(កំពង់ធំ)៖ បណ្ឌិត ហេង សំណាង អនុប្រធានក្រុមការងារចុះមូលដ្ឋានស្រុកប្រាសាទបល្ល័ង្ក និងជាប្រធានក្រុមការងារចុះមូលដ្ឋានឃុំទួលគ្រើល បានជំរុញឲ្យក្រុមការងារចុះតាមបណ្ដាភូមិរៀបចំធ្វើផែនការចុះសួរសុខទុក្ខដល់មេក្រុមបក្ស និងមេគ្រួសារបក្ស។ ការជំរុញនេះបានធ្វើឡើងក្នុងកិច្ចប្រជុំណែនាំអំពីការចុះមូលដ្ឋានឃុំទួលគ្រើល កាលពីថ្ងៃទី ០២ ខែ សីហា ឆ្នាំ២០២៦។

លោកបណ្ឌិតបានសង្កត់ធ្ងន់ថា ក្នុងកិច្ចការនេះ ក្រុមការងារត្រូវផ្តោតសំខាន់លើការផ្ទៀងផ្ទាត់សមាជិកបក្សឲ្យបានច្បាស់លាស់ និងស្តាប់នូវបញ្ហាប្រឈមនានា។ ពិសេស ត្រូវពិនិត្យមើលឯកសាររបស់សមាជិកក្រុម ដូចជាអត្តសញ្ញាណប័ណ្ណដែលហួសសុពលភាព ត្រូវរួសរាន់ធ្វើជូនពួកគាត់ឲ្យបានលឿន ក៏ដូចជាយុវជនដែលដល់អាយុបោះឆ្នោត និងអ្នកដែលមិនទាន់មានឈ្មោះក្នុងបញ្ជីបោះឆ្នោត ដែលជាកិច្ចការចម្បងត្រូវដោះស្រាយជាបន្ទាន់។

លោកបានបញ្ជាក់បន្ថែមថា បញ្ហាសាមគ្គីផ្ទៃក្នុងគឺសំខាន់បំផុត ដែលត្រូវធ្វើឲ្យបានតាមការប្តេជ្ញាចិត្តតាមភូមិនីមួយៗ។ ទន្ទឹមនឹងនេះ សមាជិក សមាជិកាទាំងអស់ត្រូវថែទាំសុខភាពឲ្យបានល្អ ដើម្បីបន្តកិច្ចការងារក្នុងមូលដ្ឋានឲ្យបានរីកចម្រើនទៅមុខទៀត។ បណ្ឌិត ហេង សំណាង ក៏បានកោតសរសើរ និងជូនពរដល់ក្រុមការងារដែលបានខិតខំប្រឹងប្រែងអនុវត្តកិច្ចការងារ ដើម្បីទទួលបានប្រសិទ្ធភាព និងប្រសិទ្ធផលជូនគណបក្ស ឲ្យទទួលបានជោគជ័យសម្រាប់ការបោះឆ្នោតនៅពេលខាងមុខ។