(សៀមរាប)៖ លោកសាស្ត្រាចារ្យជំនួយ ប៉ូច សុភារ័ត្ន ប្រធានក្រុមប្រឹក្សាគណ:ទន្តពេទ្យជាតិ នៅរសៀលថ្ងៃទី៣១ ខែកក្កដា ឆ្នាំ២០២៦ បានអញ្ជើញដឹកនាំកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅផែនការសកម្មភាពបន្ត របស់ គណៈទន្តពេទ្យកម្ពុជា នៅសណ្ឋាគារ អេមព្រីសអង្គររីសត ខេត្តសៀមរាប ។

ក្នុងកិច្ចប្រជុំនោះ លោកសាស្ត្រាចារ្យ ប៉ូច សុភារ័ត្ន ប្រធានក្រុមប្រឹក្សាគណ:ទន្តពេទ្យជាតិ បានវាយតម្លៃខ្ពស់ចំពោះកិច្ចខិតខំប្រឹងប្រែង និងសមិទ្ធផលទាំងឡាយដែលសម្រេចបានកន្លងមក ដែលនេះស្តែងឱ្យឃើញពីស្មារតីទទួលខុសត្រូវខ្ពស់របស់សមាជិក សមាជិកាទាំងអស់ ក្នុងការលើកកម្ពស់គុណភាព ក្រមសីលធម៌វិជ្ជាជីវៈ និងស្តង់ដារនៃការប្រត្តិបត្តិក្នុងវិស័យទន្តសាស្ត្រនៅកម្ពុជា។

ជាមួយគ្នានោះ ជាទិសដៅបន្តដើម្បីលើកកម្ពស់កិត្តិយស សេចក្តីថ្លៃថ្នូរ និងសមត្ថភាពរបស់សហភាតរៈទន្តពេទ្យ លោកសាស្ត្រាចារ្យ ប៉ូច សុភារ័ត្ន បានដាក់ចេញនូវទិសដៅ ផែនការសកម្មភាពគន្លឹះចំនួន ៥ ដើម្បីអនុវត្តបន្ត៖

*ទី១ ៖ ពង្រឹងការចុះបញ្ជិកា ការស្នើសុំអាជ្ញាបណ្ណ និងការស្នើសុំបន្តអាជ្ញាបណ្ណអាជ្ញាបណ្ណវិជ្ជាជីវៈ គឺជាខែលការពារផ្លូវច្បាប់និងជាការបញ្ជាក់ពីភាពស្របច្បាប់របស់ទន្តពេទ្យគ្រប់រូប។

*ទី២ ៖ បណ្តុះស្មារតីគោរពក្រមសីលធម៌វិជ្ជាជីវៈ និងលិខិតបទដ្ឋានគតិយុត្ត «ចំណេះដឹង និងជំនាញ ត្រូវតែដើរទន្ទឹមនឹងសីលធម៌»។

*ទី៣ ៖ ជំរុញការអភិវឌ្ឍវិជ្ជាជីវៈបន្ត (CPD - Continuing Professional Development) វិទ្យាសាស្ត្រ និងបច្ចេកវិទ្យាផ្នែកទន្តសាស្ត្រមានការប្រែប្រួល និងរីកចម្រើនយ៉ាងរហ័សពីមួយថ្ងៃទៅមួយថ្ងៃ។

*ទី៤ ៖ ពង្រឹងការអនុវត្តប្រកាសស្តីពីការផ្សព្វផ្សាយ ក្នុងក្របខណ្ឌវិជ្ជាជីវៈសុខាភិបាលការផ្សព្វផ្សាយព័ត៌មាន ឬសេវាកម្មទន្តសាស្ត្រ ត្រូវតែធ្វើឡើងប្រកបដោយការទទួលខុសត្រូវខ្ពស់ និងស្របតាមច្បាប់ជាធរមាន។

*ទី៥ ៖ ពង្រឹងកិច្ចសហប្រតិបត្តិការ និងគុណភាព CPD ជាមួយដៃគូផ្តល់ការអភិវឌ្ឍវិជ្ជាជីវៈបន្តនានា ការលើកកម្ពស់សមត្ថភាពរបស់ទន្តពេទ្យយើង គឺទាមទារឱ្យមានការចូលរួមពីគ្រប់ភាគីពាក់ព័ន្ធ។