(តាកែវ)៖ លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំសោម ស្រុកគិរីវង់ នៅថ្ងៃទី៣១ ខែកក្កដា ឆ្នាំ២០២៦ នេះ បានអញ្ជើញជាអធិបតីភាពក្នុងពិធីវេទិកាសាធារណៈមួយ ដែលប្រារព្ធធ្វើឡើងនៅវត្តសោម ឃុំសោម ស្រុកគិរីវង់ ខេត្តតាកែវ។

ថ្លែងក្នុងឱកាសនោះ លោកឧត្តមសេនីយ៍ត្រី សេង មហា បានសង្កត់ធ្ងន់ថា វេទិកាសាធារណៈនេះ គឺជាឱកាសដ៏សំខាន់សម្រាប់ប្រជាពលរដ្ឋក្នុងការលើកឡើងនូវរាល់កង្វល់ បញ្ហាប្រឈម និងសំណូមពរនានា ដើម្បីឱ្យអាជ្ញាធរជួយដោះស្រាយ។ លោកបានណែនាំដល់អាជ្ញាធរគ្រប់លំដាប់ថ្នាក់ និងក្រុមការងារ ត្រូវស្តាប់ និងទទួលយកនូវរាល់មតិយោបល់ទាំងនោះ ដោយស្មារតីទទួលខុសត្រូវខ្ពស់ ដើម្បីរួមគ្នាដោះស្រាយជូនប្រជាពលរដ្ឋឱ្យបានទាន់ពេលវេលា និងមានប្រសិទ្ធភាព។

លោកមេបញ្ជាការបានបន្តថា ទុក្ខកង្វល់របស់បងប្អូនប្រជាពលរដ្ឋ គឺជាទុក្ខកង្វល់របស់អាជ្ញាធរ ហើយក្នុងនាមជាអ្នកបម្រើសេវាសាធារណៈ អាជ្ញាធរនឹងព្យាយាមអស់ពីលទ្ធភាពក្នុងការស្វែងរកដំណោះស្រាយជូនប្រជាពលរដ្ឋ។
ជាមួយគ្នានេះ លោកក៏បានអំពាវនាវដល់ប្រជាពលរដ្ឋ និងយុវជនទាំងអស់ ត្រូវរួមគ្នាថែរក្សាសន្តិសុខ សណ្តាប់ធ្នាប់សាធារណៈក្នុងសង្គម ជៀសឱ្យឆ្ងាយពីគ្រឿងញៀន និងចូលរួមថែរក្សាសមិទ្ធផលនានាក្នុងសហគមន៍ឱ្យបានគង់វង្សយូរអង្វែង។ វេទិកាសាធារណៈនេះបានឆ្លុះបញ្ចាំងពីការយកចិត្តទុកដាក់របស់អាជ្ញាធរក្នុងការកៀរគរការចូលរួមពីប្រជាពលរដ្ឋ ដើម្បីកសាងសហគមន៍ឱ្យកាន់តែរីកចម្រើន៕