(ភ្នំពេញ)៖ នៅថ្ងៃសុក្រ ទី៣១ ខែកក្កដា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌដង្កោ ដឹកនាំដោយលោកស្រី គឹម ញឹប អភិបាល នៃគណៈអភិបាលខណ្ឌដង្កោ និងជាប្រធានគណៈបញ្ជាការឯកភាពរដ្ឋបាលខណ្ឌដង្កោ បន្តចុះត្រួតពិនិត្យរដ្ឋបាលជនបរទេសស្នាក់នៅតាម បុរីច័ន្ទគិរី, បុរីពិភពថ្មីកួរស្រូវ១, បុរីពិភពថ្មីកួរស្រូវ២, បុរីពិភពថ្មីកួរស្រូវ៣, បុរីជីប ម៉ុង ៥០ម៉ែត្រ និងបុរីប៉េង អ៊ីម ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅក្នុងភូមិសាស្ត្រខណ្ឌដង្កោ។

ជាលទ្ធផល ទីតាំងទាំងអស់នេះពុំមានលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នោះទេ។

ជាមួយគ្នានេះ រដ្ឋបាលខណ្ឌដង្កោ ក៏បានចេញសេចក្តីបំភ្លឺព័ត៌មាន ដល់បងប្អូនប្រជាពលរដ្ឋ សាធារណជន និងអ្នកសារព័ត៌មានទាំងអស់ជ្រាប ដូចខាងក្រោមនេះ៖

ថ្មីៗនេះ រដ្ឋបាលខណ្ឌដង្កោ បានឃើញការបង្ហោះផ្សាយនូវព័ត៌មានលើទំព័រហ្វេសប៊ុកឈ្មោះ Taing Sarada ដែលមានខ្លឹមសារ៖ «ប្រភពពីពលរដ្ឋឱ្យដឹងថា សមត្ថកិច្ចខណ្ឌដង្កោកំពុងលាក់ពួន scammers នៅតាមបុរីជាច្រើន»។

រដ្ឋបាលខណ្ឌដង្កោ សូមជម្រាបជូនបងប្អូនប្រជាពលរដ្ឋ សាធារណជន និងអ្នកសារព័ត៌មានទាំងអស់ជ្រាបថា៖ រដ្ឋបាលខណ្ឌបានចុះផ្សព្វផ្សាយអនុក្រឹត្យលេខ០៣ អនក្រ.បក ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅ ប្រមូលផ្តុំ ជូនដល់ម្ចាស់ទីតាំងបុរី ផ្ទះល្វែង ឃ្លាំង ផ្ទះសំណាក់ សណ្ឋាគារ ក្រុមហ៊ុន រោងចក្រ សហគ្រាស និង អាជីវកម្មដ្ឋាននានា ព្រមទាំងបានចុះត្រួតពិនិត្យរដ្ឋបាលនៅតាមទីតាំងមានជនបរទេសស្នាក់នៅ រួមមាន៖ លំនៅឋាន និង បុរីនានា ក្នុងគោលដៅធ្វើការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងភូមិសាស្ត្រខណ្ឌ ជាប់ជាប្រចាំ ជាច្រើនលើក ច្រើនសារ និងមិនដែលធ្វេសប្រហែសឡើយ តែមិនបានរកឃើញនូវ បទល្មើសអ្វី ដូចការចោទប្រកាន់ខាងលើនោះឡើយ។

រដ្ឋបាលខណ្ឌ មិនអាចទទួលយកការចោទប្រកាន់ដោយគ្មានមូលដ្ឋានពិតប្រាកដ និងគ្មានភស្តុតាងណាមួយ តាមរយៈការបង្ហោះរបស់ហ្វេសប៊ុកខាងលើនេះទេ។

ជាមួយគ្នានេះដែរ រដ្ឋបាលខណ្ឌដង្កោ សូមលើកទឹកចិត្តដល់បងប្អូនប្រជាពលរដ្ឋ និងសាធារណជនទាំងអស់ ចូលរួមសហការផ្តល់ព័ត៌មានអំពីទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) មកកាន់ អាជ្ញាធរមានសមត្ថកិច្ចនៅជិតបំផុត ឬតាមរយៈលេខទូរស័ព្ទ៖ ០៨៩ ៩៧៨ ៨៨៨, ០១២ ៧២៧ ៣៥៨ និង០១១ ៦៣៣ ១៦៨ ឬតាមរយៈផេកហ្វេសប៊ុកផ្លូវការ (https://www.facebook.com/share/177X2xaNbi/) ដើម្បីកម្លាំងគណៈបញ្ជាការ ឯកភាពរដ្ឋបាលខណ្ឌចុះបង្ក្រាបបទល្មើសបានទាន់ពេលវេលា ដោយរដ្ឋបាលខណ្ឌនឹងរក្សាការសម្ងាត់ជូន។

អាស្រ័យហេតុនេះ សូមបងប្អូនប្រជាពលរដ្ឋ សាធារណជន និងអ្នកសារព័ត៌មានទាំងអស់ជ្រាប និងកុំមានការភាន់ច្រឡំ៕