(កំពង់ធំ)៖ ដើម្បីចូលរួមថែរក្សា និងទ្រទ្រង់វិស័យព្រះពុទ្ធសាសនាដែលជាសាសនារបស់រដ្ឋ នារសៀលថ្ងៃទី៣១ ខែកក្កដា ឆ្នាំ២០២៦នេះ លោក ហាក់ ម៉ុងហួត អភិបាលស្រុកតាំងគោក ព្រមទាំងក្រុមគ្រួសារលោក លី គីមឆេង បាននាំយកទៀនព្រះវស្សា ទេយ្យទាន ព្រមទាំងបច្ច័យប្រគេនដល់ព្រះសង្ឃដែលកំពុងគង់ចាំព្រះវស្សាក្នុងវត្តចំនួន ៣ ក្នុងស្រុកតាំងគោក ខេត្តកំពង់ធំ។

ពិធីប្រគេនទៀនវស្សានេះ បានប្រព្រឹត្តទៅដោយមានការអញ្ជើញចូលរួមពីសំណាក់អាជ្ញាធរដែនដី មន្ត្រីរាជការ និងពុទ្ធបរិស័ទចំណុះជើងវត្តផងដែរ។

ក្នុងឱកាសនោះ លោក ហាក់ ម៉ុងហួត និងក្រុមគ្រួសារលោក លី គីមឆេង បានវេរប្រគេននូវ ទៀនព្រះវស្សា សម្រាប់អុជបូជាថ្វាយព្រះរតនត្រ័យពេញមួយត្រីមាស និង
គ្រឿងឧបភោគបរិភោគរួមាន៖ អង្ករ, ទឹកបរិសុទ្ធ, មី, ភេសជ្ជៈ និងបច្ច័យ៤ សម្រាប់ចាត់ចែងកសាង និងទ្រទ្រង់ការគង់ចាំវស្សារបស់ព្រះសង្ឃទាំង៣វត្តផងដែរ។

លោកអភិបាលស្រុក ហាក់ ម៉ុងហួត ក៏បានសម្តែងនូវក្តីសោមនស្សរីករាយ និងបានថ្លែងអំណរគុណយ៉ាងជ្រាលជ្រៅចំពោះក្រុមគ្រួសារ លោក លី គីមឆេង ដែលបានបូជាទាំងកម្លាំងកាយ ចិត្ត និងទ្រព្យធន ក្នុងការចូលរួមចំណែកទ្រទ្រង់ព្រះពុទ្ធសាសនា ដែលជាសាសនារបស់រដ្ឋ។

លោកបានបន្ថែមថា ការវេរប្រគេនទាននាពេលនេះ មិនត្រឹមតែជាការសាងកុសលផលបុណ្យតាមបែបព្រះពុទ្ធសាសនាប៉ុណ្ណោះទេ ប៉ុន្តែថែមទាំងបានបង្ហាញពីកម្លាំងសាមគ្គីភាពយ៉ាងរឹងមាំរវាងអាជ្ញាធរ អាជីវករ សប្បុរសជន និងប្រជាពុទ្ធបរិស័ទនៅក្នុងមូលដ្ឋានផងដែរ។

ជាមួយគ្នានេះដែរ ព្រះចៅអធិការ និងព្រះសង្ឃគ្រប់ព្រះអង្គដែលគង់ចាំព្រះវស្សានៅក្នុងវត្តទាំង ៣ បានសម្តែងនូវព្រះរាជហឫទ័យរីករាយ និងបានប្រកាសអនុមោទនាយកនូវកុសលផលបុណ្យ ព្រមទាំងបានប្រសិទ្ធពរជ័យ សិរីមង្គល វិបុលសុខ ជូនដល់លោកអភិបាលស្រុក ហាក់ ម៉ុងហួត និងក្រុមគ្រួសារ និងលោក លី គីមឆេង និងក្រុមការងារទាំងអស់ ឲ្យជួបប្រទះតែពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូមបញ្ជាក់ដែរថា តាមទំនៀមទំលាប់ជាប្រពៃណីនៃព្រះពុទ្ធសាសនា ព្រះសង្ឃទាំងឡាយគ្រប់អារាម ក្នុងព្រះរាជាណាចក្រកម្ពុជា ត្រូវនិមន្តចូលកាន់ព្រះវស្សា អស់ថេរវេលា ៣ខែ ចាប់ពីថ្ងៃ១រោច ខែអាសាឍ តទៅ។ ពាក្យថា (វស្សា) ប្រែថា (ភ្លៀង ឬរដូវភ្លៀង) ដែលមានកំណត់រយៈពេល៣ខែ រាប់ពីថ្ងៃ ១រោច ខែអាសាឍ ដល់ថ្ងៃ១៥កើត ខែកត្តិក។

ក្នុងរយៈពេល ៣ខែនេះ នៅគ្រប់ព្រះវិហារទាំងឡាយ តែងរក្សាភ្លើងទៀនព្រះវស្សាធ្វើពីក្រមួនឲ្យឆេះជានិច្ច តែបច្ចុប្បន្ននេះដោយសាក្រមួនពុំសូវសំបូរគេនិយមគេប្រើប្រេងជំនួសវិញ។ ជួនកាលមានព្រះសង្ឃខ្លះ ពុំបានចូលព្រះវស្សា តាមកំណត់កាលវេលា ៣ខែ ដោយមានធុរៈអ្វីមួយ ឬដោយរោគាពាធិនោះ លោកអាចចូលបច្ឆិមិកវស្សាបាន គឺលោកចូលនៅថ្ងៃ១រោជ ខែស្រាពហើយត្រូវគិតវស្សាឲ្យគ្រប់៣ខែ ដូចព្រះសង្ឃ ដែលចូលមុនគឺត្រូវចេញវិញ នៅថ្ងៃ១រោជ ខែកត្តិក៕