(ភ្នំពេញ)៖ សិស្សានុសិស្សនៅសាលាបឋមសិក្សាសន្ធរម៉ុក បានបង្ហាញពីសមត្ថភាព និងគំនិតច្នៃប្រឌិតខ្ពស់របស់ពួកគេ តាមរយៈការបង្គុំដ្រូន និងការបង្កើតធុងសំរាមកែច្នៃ ដែលជាស្នាដៃកើតចេញពីការសិក្សាលើជំនាញបច្ចេកវិទ្យា។

ព្រឹត្តិការណ៍នេះបានឆ្លុះបញ្ចាំងពីការរីកចម្រើនគួរឱ្យកត់សម្គាល់ក្នុងការបណ្ដុះបណ្ដាលចំណេះដឹងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ចាប់តាំងពីកម្រិតបឋមសិក្សា។

ជាក់ស្តែងនៅព្រឹកថ្ងៃទី១ ខែសីហា ឆ្នាំ២០២៦នេះ សាលាបឋមសិក្សាសន្ធរម៉ុក បានរៀបចំពិធីតាំងពិព័រណ៍ស្នាដៃសិស្សកម្រិតមតេយ្យ និងបឋមលើកទី១ របស់ខ្លួន ដោយបានដាក់តាំងបង្ហាញគម្រោងចំនួន៥៧ ដើម្បីបង្ហាញពីទេពកោសល្យ និងសមត្ថភាពច្នៃប្រឌិតដ៏សម្បូរបែបរបស់សិស្សានុសិស្ស។

ក្រោមការណែនាំពីលោកគ្រូ អ្នកគ្រូ សិស្សានុសិស្សបានចំណាយពេលសិក្សា និងអនុវត្តជាក់ស្ដែងក្នុងការស្វែងយល់ពីគោលការណ៍គ្រឹះនៃបច្ចេកវិទ្យាដ្រូន រួមទាំងការរចនា និងការបង្គុំផ្នែកនីមួយៗរហូតក្លាយជាដ្រូនដែលអាចហោះហើរបាន។

ក្រៅពីនេះ ពួកគេក៏បានបង្ហាញពីគម្រោងធុងសំរាមកែច្នៃ ដែលបានប្រើប្រាស់សម្ភារៈដែលលែងប្រើប្រាស់ហើយ មកបង្កើតជាផលិតផលថ្មីប្រកបដោយប្រយោជន៍ និងចូលរួមចំណែកក្នុងការការពារបរិស្ថាន។

ការបង្ហាញស្នាដៃទាំងនេះ មិនត្រឹមតែជាការបង្ហាញពីសមត្ថភាពបុគ្គលរបស់សិស្សប៉ុណ្ណោះទេ ប៉ុន្តែក៏ជាសក្ខីភាពបញ្ជាក់ពីប្រសិទ្ធភាពនៃការបញ្ចូលកម្មវិធីសិក្សាផ្នែកបច្ចេកវិទ្យាទៅក្នុងប្រព័ន្ធអប់រំកម្រិតបឋមសិក្សាផងដែរ។ គំនិតផ្ដួចផ្ដើមនេះបានជំរុញឱ្យសិស្សមានការគិតប្រកបដោយភាពច្នៃប្រឌិត ការដោះស្រាយបញ្ហា និងការធ្វើការងារជាក្រុម ដែលជាជំនាញចាំបាច់សម្រាប់សតវត្សរ៍ទី២១៕