(ភ្នំពេញ)៖ នាព្រឹកថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ ដោយទទួលបានការចាត់តាំងដ៏ខ្ពង់ខ្ពស់ពីលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, លោក តាន់ហ៊ាង ដាវ័ណ្ណ រដ្ឋលេខាធិការក្រសួងយុត្តិធម៌ និងជាប្រធានក្រុមការងារបច្ចេកទេសទទួលបន្ទុកសិក្សា​ ស្រាវជ្រាវ​ និងកែសម្រួលសេចក្តីព្រាងច្បាប់ស្តីពីលក្ខន្តិក:សារការី បានអញ្ជើញជាអធិបតីក្នុងសិក្ខាសាលាពិគ្រោះយោបល់លើ «សេចក្តីព្រាងច្បាប់ស្តីពីលក្ខន្តិកៈសារការី»។

ពិធីនេះ​ ក៏មានការអញ្ជើញចូលរួមពីសំណាក់លោក លោកស្រី ជាថ្នាក់ដឹកនាំក្រសួងយុត្តិធម៌ តំណាងសាលាជម្រះក្ដីគ្រប់ជាន់ថ្នាក់ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងរៀបចំដែនដី នគរូបនីយកម្ម និងសំណង់ តំណាងគណៈមេធាវីនៃព្រះរាជាណាចក្រកម្ពុជា តំណាងអគ្គនាយកដ្ឋានពន្ធដារ និងតំណាងស្ថាប័នពាក់ព័ន្ធផ្សេងទៀត ព្រមទាំងមន្រ្តីរាជការនៃក្រសួងយុត្តិធម៌ សរុបប្រមាណ ១៥០រូប។

សិក្ខាសាលានេះ ត្រូវបានរៀបចំទ្បើងក្នុងគោលបំណងសំខាន់ចំនួន២ រួមមាន៖

*ទី១៖ ផ្សព្វផ្សាយ និងបញ្ជ្រាបការយល់ដឹងអំពីខ្លឹមសារនៃសេចក្ដីព្រាងច្បាប់ស្ដីពីលក្ខន្តិកៈសារការី​ ដែលក្រុមការងារនៃក្រសួងយុត្តិធម៌បានបញ្ចប់ការរៀបចំខ្លឹមសាររួចរាល់
*ទី២៖ ប្រមូលមតិយោបល់ និងធាតុចូលសំខាន់ៗបន្ថែមទៀតពីតួអង្គដែលមានការពាក់ព័ន្ធ សំដៅធ្វើយ៉ាងណាឱ្យសេចក្តីព្រាងច្បាប់នេះ​កាន់តែមានភាពគ្រប់ជ្រុងជ្រោយ ប្រាកដនិយម​ និងអាចធានាបាននូវប្រសិទ្ធភាពខ្ពស់ ក្នុងការអនុវត្ត៕