(ភ្នំពេញ)៖ ក្រសួងព័ត៌មាន បានរៀបចំពិធីបិទ និងប្រគល់វិញ្ញាបនបត្រវគ្គបណ្តុះបណ្តាល «ការពង្រឹងសមត្ថភាពអ្នកសារព័ត៌មាន លើកទី៩»។ ពិធីនេះប្រព្រឹត្តទៅក្រោមអធិបតីភាពលោក សុខ ចាន់ភក្តី រដ្ឋលេខាធិការ តំណាងលោក នេត្រ ភក្ត្រា រដ្ឋមន្ត្រីក្រសួងព័ត៌មាន។

វគ្គបណ្តុះបណ្តាលនេះមានសិក្ខាកាមសរុប ១៨០នាក់ មកពី ៥០អង្គភាពទូទាំងប្រទេស បានចូលរួមសិក្សា ដោយក្នុងនោះ ១៧០នាក់ បានបញ្ចប់ការសិក្សាដោយជោគជ័យ ល្ងាចថ្ងៃសុក្រ ទី៣១ ខែកក្កដា ឆ្នាំ២០២៦ មណ្ឌលបណ្តុះបណ្តាល និងវិក្រឹតការវិជ្ជាជីវៈសារព័ត៌មាន។

ខ្លឹមសារសំខាន់នៃវគ្គនេះ គឺផ្តោតលើការធ្វើទំនើបកម្មសមត្ថភាពអ្នកសារព័ត៌មានក្នុងយុគសម័យឌីជីថល ពិសេសលើអក្ខរកម្មបញ្ញាសិប្បនិម្មិត (AI Literacy) ការប្រើប្រាស់ AI ប្រកបដោយក្រមសីលធម៌វិជ្ជាជីវៈ និងការផ្ទៀងផ្ទាត់ព័ត៌មានមុនការផ្សព្វផ្សាយ។

ថ្លែងក្នុងឱកាសនោះ លោក សុខ ចាន់ភក្តី បានគូសបញ្ជាក់ថា ការអភិវឌ្ឍសមត្ថភាពអ្នកសារព័ត៌មាន គឺជាកត្តាស្នូលក្នុងការកសាងទំនុកចិត្តសាធារណជន។

លោកបានបន្ថែមថា ការប្រើប្រាស់ AI ទាមទារការទទួលខុសត្រូវខ្ពស់ ការផ្ទៀងផ្ទាត់ប្រភពច្បាស់លាស់ គួបផ្សំនឹងការរាយការណ៍ដោយប្រកាន់ខ្ជាប់នូវភាពសុចរិត តុល្យភាព និងការគោរពសិទ្ធិមនុស្ស។

គិតត្រឹមវគ្គទី៩នេះ ក្រសួងព័ត៌មានបានបណ្តុះបណ្តាលអ្នកសារព័ត៌មានសរុប ១.៤៤១នាក់ ដែលឆ្លុះបញ្ចាំងពីការប្តេជ្ញាចិត្តរបស់ក្រសួង ក្នុងការកសាងធនធានមនុស្សប្រកបដោយវិជ្ជាជីវៈ ដើម្បីបម្រើផលប្រយោជន៍សាធារណៈស្របតាមបរិបទសង្គមឌីជីថល៕