(ភ្នំពេញ)៖ ក្រុមប្រឹក្សាគណៈគិលានុបដ្ឋាកជាតិ បានចេញសេចក្តីសម្រេច ស្តីពីការដកហូតអាជ្ញាបណ្ណប្រកបវិជ្ជាជីវៈគិលានុបដ្ឋាក និងផ្អាកមិនអនុញ្ញាត ឱ្យប្រកបវិជ្ជាជីវៈគិលានុបដ្ឋាក រយៈពេលចំនួន៣ឆ្នាំ ចំពោះឈ្មោះ ចំរើន កិរិយា ដែលជាសមាជិកគណៈគិលានុបដ្ឋាកកម្ពុជា។

យោងតាមសេចក្តីសម្រេចនេះ លោកស្រី ចំរើន កិរិយា កាន់សញ្ញាបត្របរិញ្ញាបត្ររងគិលានុបដ្ឋាក និងអាជ្ញាបណ្ណលេខ CCN-LP-030795 មានសុពលភាពចាប់ពីថ្ងៃទី៦ ខែឧសភា ឆ្នាំ២០២៥ រហូតដល់ថ្ងៃទី០៦ ខែឧសភា ឆ្នាំ២០២៨។ ត្រូវបានហាមឃាត់ប្រកបវិជ្ជាជីវៈជាគិលានុបដ្ឋាក រយៈពេល៣ឆ្នាំ ដោយគិតចាប់ពីថ្ងៃទី៣០ ខែកក្កដា ឆ្នាំ២០២៦ តទៅ។

មូលហេតុនៃការសម្រេចនេះ គឺដោយសារលោកស្រី បានអនុញ្ញាតឱ្យលោក គាត គឹមស៊្រុន ដែលជាពូ និងមិនមានលក្ខណៈសម្បត្តិវិជ្ជាជីវៈគ្រប់គ្រាន់ ប្រើប្រាស់សញ្ញាបត្រ និងអាជ្ញាបណ្ណរបស់ខ្លួន ក្នុងការប្រកបវិជ្ជាជីវៈ។

លោក គាត គឹមស៊្រុន បានប្រកបវិជ្ជាជីវៈហួសពីដែនកំណត់ នៃការអនុវត្តវិជ្ជាជីវៈគិលានុបដ្ឋាក ដោយបានទទួល និងថែទាំអ្នកជំងឺគ្រុនឈាម នៅបន្ទប់ថែទាំជំងឺឯកជន ដែលមិនស្របតាមលិខិតបទដ្ឋាន និងគោលការណ៍ណែនាំរបស់ក្រសួងសុខាភិបាល។

សូមរំលឹកថា បន្ទប់ថែទាំជំងឺមួយកន្លែង នៅស្រុកកោះសូទិន ខេត្តកំពង់ចាម ត្រូវបានអាជ្ញាធរចេញលិខិតបិទទ្វារ បន្ទាប់ពីមានករណីក្មេងស្រីម្នាក់ស្លាប់ ពេលចូលទៅសម្រាកព្យាបាល ខណៈម្ចាស់ទីតាំងនេះ ត្រូវបានគេដឹងថា មានជំនាញពេទ្យសត្វ។

លិខិតរបស់រដ្ឋបាលស្រុកកោះសូទិន នៅថ្ងៃទី២៧ ខែកក្កដា ឆ្នាំ២០២៦នេះ បានបញ្ជាក់ថា បន្ទប់ថែទាំជំងឺឈ្មោះ ចំរើន កិរិយា ត្រូវសម្រេចបិទដោយសារ តែផ្ដល់សេវាលើសពីដែនច្បាប់បានកំណត់។

បើតាមសេចក្ដីរាយការណ៍ ម្ចាស់ទីតាំងនេះ បានទទួលព្យាបាលក្មេងស្រីម្នាក់អាយុ១១ឆ្នាំ ដែលមានជំងឺគ្រុនឈាម រហូតការព្យាបាលមិនជា និងបានបណ្ដាលឲ្យក្មេងស្រីនោះស្លាប់ ពេលបញ្ជូនទៅកាន់មន្ទីរពេទ្យបង្អែកស្រុក៕