(កំពង់ឆ្នាំង)៖ ព្រះសង្ឃ និងព្រះគ្រូចៅអធិការវត្តតុណ្ឌបព្វតារាម (ហៅវត្តភ្នំចំពុះ) បានអំពាវនាវដល់ប្រជាពុទ្ធបរិស័ទ និងសប្បុរសជននានាជួយឧបត្ថម្ភជាបច្ច័យ ឬជាសម្ភារៈសំណង់ក្តី ដើម្បីកសាងកុដិមួយខ្នងសម្រាប់ឱ្យ ព្រះសង្ឃគង់នៅ ដែលកុដិមួយខ្នងខាងលើនេះកសាងបាន៥០ភាគរយហើយ តែនៅខ្វះខាតថវិកាដើម្បីកសាងបន្តឱ្យរួចរាល់ជាស្ថាពរ។

លោកគ្រូចៅអធិការគង់នៅវត្ត តុណ្ឌបព្វតារាម (ហៅវត្តភ្នំចំពុះ) ខាងលើនេះ ព្រះអង្គបានមានសង្ឃដីកាឲ្យដឹងថា ព្រះសង្ឃ និងគណៈកម្មការអាចារ្យ រួមទាំងពុទ្ធបរិស័ទចំណុះជើងវត្តបានផ្តួចផ្តើមកសាងមហាកុដិ១ខ្នង នៅក្នុងទីអារាមនេះ ដែលមានទំហំបណ្តោយ១៤ម៉ែត្រ ទទឹង៩ម៉ែត្រ និងកម្ពស់១១ម៉ែត្រសម្រាប់ព្រះសង្ឃគង់នៅបានរាប់រយព្រះវស្សា។

ហេតុនេះឆ្លៀតនៅក្នុងឱកាសនេះផងដែរ តាមរយៈបណ្តាញព័ត៌មានរបស់អង្គភាព Fresh News ព្រះអង្គក៏សូមអំពាវនាវដល់ប្រជាពុទ្ធបរិស័ទ និងសប្បុរសជនជិតឆ្ងាយមេត្តាចូលរួមចំណែកចងដៃកុសលផលបុណ្យ ក្នុងការកសាងសម្រាប់ព្រះពុទ្ធសាសនានៃយើង។ ការចូលរួមចំណែកក្នុងការកសាងមហាកុដិដ៏ធំមួយនេះសម្រាប់ជាទីគង់នៅរបស់ព្រះសង្ឃ ក៏ដូចជាការរួមចំណែកកសាងនូវសមិទ្ធផលផ្សេងៗក្នុងវិស័យព្រះពុទ្ធសាសនា គឺទទួលបានអានិសង្សច្រើនណាស់ ហេតុនេះសូមញាតិញោមពុទ្ធបរិស័ទ និងសប្បុរសជនដែលជាពុទ្ធសាសនូបត្ថម្ភមេត្តាចូលរួមចំណែកចងដៃក្នុងការកសាងកុដិខាងលើនេះ ដើម្បីទទួលបាននូវកុសលផលបុណ្យរៀងៗខ្លួនទៅតាមកម្លាំងសទ្ធា។

ព្រះអង្គព្រះចៅអធិការបានមានសង្ឃដីកាឲ្យដឹងទៀតថា ទីអារាមដើរតួនាទីយ៉ាងសំខាន់ក្នុងការថែរក្សាវប្បធម៌ជាតិ និងជំនឿសាសនា។ វត្តអារាមមិនត្រឹមតែជាទីកន្លែងសម្រាប់គោរពបូជា និងប្រតិបត្តិធម៌ប៉ុណ្ណោះទេ ប៉ុន្តែក៏ជាមជ្ឈមណ្ឌលនៃការអប់រំ សិល្បៈស្ថាបត្យកម្ម និងជាទីកន្លែងរក្សាទុកនូវឯកសារប្រវត្តិសាស្ត្រជាច្រើនផងដែរ។ ព្រះសង្ឃដែលគង់នៅតាមវត្តអារាមក៏បានចូលរួមចំណែកយ៉ាងសកម្មក្នុងការបង្រៀនភាសាខ្មែរ អក្សរសាស្ត្រ និងទំនៀមទម្លាប់ប្រពៃណីផ្សេងៗដល់ក្មេងៗជំនាន់ក្រោយ។ លើសពីនេះពិធីបុណ្យប្រពៃណីជាតិជាច្រើនក៏តែងតែប្រារព្ធឡើងនៅតាមវត្តអារាមដែលជួយឲ្យវប្បធម៌ និងទំនៀមទម្លាប់ខ្មែរនៅតែបន្តគង់វង្សជារៀងរហូតឥតសាបសូន្យឡើយ។

សូមបញ្ជាក់ថា៖ វត្តតុណ្ឌបព្វតារាម (ហៅវត្តភ្នំចំពុះ) វត្តនេះក៏ជាវត្តមួយដែលមានប្រវត្តិការកសាងមកជាយូរលង់មកហើយ។ វត្តនេះដែរក៏ជាទីអារាមមួយដែលមានប្រវត្តិល្បីល្បាញផ្នែកប្រវត្តិសាស្ត្រក្នុងខេត្តកំពង់ឆ្នាំងផងដែរ។ ទីអារាមខាងលើនេះស្ថិតនៅក្នុងភូមិគោកបន្ទាយ ឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង។ បើគេធ្វើដំណើរចេញពីក្រុងភ្នំពេញតាមផ្លូវជាតិលេខ៥ហួសផ្សារព្រៃខ្មែរប្រមាណជា ៥០០ម៉ែត្រ នឹងឃើញភ្នំតូចមួយនៅខាងស្តាំដៃ និងមានខ្លោងទ្វារវត្ត តុណ្ឌបព្វតារាម (ហៅវត្តភ្នំចំពុះ) ដែលមានចម្ងាយ១គីឡូម៉ែត្រពីផ្លូវជាតិលេខ៥តែប៉ុណ្ណោះ៕