(កំពង់ស្ពឺ)៖ នាថ្ងៃសៅរ៍ ទី០១ ខែសីហា ឆ្នាំ២០២៦ កិច្ចការសំខាន់ៗជាច្រើនត្រូវបានអនុវត្តនៅឃុំអមលាំង ស្រុកថ្ពង ខេត្តកំពង់ស្ពឺ ដើម្បីលើកកម្ពស់ជីវភាព និងធានាការអភិវឌ្ឍន៍មូលដ្ឋាន។

លោក ម៉េង ស្រ៊ុន សមាជិកគណៈអចិន្រ្តៃយ៍គណៈកម្មាធិការគណបក្សខេត្តកំពង់ស្ពឺ ប្រធានក្រុមការងារគណបក្សចុះមូលដ្ឋានឃុំអមលាំង និងជាប្រធានគណៈកម្មការគ្រប់គ្រងសមាជិក ខ២៦.២ បានជួបសំណេះសំណាលជាមួយបងប្អូនប្រជាពលរដ្ឋ និងក្រុមការងារសុរិយោដី ដែលកំពុងអនុវត្តការចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់ដី) ជូនប្រជាពលរដ្ឋ ដែលមានដីស្ថិតនៅក្នុងឃុំអមលាំង។

បន្ទាប់ពីកិច្ចសំណេះសំណាលប្រកបដោយផ្លែផ្ការួចមក លោក ម៉េង ស្រ៊ុន បានចុះពិនិត្យសកម្មភាពគ្រឿងចក្រអេស្កាវាទ័រ ដែលកំពុងអនុវត្តការកាយប្រឡាយទឹក

គោលបំណងនៃការកាយប្រឡាយនេះ គឺដើម្បីធានាការផ្គត់ផ្គង់ទឹកសម្រាប់ការងារបង្កបង្កើនផលរបស់ប្រជាពលរដ្ឋ និងលើកកម្ពស់ប្រសិទ្ធភាពនៃការគ្រប់គ្រងធនធានទឹកក្នុងមូលដ្ឋានឱ្យកាន់តែប្រសើរឡើង។

ប្រឡាយទឹកដែលកំពុងកាយនេះ មានប្រវែងសរុបប្រមាណ ៨០០ម៉ែត្រ ដោយចាប់ផ្តើមពីចំណុចទំនប់ចំការក្រូច រហូតដល់ចំណុចផ្លូវកៅស៊ូមូលនិធិឃុំអមលាំង។

គម្រោងនេះពាក់ព័ន្ធនឹងភូមិចំនួន៤ រួមមាន ភូមិគោក ភូមិព្រែក ភូមិស្នួល និងភូមិអូរអង្គុំ ដែលគ្របដណ្តប់លើផ្ទៃដីអាស្រ័យផលប្រមាណ ៥២០ហិកតា។

ការកាយប្រឡាយទឹកនេះ នឹងចូលរួមចំណែកយ៉ាងសំខាន់ក្នុងការជំរុញវិស័យកសិកម្ម និងធានាសន្តិសុខស្បៀងជូនប្រជាពលរដ្ឋក្នុងតំបន់។