាងក្នុងបន្ទប់ទេ។

សម្រាប់ជនបរទេសទាំងនេះ ត្រូវបានបញ្ជូនទៅអធិការដ្ឋាននគរបាលក្រុងប៉ោយប៉ែត ដើម្បីសួរនាំបន្តទៀត ហើយសមត្ថកិច្ចជំនាញ ដកហូតវត្ថុតាងបញ្ជូនទៅស្នងការដ្ឋាននគរបាលខេត្ត។ ជាមួយគ្នានេះ កម្លាំងសមត្ថកិច្ច បានបន្តស្រាវជ្រាវរកម្ចាស់ទីតាំង និងបិទទីតាំងជាបណ្ដោះអាសន្ន។

*ទីតាំងទី៣ ផ្ទះ១ល្វែង មាន២បន្ទប់ នៅភូមិគីឡូលេខ៤ សង្កាត់ផ្សារកណ្ដាល រកឃើញជនជាតិចិន៥នាក់ (ប្រុស) ពុំមានលិខិតឆ្លងដែនជាប់ខ្លួន និងត្រូវបញ្ជូនទៅអធិការដ្ឋាននគរបាលក្រុង ដើម្បីសួរនាំបន្ត៕