(ភ្នំពេញ)៖ គរុសិស្សមត្តេយ្យសិក្សាជំនាន់ទី៣៥ ចំនួន ២១៩នាក់ បានបញ្ចប់វគ្គបណ្តុះបណ្តាលគ្រូបង្រៀនសម្រាប់មត្តេយ្យសិក្សា តាមប្រព័ន្ធបណ្តុះបណ្តាល ១២+២ របស់ក្រសួងអប់រំ យុវជន និងកីឡា ដែលបានរួមបញ្ចូលទាំងចំណេះដឹងទ្រឹស្តី ជំនាញវិជ្ជាជីវៈ ការអនុវត្តការបង្រៀន និងការអភិវឌ្ឍសមត្ថភាព វិជ្ជាជីវៈ និងការបណ្តុះស្មារតីទទួលខុសត្រូវ ក្រមសីលធម៌វិជ្ជាជីវៈ ភាពអត់ធ្មត់ ការយកចិត្តទុកដាក់ និងសេចក្តីស្រឡាញ់ចំពោះកុមារ ដែលជាមូលដ្ឋានសំខាន់បំផុតសម្រាប់វិជ្ជាជីវៈជាគ្រូមត្តេយ្យសិក្សា។

ពិធីបិទវគ្គបណ្តុះបណ្តាលគ្រូបង្រៀនសម្រាប់មត្តេយ្យសិក្សាតាមប្រព័ន្ធបណ្តុះបណ្តាល ១២+២ របស់ក្រសួងអប់រំ នេះ បានធ្វើឡើងក្រោមអធិបតីភាពលោក ពឹង គិមឆេន អនុរដ្ឋលេខាធិការក្រសួងអប់រំ យុវជន និងកីឡា និងជាតំណាងលោកបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា មានការចូលរួមពីលោក ប៉ាត់ គឹមនីន នាយកសាលាមធ្យមសិក្សាគរុកោសល្យមត្តេយ្យមជ្ឈិម និងមានថ្នាក់ដឹកនាំ និង គរុសិស្សមត្តេយ្យសិក្សាជំនាន់ទី៣៥ ជាច្រើននាក់ទៀត។

បើតាមលោក ប៉ាត់ គឹមនីន បានបញ្ជាក់ឱ្យដឹងថា ក្នុងឆ្នាំសិក្សា២០២៤-២០២៦ សាលាមធ្យមសិក្សាគរុកោសល្យមត្តេយ្យមជ្ឈិម បានអនុវត្តតាមកម្មវិធីបណ្តុះបណ្តាល និងប្រតិទិននៃវគ្គបណ្តុះបណ្តាលគ្រូបង្រៀនសម្រាប់បង្រៀននៅមត្តេយ្យសិក្សា តាមប្រព័ន្ធបណ្តុះបណ្តាល ១២+២ របស់ក្រសួងអប់រំ យុវជន និងកីឡា រយៈពេល ២ឆ្នាំ។ ដំណើរការបណ្តុះបណ្តាលឆ្នាំទី១ ចាប់ពីថ្ងៃទី៣០ ខែកញ្ញា ឆ្នាំ២០២៤ ដល់ថ្ងៃទី៣១ ខែកក្កដា ឆ្នាំ២០២៥ ឆ្នាំទី២ ចាប់ពីថ្ងៃទី១ ខែកញ្ញា ឆ្នាំ២០២៥ ដល់ថ្ងៃទី២៥ ខែកក្កដា ឆ្នាំ២០២៦។ ជាលទ្ធផលគរុសិស្សមត្តេយ្យសិក្សាជំនាន់ទី៣៥ ទាំងអស់បានទទួលបានលទ្ធផលជោគជ័យគ្រប់ៗគ្នា។

នាឱកាសនោះដែរលោក ពឹង គិមឆេន ក្នុងនាមថ្នាក់ដឹកនាំក្រសួងអប់រំ យុវជន និងកីឡា បានសម្តែងនូវការអបអរសាទរយ៉ាងស្មោះស្ម័គ្រចំពោះគរុសិស្សទាំងអស់ ដែលបានខិតខំប្រឹងប្រែងរៀនសូត្រ ហ្វឹកហាត់ និងបំពេញគ្រប់ លក្ខខណ្ឌនៃកម្មវិធីបណ្តុះបណ្តាលដោយជោគជ័យ។ ការបណ្តុះបណ្តាលនេះមិនត្រឹមតែផ្តល់នូវចំណេះដឹងប៉ុណ្ណោះទេ ប៉ុន្តែថែមទាំងបានបណ្តុះស្មារតីទទួល ខុសត្រូវ ក្រមសីលធម៌វិជ្ជាជីវៈ ភាពអត់ធ្មត់ ការយកចិត្តទុកដាក់ និងសេចក្តីស្រឡាញ់ចំពោះកុមារ ដែលជាមូលដ្ឋានសំខាន់ បំផុតសម្រាប់វិជ្ជាជីវៈជាគ្រូមត្តេយ្យសិក្សា។

លោក ពឹង គិមឆេន បានបន្ថែមថា ការអប់រំកុមារតូច គឺជាមូលដ្ឋានគ្រឹះនៃការអភិវឌ្ឍធនធានមនុស្ស។ គ្រូមត្តេយ្យសិក្សាមានតួនាទីសំខាន់ក្នុងការជួយឱ្យកុមារអភិវឌ្ឍផ្នែកសុខភាព និងរាងកាយ សីលធម៌និ ងវប្បធម៌ សង្គមនិងអារម្មណ៍ បញ្ញានិងការគិត និងអភិវឌ្ឍផ្នែកភាសា។ គ្រូមត្តេយ្យសិក្សាម្នាក់ៗ គឺជាអ្នកបង្កើតបទពិសោធន៍ដំបូងនៃការរៀនសូត្រសម្រាប់កុមារ ដែលនឹងមានឥទ្ធិពលរយៈពេល វែងដល់ការលូតលាស់ និងការសិក្សារបស់ពួកគេដើម្បីត្រៀមខ្លួនរួចជាស្រេចចូលរៀនថ្នាក់ទី១ នៅបឋមសិក្សាប្រកបដោយ ជោគជ័យ។

បន្ថែមពីនេះលោក ពឹង គិមឆេន បានបញ្ជាក់ដែរថា​ សិស្សមត្តេយ្យ​សិក្សា ចំណេះជំនាញសំខាន់​ គឺការច្រៀង​ និងរាំ​ ដេីម្បីឱ្យទទួលបានការអប់រំកាយ​ និងកីឡា និងការលូតលាស់នៃបញ្ហាស្មារតីបានល្អ ដោយលោកក៏បានស្នើឱ្យមានការផ្លាស់ប្តូរនូវទស្សនៈរបស់អាណាព្យាបាលមួយចំនួនដែលយល់ថា ការឱ្យកូនចូលរៀនថ្នាក់មត្តេយ្យសិក្សា គ្មានបានចេះអ្វីក្រៅពីច្រៀង និងរាំ៕