(ព្រះវិហារ)៖ លោកឧត្តមសេនីយ៍ទោ សួស សុខដារ៉ា ស្នងការ នៃស្នងការដ្ឋាននគរបាលខេត្តព្រះវិហារ ជាអនុប្រធានប្រចាំការ និងជាប្រធានលេខាធិការដ្ឋានសមាគមអតីតយុទ្ធជន និងនិវត្តជនកម្ពុជាខេត្តព្រះវិហារ តំណាងលោក គីម រិទ្ធី អភិបាលខេត្តព្រះវិហារ និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្ត នៅព្រឹកថ្ងៃទី៣១ ខែកក្កដា ឆ្នាំ២០២៦ បានអញ្ជើញប្រគល់ថវិកាបេឡាមរណសង្គ្រោះ និងលិខិតចូលរួមរំលែកមរណទុក្ខរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងនិវត្តជនកម្ពុជា ជូនដល់គ្រួសារសពសមាជិកសមាគមអតីតយុទ្ធជន និងនិវត្តជនកម្ពុជា ចំនួន១០គ្រួសារ នៅសាលាស្រុកគូលែន ខេត្តព្រះវិហារ។

នៅក្នុងពិធីនោះ លោកឧត្តមសេនីយ៍ទោ សួស សុខដារ៉ា បានថ្លែងពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹកពីសំណាក់លោក គីម រិទ្ធី និងលោកនាយឧត្តមសេនីយ៍ គន់ គីម ពិសេសសម្តេចតេជោ ហ៊ុន សែន ជូនចំពោះក្រុមគ្រួសារសពទាំងអស់ ដោយបានសម្តែងនូវការសោកស្តាយយ៉ាងជ្រាលជ្រៅចំពោះការបាត់បង់សមាជិកជាទីស្រឡាញ់ និងបានលើកទឹកចិត្តឱ្យក្រុមគ្រួសារបន្តរស់នៅដោយភាពរឹងមាំ ដើម្បីជម្នះរាល់ការលំបាកក្នុងជីវភាពរស់នៅ។

លោកឧត្តមសេនីយ៍ទោ បានថ្លែងបញ្ជាក់ថា ការផ្តល់ថវិកាបេឡាមរណសង្គ្រោះ និងលិខិតរំលែកមរណទុក្ខនាពេលនេះ គឺជាការយកចិត្តទុកដាក់ និងការមិនបោះបង់ចោលសមាជិក និងក្រុមគ្រួសាររបស់សមាគមអតីតយុទ្ធជន និងនិវត្តជនកម្ពុជា ដែលតែងតែឈរលើស្មារតីសាមគ្គីភាព មនុស្សធម៌ និងការចែករំលែកទុក្ខលំបាកជាមួយគ្នា។

លោកឧត្តមសេនីយ៍ទោ សួស សុខដារ៉ា ក៏បានថ្លែងអំពាវនាវឱ្យសមាជិកសមាគម និងអាជ្ញាធរមូលដ្ឋាន បន្តយកចិត្តទុកដាក់ចំពោះសុខទុក្ខរបស់អតីតយុទ្ធជន និវត្តជន និងគ្រួសាររបស់ពួកគាត់ ដើម្បីធានាថា សមាជិកគ្រប់រូបទទួលបានការគាំទ្រ និងការថែទាំស្របតាមគោលការណ៍របស់សមាគម។

សូមជម្រាបថា ថវិកាបេឡាមរណសង្គ្រោះដែលត្រូវបានប្រគល់ជូនគ្រួសារសពទាំង១០គ្រួសារ នៅស្រុកគូលែន នាពេលនេះ គឺជាសកម្មភាពមនុស្សធម៌មួយរបស់សមាគមអតីតយុទ្ធជន និងនិវត្តជនកម្ពុជា ក្នុងគោលបំណងចូលរួមរំលែកទុក្ខ សម្រាលបន្ទុកជីវភាព និងបង្ហាញពីការយកចិត្តទុកដាក់ជាប្រចាំចំពោះសមាជិក និងក្រុមគ្រួសាររបស់ពួកគាត់៕