(ត្បូងឃ្មុំ)៖ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានអញ្ជើញចូលរួមប្រគេនទៀនព្រះវស្សា ដោយផ្ទាល់ជាមួយថ្នាក់ដឹកនាំ មន្រ្តីរាជការក្រសួងបរិស្ថាន ក្រុមការងារចុះមូលដ្ឋានគ្រប់ថ្នាក់ អាជ្ញាធរមូលដ្ឋាន និងប្រជាពលរដ្ឋនៅតាមវត្តនានានៅក្នុងស្រុកអូររាំងឪ ស្រុកពញាក្រែក និងស្រុកត្បូងឃ្មុំ ខេត្តត្បូងឃ្មុំ។

លោកបណ្ឌិត អ៊ាង សុផល្លែត បានប្រគេនទៀនព្រះវស្សា ទេយ្យវត្ថុ ជាចច្រើន និងបច្ច័យ៤ ដល់ព្រះសង្ឃគង់ចាំព្រះវស្សា នៅវត្តទួលព្រះពន្លា ឃុំកណ្ដោលជ្រុំ ស្រុកពញាក្រែក នៅវត្តអណ្តូងក្តី ឃុំជីគរ ស្រុកត្បូងឃ្មុំ និងនៅវត្តទួលតាហោ ឃុំគងជ័យ ស្រុកអូររាំងឪ ខេត្តត្បូងឃ្មុំ។

សូមបញ្ជាក់ថា ការប្រារព្ធពិធីបុណ្យចូលព្រះវស្សា មានសារៈសំខាន់ ដែលទី១ ជួយគាំទ្រព្រះសង្ឃគង់ចាំព្រះវស្សារយៈពេល ៣ខែ ដើម្បីអប់រំចិត្ត និងសិក្សាព្រះធម៌វិន័យ។ ទី២ ជាឱកាសដែលពុទ្ធបរិស័ទ គ្រហស្ថសន្សំមហាកុសលតាមរយៈការធ្វើជាទាន ផ្គត់ផ្គង់ចង្ហាន់ និងទេយ្យទាន ដល់ព្រះសង្ឃគង់ចាំព្រះវស្សា និងទី៣ ការនាំយកទៀនព្រះវស្សា និងទេយ្យទានមកវេរប្រគេនព្រះសង្ឃនៅតាមទីវត្តអារាមនានា នាពេលនេះ គឺជាការបង្ហាញពីស្មារតីរួមចំណែកក្នុងការថែរក្សា ប្រពៃណីព្រះពុទ្ធសាសនា ដែលជាមូលដ្ឋានសំខាន់នៃសង្គមខ្មែរ ឱ្យស្ថិតស្ថេរគង់វង្ស៕