(ភ្នំពេញ)៖ លោក ហួត ហាក់ រដ្ឋមន្រ្តីក្រសួងទេសចរណ៍ នៅថ្ងៃទី៣០ ខែកក្កដា ឆ្នាំ២០២៦ បានអញ្ជើញជាអធិបតីក្នុងពិធីសំណេះសំណាលជាមួយបងប្អូនប្រជាសហគមន៍ទេសចរណ៍បាគងភូមិខ្ញុំ និងចែកអំណោយសប្បុរសធម៌ជូនប្រជាសហគមន៍ សរុប ១៥០គ្រួសារ ដោយមានការអញ្ជើញចូលរួមពីថ្នាក់ដឹកនាំក្រសួងទេសចរណ៍, លោក ង៉ូវ សេងកាក់ អភិបាលនៃគណៈអភិបាលរងខេត្តសៀមរាប, លោក លោកស្រីតំណាងមន្ទីរទេសចរណ៍រាជធានី ខេត្ត, លោកអភិបាល នៃគណៈអភិបាលស្រុកប្រាសាទបាគង, លោក លោកស្រីមេឃុំ លោកប្រធានសហសហគមន៍បាគងភូមិខ្ញុំ និងអ៊ំ ពូ មីង បងប្អូនសមាជិក សមាជិកាសហគមន៍ទេសចរណ៍បាគងភូមិខ្ញុំទាំងអស់ សរុបប្រមាណ ៣០០នាក់។

រដ្ឋមន្រ្តី ហួត ហាក់ ជម្រាបជូនថា រាជរដ្ឋាភិបាលកម្ពុជា ក្រោមការដឹកនាំប្រកបដោយ ចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកំណត់វិស័យទេសចរណ៍ជាវិស័យអាទិភាពមួយ ដែលចាត់ទុកថា «ជាមាសបៃតង» សម្រាប់ជំរុញកំណើនសេដ្ឋកិច្ច បង្កើតការងារ បង្កើនប្រាក់ចំណូលជូនប្រជាពលរដ្ឋ និងលើកកម្ពស់កិត្យានុភាពកម្ពុជាលើឆាកអន្តរជាតិ។ ជាពិសេស រាជរដ្ឋាភិបាលបានបន្តយកចិត្តទុកដាក់យ៉ាងខ្លាំងចំពោះសហគមន៍ទេសចរណ៍ និងអេកូទេសចរណ៍ ដោយទទួលស្គាល់ថា សហគមន៍គឺជាឆ្អឹងខ្នងដ៏សំខាន់មួយ នៃការអភិវឌ្ឍវិស័យទេសចរណ៍ ប្រកបដោយចីរភាព។

ជាមួយគ្នានេះ រដ្ឋមន្រ្តី ហួត ហាក់ បានផ្តាំផ្ញើ និងសូមអំពាវនាវដល់បងប្អូនប្រជាសហគមន៍ទេសចរណ៍បាគងភូមិខ្ញុំទាំងអស់ បន្តថែរក្សាបរិស្ថាន អនាម័យ សុវត្ថិភាព សណ្តាប់ធ្នាប់ ពង្រឹងគុណភាពសេវាកម្ម និងបដិសណ្ឋារកិច្ចឱ្យកាន់តែល្អប្រសើរ ដើម្បីទាក់ទាញឱ្យភ្ញៀវទេសចរកាន់តែច្រើនឡើងៗ៕