(សៀមរាប)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៣០ ខែកក្កដា ឆ្នាំ២០២៦ បានអញ្ជើញជាអធិបតីក្នុងពិធីដាក់ឱ្យដំណើរការជាផ្លូវការនូវសេវាកម្មកម្សាន្តទេសចរណ៍ពេលរាត្រីរបស់សហគមន៍ទេសចរណ៍បាគងភូមិខ្ញុំ ក្នុងគោលបំណងជំរុញសក្តានុពលទេសចរណ៍នៅតំបន់ប្រាសាទបាគង តាមរយៈការតភ្ជាប់ការទស្សនាប្រាសាទ និងទេសភាពជនបទ ដើម្បីទាក់ទាញភ្ញៀវទេសចរជាតិ និងអន្តរជាតិ មកកម្សាន្តឱ្យបានកាន់តែច្រើន និងពន្យាររយៈពេលស្នាក់នៅក្នុងខេត្តសៀមរាប។

ក្នុងពិធីដ៏អធិកអធមនេះ មានការអញ្ជើញចូលរួមពីថ្នាក់ដឹកនាំក្រសួងទេសចរណ៍ លោក ង៉ូវ សេងកាក់ អភិបាលរងនៃគណៈអភិបាលខេត្តសៀមរាប លោក លោកស្រី តំណាងមន្ទីរទេសចរណ៍រាជធានី-ខេត្ត លោកអភិបាលស្រុកប្រាសាទបាគង លោក លោកស្រី មេឃុំ លោកប្រធានសហគមន៍ទេសចរណ៍បាគងភូមិខ្ញុំ និងអ៊ំ ពូ មីង បងប្អូនសមាជិក សមាជិកាសហគមន៍ទេសចរណ៍បាគងភូមិខ្ញុំ សរុបប្រមាណ ៣០០នាក់។

ថ្លែងក្នុងពិធីនេះ លោករដ្ឋមន្ត្រី បានសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំខេត្តសៀមរាប អាជ្ញាធរស្រុកប្រាសាទបាគង អាជ្ញាធរពាក់ព័ន្ធទាំងអស់ លោកប្រធានសហគមន៍ គណៈគ្រប់គ្រងសហគមន៍ និងប្រជាពលរដ្ឋក្នុងមូលដ្ឋាន ដែលបានរួមសហការគ្នាយ៉ាងសកម្ម រហូតធ្វើឱ្យគម្រោងទេសចរណ៍ពេលរាត្រីក្នុងសហគមន៍នេះលេចចេញជារូបរាង និងក្លាយជាសេវាកម្មទេសចរណ៍ថ្មីមួយរបស់សហគមន៍។

ទន្ទឹមនឹងនេះ រដ្ឋមន្ត្រី ហួត ហាក់ បានជម្រាបជូនថា រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកំណត់វិស័យទេសចរណ៍ជាវិស័យអាទិភាពមួយ ដែលចាត់ទុកថាជា «មាសបៃតង» សម្រាប់ជំរុញកំណើនសេដ្ឋកិច្ច បង្កើតការងារ បង្កើនប្រាក់ចំណូលជូនប្រជាពលរដ្ឋ និងលើកកម្ពស់កិត្យានុភាពកម្ពុជាលើឆាកអន្តរជាតិ។ ជាពិសេស រាជរដ្ឋាភិបាលបានបន្តយកចិត្តទុកដាក់យ៉ាងខ្លាំងចំពោះសហគមន៍ទេសចរណ៍ និងអេកូទេសចរណ៍ ដោយទទួលស្គាល់ថា សហគមន៍គឺជាឆ្អឹងខ្នងដ៏សំខាន់មួយនៃការអភិវឌ្ឍវិស័យទេសចរណ៍ប្រកបដោយចីរភាព។

ជាមួយគ្នានេះ រដ្ឋមន្ត្រី ហួត ហាក់ បានបញ្ជាក់ថា សមិទ្ធផលនៃសេវាកម្មទេសចរណ៍ពេលរាត្រីរបស់សហគមន៍បាគងភូមិខ្ញុំ គឺឆ្លើយតបនឹងគោលបំណងរបស់រាជរដ្ឋាភិបាល ដែលបានអនុញ្ញាតជាគោលការណ៍ឱ្យបង្កើតក្រុមការងារអន្តរក្រសួង ដើម្បីសម្របសម្រួល និងគាំទ្រការអភិវឌ្ឍវិស័យទេសចរណ៍ភាពយន្ត និងការទស្សនាប្រាសាទនាពេលរាត្រីនៅកម្ពុជា សំដៅជំរុញសកម្មភាពទេសចរណ៍ពេលរាត្រីឱ្យកាន់តែសម្បូរបែប បង្កើនការទាក់ទាញភ្ញៀវទេសចរ និងពន្យាររយៈពេលស្នាក់នៅរបស់ភ្ញៀវទេសចរ។

លោករដ្ឋមន្ត្រីបានសង្កត់ធ្ងន់ថា «ការអភិវឌ្ឍទេសចរណ៍ពេលរាត្រី មិនមែនគ្រាន់តែជាការពង្រីកម៉ោងទស្សនាកម្សាន្តប៉ុណ្ណោះទេ ប៉ុន្តែជាការបង្កើនចំណូលដល់ប្រជាពលរដ្ឋ ពង្រីកសកម្មភាពសេដ្ឋកិច្ច និងជំរុញសកម្មភាពអាជីវកម្មនៅក្នុងសហគមន៍»៕