(ព្រះវិហារ)៖ អនុវត្តតាមការណែនាំរបស់លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ នៅរសៀលថ្ងៃទី៣១ ខែកក្កដា ឆ្នាំ២០២៦នេះ ក្រុមការងារប្រយុទ្ធនឹងជំងឺគ្រុនឈាម នៃមន្ទីរសុខាភិបាលខេត្តព្រះវិហារ បន្តចុះអនុវត្តយុទ្ធនាការបាញ់ថ្នាំសម្លាប់មូស ដែលជាភ្នាក់ងារចម្លងជំងឺគ្រុនឈាម នៅពន្ធនាគារខេត្តព្រះវិហារ ទីទួលសុវត្ថិភាពវត្តគីរីទួលអណ្តែត និងទីទួលសុវត្ថិភាពវត្តបាក់កាំ ដើម្បីទប់ស្កាត់ការរីករាលដាលនៃជំងឺគ្រុនឈាម និងការពារសុខភាពប្រជាពលរដ្ឋ។

សកម្មភាពនេះ គឺជាផ្នែកមួយនៃវិធានការឆ្លើយតបបន្ទាន់របស់មន្ទីរសុខាភិបាលខេត្តព្រះវិហារ ក្នុងការកាត់បន្ថយចំនួនមូសខ្លា និងកាត់ផ្តាច់ខ្សែចម្លងជំងឺគ្រុនឈាម នៅតាមទីតាំងដែលមានការប្រមូលផ្តុំមនុស្សច្រើន និងតំបន់ដែលមានហានិភ័យខ្ពស់។

លោកវេជ្ជបណ្ឌិត គួង ឡូ បានថ្លែងអំពាវនាវដល់ប្រជាពលរដ្ឋទាំងអស់ បន្តចូលរួមអនុវត្តវិធានការបង្ការជំងឺគ្រុនឈាម ដោយសម្អាតបរិស្ថានជាប្រចាំ លុបបំបាត់វត្ថុដក់ទឹកនៅជុំវិញផ្ទះ គ្របធុងទឹកឱ្យបានជិត ប្តូរទឹកក្នុងថូផ្កា និងលុបបំបាត់សំបកកង់ កំប៉ុង ឬវត្ថុផ្សេងៗដែលអាចដក់ទឹកបាន ដើម្បីបំបាត់ប្រភពកំណើតមូសខ្លា។

លោកវេជ្ជបណ្ឌិត បានថ្លែងបញ្ជាក់ថា ការបាញ់ថ្នាំសម្លាប់មូស គឺជាវិធានការបន្ទាន់មួយក្នុងការកាត់បន្ថយមូស ប៉ុន្តែការចូលរួមពីប្រជាពលរដ្ឋក្នុងការលុបបំបាត់ប្រភពកំណើតមូសខ្លា និងថែរក្សាបរិស្ថានស្អាត ទើបជាវិធានការមានប្រសិទ្ធភាព និងនិរន្តរភាពបំផុត ដើម្បីទប់ស្កាត់ការរីករាលដាលនៃជំងឺគ្រុនឈាម។

ជាមួយគ្នានេះ លោកប្រធានមន្ទីរសុខាភិបាលខេត្តព្រះវិហារ ក៏បានថ្លែងអំពាវនាវឱ្យប្រជាពលរដ្ឋ បើមានអាការៈក្តៅខ្លួនខ្លាំងរយៈពេល២ទៅ៣ថ្ងៃ ឈឺក្បាល ឈឺសាច់ដុំ ឬមានរោគសញ្ញាសង្ស័យជំងឺគ្រុនឈាម សូមប្រញាប់ទៅពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតបំផុត និងកុំទិញថ្នាំលេបដោយខ្លួនឯង៕