(កណ្ដាល)៖ ពលរដ្ឋជាច្រើននាក់ នៅក្រុងអរិយក្សត្រ និងស្រុកខ្សាច់កណ្ដាល បានសម្ដែងការមិនពេញចិត្តចំពោះទង្វើរបស់យុវជនមួយចំនួន ដែលបានធ្វើសកម្មភាពគោះស្គរ ឡកម៉ុងសាយ រាំអុងដឿ ខ្លះចាក់បាសរាំ ដៃកាន់ស្រា ផឹកឡូឡាតាមផ្លូវចូលផ្ទះពលរដ្ឋសុំលុយ ដែលសកម្មភាពនេះ ប្រាសចាកពីការចូលវស្សា ដែលជាប្រពៃណីវប្បធម៌ដ៏ល្អផូរផង់របស់កម្ពុជា។

ខ្លះលើកឡើងថា ពួកគេបានធ្វើសកម្មភាពហួសហេតុ ប្រាសចាកពីទំនៀមទម្លាប់ ប្រពៃណី វប្បធម៌ខ្មែរនៃបុណ្យចូលវស្សាដោយពួកគេខ្លះ ស្លៀកពាក់ប្លែកៗ ដៃកាន់ស្រាផឹក ដើរជាហ្វូងៗច្រើនក្រុម ហើយខ្លះ ថែមទាំងមានការឡើងបង្គោលឈើដោយក្រុមគេពីក្រោមអូសចុះអូសឡើងលើផ្លូវសាធារណៈ បិទផ្លូវឡានម៉ូតូមិនឲ្យទៅមុខ ដោយទុកឲ្យពួកគេ ហ៊ោរកញ្ជ្រៀវ សើចសប្បាយ រាំរែកក្បាច់ប្លែកៗ ដែលមើលមិនសមនឹងភ្នែកទាល់តែសោះ។

ពលរដ្ឋខ្លះ បានទៅណែនាំពួកគេខ្លះដែរ កុំឲ្យធ្វើជ្រុល បើទោះបីជាខ្លួនយកលេសហែទានវស្សារកបច្ច័យចូលវត្តក្ដី តែគួរធ្វើតាមគន្លងប្រពៃណីចាស់បុរាណដែលបានណែនាំមក ប៉ុន្តែសកម្មភាពនេះ ពួកគេមិនស្ដាប់តាមការណែនាំ របស់ចាស់ទុំឡើយ។

ពលរដ្ឋស្នើសុំអាជ្ញាធរជួយណែនាំ និងរៀបចំសណ្តាប់ឲ្យបានល្អ នៅតាមដងផ្លូវ ចៀសរំខានដល់អ្នកដំណើរផ្សេងៗ៕