(តាកែវ)៖ នៅព្រឹកថ្ងៃសៅរ៍ ទី១ ខែសីហា ឆ្នាំ២០២៦ លោក ឡា ឡៃ រដ្ឋលេខាធិការ ក្រសួងធម្មការ និងសាសនា បានអញ្ជើញជាអធិបតីក្នុងពិធីបើកសិក្ខាសាលា ស្តីពី «តួនាទីរបស់ថ្នាក់ដឹកនាំក្នុងការរួមចំណែកអភិវឌ្ឍន៍សហគមន៍ឥស្លាមកម្ពុជា» ដែលរៀបចំដោយគណៈអ៊ីម៉ាំខេត្តតាកែវ សហការឧបត្ថម្ភដោយសមាគមពន្លឺនៃចំណេះដឹង និងសប្បុរសធម៌។

សិក្ខាសាលានេះប្រព្រឹត្តទៅនៅសាលប្រជុំរដ្ឋបាលខេត្តតាកែវ ដោយមានការចូលរួមពីថ្នាក់ដឹកនាំក្រសួង អាជ្ញាធរមូលដ្ឋាន ថ្នាក់ដឹកនាំសាសនាឥស្លាម អ៊ីម៉ាំ ខតិប គ្រូបង្រៀនសាសនា និងតំណាងសហគមន៍ឥស្លាមមកពីតាមបណ្ដាស្រុកនានាក្នុងខេត្តតាកែវ ខេត្តកណ្ដាល កំពត និងខេត្តព្រះសីហនុផងដែរ ។

កម្មវិធីនេះរៀបចំឡើងក្នុងគោលបំណងពង្រឹងសមត្ថភាព និងតួនាទីរបស់ថ្នាក់ដឹកនាំសហគមន៍ឥស្លាម ឱ្យកាន់តែមានប្រសិទ្ធភាពក្នុងការចូលរួមអភិវឌ្ឍសហគមន៍ លើកកម្ពស់សាមគ្គីភាព ការអប់រំ សីលធម៌ និងកិច្ចសហប្រតិបត្តិការជាមួយអាជ្ញាធរពាក់ព័ន្ធ ដើម្បីរួមចំណែករក្សាសុខដុមរមនា សន្តិភាព និងការអភិវឌ្ឍប្រកបដោយចីរភាពនៅកម្ពុជា។

ក្នុងឱកាសនោះ លោក ឡា ឡៃ បានថ្លែងកោតសរសើរចំពោះការរៀបចំសិក្ខាសាលានេះ និងបានលើកទឹកចិត្តឱ្យថ្នាក់ដឹកនាំសហគមន៍ឥស្លាមបន្តពង្រឹងសាមគ្គីភាព ភាពជាអ្នកដឹកនាំល្អ និងការចូលរួមយ៉ាងសកម្មក្នុងការអភិវឌ្ឍសហគមន៍ ស្របតាមគោលនយោបាយរបស់រាជរដ្ឋាភិបាល និងគោលការណ៍នៃការរស់នៅប្រកបដោយសុខដុមរមនារវាងសាសនាទាំងអស់នៅកម្ពុជា។