(ភ្នំពេញ)៖ នារីជនជាតិសិង្ហបុរី បានបញ្ជាក់ពីការចូលមកប្រទេសកម្ពុជា ដោយមិនជាប់ពាក់ព័ន្ធជាមួយសកម្មភាពបទល្មើស Online Scams និងការអូសទាញណាមួយឡើយ ពោលនាងមកស្រុកខ្មែរយើង ព្រោះតែចង់ស្វែងរកការងារជាគ្រូបង្រៀន ក្រោយស្ថានភាពជីវភាពរបស់នាងមានការលំបាក។

នាងបញ្ជាក់បែបនេះ ជាសារមួយទៅកាន់សារព័ត៌មានអន្តរជាតិ និងការលើកឡើងមិនល្អជាច្រើនជាមួយស្ថានភាពជាក់ស្តែងនៅកម្ពុជា សូមកុំឲ្យមានការយល់ច្រឡំ។

នាង អាយសា (Aisha) ជាស្ត្រី អាយុ ២០ឆ្នាំ បានចេញមកធ្វើសេចក្ដីថ្លែងការណ៍នេះ ដើម្បីផ្ញើជូនស្ថាប័នសារព័ត៌មានជាតិ និងអន្តរជាតិទាំងអស់។ នាងថា ថ្មីៗនេះ ឪពុកម្តាយរបស់ខ្ញុំមានការព្រួយបារម្ភអំពីការមកប្រទេសកម្ពុជារបស់ខ្ញុំ ហើយពួកគាត់បានរាយការណ៍ទៅកាន់ស្ថាប័នសារព័ត៌មាន បណ្ដាញសង្គម និងសមត្ថកិច្ច អំពីការបាត់ខ្លួនរបស់ខ្ញុំ។

ខ្ញុំចង់បញ្ជាក់នូវចំណុចមួយចំនួន។ ជាដំបូង ជីវភាពរស់នៅរបស់ខ្ញុំនៅប្រទេសសិង្ហបុរីបានបង្កឱ្យខ្ញុំមានភាពតានតឹងយ៉ាងខ្លាំង។ ដូច្នេះ ខ្ញុំចង់ស្វែងរកផ្លូវជីវិតរបស់ខ្លួនឯង។ ដោយហេតុនេះ នៅថ្ងៃទី២០ ខែកក្កដា ខ្ញុំបានសម្រេចចិត្តចាកចេញដោយខ្លួនឯង និងមកប្រទេសកម្ពុជា ដើម្បីបំពេញការងារជាគ្រូបង្រៀនភាសាអង់គ្លេស។

ការសម្រេចចិត្តចាកចេញពីគ្រួសាររបស់ខ្ញុំនៅប្រទេសសិង្ហបុរី និងមកកាន់ប្រទេសកម្ពុជា គឺជាការសម្រេចចិត្តរបស់ខ្ញុំទាំងស្រុង។ ខ្ញុំមិនត្រូវបាននរណាម្នាក់បង្ខំឱ្យមកទីនេះឡើយ។ ខ្ញុំក៏មិនត្រូវបានឆបោកឱ្យមកទីនេះដែរ។ ការសម្រេចចិត្តនេះគឺផ្អែកទាំងស្រុងលើឆន្ទៈ ការពិចារណា និងការជ្រើសរើសរបស់ខ្ញុំផ្ទាល់។ ខ្ញុំសូមបញ្ជាក់ជាថ្មីម្ដងទៀតថា ខ្ញុំមិនបានជាប់ពាក់ព័ន្ធ ឬត្រូវបានបង្ខំឱ្យចូលរួមក្នុងសកម្មភាពឆបោក សកម្មភាពបោកប្រាស់ ឬសកម្មភាពឧក្រិដ្ឋកម្មណាមួយឡើយ។

សូមបញ្ជាក់ថា ដោយមានការចង្អុលដឹកនាំដ៏ខ្ពង់ខ្ពស់ពីនាយឧត្តមសេនីយ៍ ស ថេត អគ្គស្នងការនគរបាលជាតិ, ស្នងការដ្ឋាននគរបាលរាជធានីភ្នំពេញ បានសហការយ៉ាងជិតស្និទ្ធជាមួយនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ ដើម្បីស្វែងរកនារីជនជាតិសិង្ហបុរីម្នាក់ ដែលត្រូវបានឪពុករបស់ខ្លួនដាក់ពាក្យបណ្ដឹងនៅប៉ូលិសសិង្ហបុរីឱ្យជួយស្វែងរក។

នារីរូបនេះមានឈ្មោះ Siti Aishan Siregar binte Siregar ជនជាតិសិង្ហបុរី ត្រូវបានរកឃើញនៅថ្ងៃទី៣១ ខែកក្កដា ឆ្នាំ២០២៦ ក្នុងខុនដូរឈ្មោះទួលគោកឡែន ស្ថិតក្នុងខណ្ឌទួលគោក រាជធានីភ្នំពេញ។

នារីរូបនេះក៏បានបង្ហាញពីបំណងចង់ដាក់ពាក្យស្នើសុំបណ្ណការងារ ដើម្បីធ្វើជាគ្រូបង្រៀនភាសាអង់គ្លេសនៅកម្ពុជាផងដែរ៕