(កំពង់ចាម)៖ លោក លន់ សុផាត សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកបាធាយ ខេត្តកំពង់ចាម នៅរសៀលថ្ងៃទី១ ខែសីហា ឆ្នាំ២០២៦នេះ បានអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការ អគារស្នាក់ការគណបក្សប្រជាជនកម្ពុជាឃុំត្រប់ ស្រុកបាធាយ ខេត្តកំពង់ចាម ដែលជាអំណោយរបស់លោកសន្ដិបណ្ឌិត នេត សាវឿន ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកំពង់ចាម។

ថ្លែងក្នុងឱកាសនោះ លោក លន់ សុផាត បាននូវការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន ប្រធានគណបក្ស, សម្ដេចមហាបវរធិបតី ហ៊ុន ម៉ាណែត អនុប្រធានគណបក្ស និងលោកសន្ដិបណ្ឌិត នេត សាវឿន ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកំពង់ចាម ជូនសមាជិក សមាជិកាគណបក្សប្រជាជនកម្ពុជាក្នុងមូលដ្ឋានឃុំត្រប់ទាំងអស់។

ក្នុងនាមប្រធានក្រុមការងារគណបក្សចុះមូលដ្ឋានស្រុកបាធាយ លោក លន់ សុផាត បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ សមាជិក សមាជិកាគណបក្សឃុំត្រប់ទាំងអស់ ដែលបានខិតខំប្រឹងប្រែង ការលះបង់ខ្ពស់ចូលរួមឧបត្ថម្ភទាំងធនធានសម្ភារ ថវិកា និងស្មារតីទទួលខុសត្រូវខ្ពស់ក្នុងការទាក់ទាញសមាជិកបន្ថែមទៀត។

លោកបានបញ្ជាក់ថា ស្នាក់ការគណបក្សថ្មីនេះ គឺជាកន្លែងបំពេញការងារ និងបម្រើកិច្ចការទូទៅរបស់មន្ត្រីគណបក្សប្រជាជន ក៏ដូចជាបម្រើឲ្យរដ្ឋបាលគណបក្សព្រមទាំងផ្ដល់នូវភាពងាយស្រួល ក្នុងការជួបជុំការប្រមូលផ្ដុំ និងការធ្វើសកម្មភាពនានារបស់គណបក្សនៅក្នុងមូលដ្ឋាន ហើយក៏ជាសក្ខីភាពដ៏រឹងមាំនៃគណបក្ស ក៏ដូចជាភាពចាស់ទុំខាងនយោបាយថែមទៀត ដែលជាគណបក្សកាន់អំណាចហើយអភិវឌ្ឍន៍ប្រទេសជាតិក្រោមម្លប់សន្តិភាពដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា។

លោក លន់ សុផាត ក៏បានណែនាំដល់ក្រុមការងារគណបក្សចុះមូលដ្ឋានទាំងអស់ ត្រូវចុះជាប់ជាប្រចាំ ជួយគាំទ្រ និងធានាឲ្យបាននូវធនធាន មធ្យោបាយ សម្ភារ និងថវិកាសម្រាប់មូលដ្ឋាន។ លើសពីនេះ ត្រូវបន្ដយកចិត្តទុកដាក់ចាត់ចែង និងអន្ដរាគមន៍ឲ្យបានទាន់ពេលវេលារាល់បញ្ហានានាដែលកើតឡើងនៅក្នុងមូលដ្ឋាន។

ក្នុងឱកាសនោះ លោក លន់ សុផាត បានឧបត្ថម្ភថវិកាជូនសមាជិក សមាជិកាដែលបានចូលរួមចំនួន២០០នាក់ ថវិកាម្នាក់២ម៉ឺនរៀល, អាវគណបក្សម្នាក់មួយ និងគណបក្សឃុំថវិកាចំនួន២លានរៀលផងដែរ៕