(សៀមរាប)៖ ទិវារត់ប្រណាំងម៉ារ៉ាតុងអន្តរជាតិចក្រភពអង្គរ លើកទី ១១ «11th Angkor Empire Marathon» ដែលនឹងប្រារព្ធឡើងនៅថ្ងៃទី២ ខែសីហា ឆ្នាំ២០២៦នេះ នៅតំបន់អង្គរ ខេត្តសៀមរាប គឺជាចំណែកមួយដ៏សំខាន់ក្នុងការជំរុញវិស័យទេសចរណ៍ និងជួយលើកស្ទួយសេដ្ធកិច្ចជាតិ ព្រោះព្រឹត្តិការណ៍នេះ មានអ្នកចុះឈ្មោះចូលរួមចំនួន ៦,៥០០នាក់ មកពី ៥១ប្រទេស។

លោក ខេលី ច័ន្ទតារា នាយកគ្រប់គ្រងសណ្ឋាគារ រ៉ូយ៉ាល់ អង្គរ រីសត បានលើកឡើងនៅថ្ងៃទី១ ខែសីហានេះថា សណ្ឋាគារ រ៉ូយ៉ាល់ អង្គរ រីសត បានសហការជាមួយគណៈកម្មាធិការរៀបចំ (Angkor Empire Marathon) ដោយសណ្ឋាគារបានចូលរួមជួយរៀបចំកន្លែងឲ្យអត្តពលិកទាំងអស់ ទាំងជាតិ និងអន្តជាតិ ដែលបានចុះឈ្មោះរួចមកបើកសម្ភារៈ។ ការចូលរួមនេះ ក្នុងគោលបំណង ដើម្បីឲ្យគណៈកម្មាធិការរៀបចំគៀងគរអ្នកចូលរួមឲ្យបានកាន់ច្រើន។

លោកបានបន្តថា ការរៀបចំព្រឹត្តិការណ៍នេះ បានចូលរួមចំណែកផ្សព្វផ្សាយដល់ភ្ញៀវទេសចរជាតិ និងអន្តរជាតិ ឲ្យមកទស្សនាខេត្តសៀមរាប ជាពិសេសប្រាសាទអង្គរវត្ត និងប្រាសាទដ៏ទៃទៀត ក្នុងរដូវកាលបៃតងនេះ។ ទោះបីមានថ្ងៃខ្លះវាមានភ្លៀង ក៏ប៉ុន្តែជារដូវកាលមួយល្អ ដែលអាចឲ្យភ្ញៀវទេសចរជាតិ និងអន្តរជាតិ បានថតរូបភាពក្នុងរដូវកាលខែភ្លៀង ដែលមានទេសភាពពណ៍បៃតងស្រស់ស្អាតគួរឲ្យចង់គយគន់។

លោកបន្តថា ទិវារត់ប្រណាំងម៉ារ៉ាតុងអន្តរជាតិចក្រភពអង្គរ ឆ្នាំ២០២៦នេះ មានការការកើនឡើងច្រើនទាំងអត្តពលិកជាតិ និងអន្តរជាតិ ហើយភាគច្រើនជាយុវវ័យ។ ក្នុងនោះដោយអ្នកខ្លះធ្លាប់ចូលរួម ហើយខ្លះទៀតក៏អត់ដែលបានចូលរួមដែរ។ ដោយឡែក អត្តពលិកបរទេសវិញ ក៏មានការកើនឡើងផងដែរ ជាពិសេសអត្តពលិកជនជាតិចិន។

លោកបន្ថែមថា ថ្មីៗនេះសណ្ឋាគារ រ៉ូយ៉ាល់ អង្គរ រីសត បានចូលរួមសហការជាមួយក្រសួងទេសចរណ៍ ក្នុងយុទ្ធនាការផ្សព្វផ្សាយបញ្ចុះតម្លៃនៅក្នុង «រដូវកាលបៃតង»នេះ រួមជាមួយប្រតិបត្តិករទេសចរផ្សេងៗទៀត។ ក្នុងនោះដែរ សណ្ឋាគារ រ៉ូយ៉ាល់ អង្គរ រីសត បានចូលរួមបញ្ចុះតម្លៃពី២០ ទៅ៣០ភាគរយ ដើម្បីឲ្យក្រសួងផ្សព្វផ្សាយដល់ភ្ញៀវទេសចរជាតិ និងអន្តរជាតិ មកទស្សនាក្នុងខេត្តសៀមរាប ហើយមានតម្លៃសណ្ឋាគារសមរម្យ។

លោកបន្តថា រាជរដ្ឋាភិបាល បានដាក់ចេញនូវគោលនយោបាយ ជាពិសេសក្រសួងទេសចរណ៍ យើងគួរតែមានយុទ្ធការផ្សព្វផ្សាយឲ្យបានកាន់តែច្រើនថែមទៀត ក្នុង «រដូវកាលបៃតង» ដែលយើងគិតថា ជារដូវមិនសូវមានភ្ញៀវទេសចរ។ ដោយផ្សព្វផ្សាយថា «រដូវកាលបៃតង» ជារដូវកាលភ្លៀងមែន ក៏ប៉ុន្តែភ្ញៀវទេសចរជាតិ និងអន្តរជាតិ អាចមកដកស្រង់នូវបទពិសោធន៍រដូវកាលនេះ មានភ្លៀងធ្លាក់មែនតែមានទេសភាពបៃតងស្អាត។

ជាមួយនេះ លោក ខេលី ច័ន្ទតារា បញ្ជាក់ថា យុទ្ធការគួរមានការផ្សព្វផ្សាយបន្តទៅមុខសម្រាប់ឆ្នាំក្រោយៗទៀត ដូច្នេះយើងនឹងមិនមានរដូវកាលភ្ញៀវច្រើន និងរដូវកាលភ្ញៀវតិចទេ ប្រសិនបើយើងអនុវត្តជាប្រចាំ និងបង្កើតព្រឹត្តិការណ៍ឲ្យបានច្រើន។ ក្នុងនោះ សមរាត្រីនៅខែក្រោយក៏ជាព្រឹត្តិការណ៍មួយដ៏ទាក់ទាញផងដែរ ដូច្នេះយើងគួរតែផ្សព្វផ្សាយឲ្យបានច្រើនពីព្រឹត្តិការណ៍នេះ៕