(កំពត)៖ លោកបណ្ឌិត ជ្រុន ថេរ៉ាវ៉ា និងលោកជំទាវអ្នកឧកញ៉ា សុខ សុភាព នាព្រឹកថ្ងៃទី១ ខែសីហា ឆ្នាំ២០២៦ បានអញ្ជើញនាំយកទៀនព្រះវស្សា ទេយ្យទាន និងបច្ច័យ ប្រគេនដល់ព្រះសង្ឃគង់ចាំព្រះវស្សា នៅវត្តចំនួន៣ រួមមាន៖ វត្តបរិវាស វត្តដូនបុណ្យ និងវត្តដំណាក់ត្រយឹង ស្ថិតក្នុងស្រុកបន្ទាយមាស ខេត្តកំពត ។

លោកបណ្ឌិត ជ្រុន ថេរ៉ាវ៉ាត និងលោកជំទាវអ្នកឧកញ៉ា សុខ សុភាព បានអញ្ជើញបូជាទៀន ធូប ផ្កាភ្ញី ថ្វាយព្រះរតនត្រ័យ និងថ្វាយបង្គំព្រះពុទ្ធរូប ថ្វាយបង្គំ ព្រះសង្ឃ និងសមាទានសីល តាមសិក្ខាបទ ដើម្បីរំលឹកនឹកដល់ព្រះសម្មាសម្ពុទ្ធព្រះបរមគ្រូនៃយើង ដែលព្រះអង្គត្រាស់ដឹងនូវអនុត្តរៈសម្មាសម្ពោធិញាណ និងព្រះធម៌វិន័យដ៏វិសេសវិសាល បន្សល់ទុកឱ្យពុទ្ធបរិស័ទគ្រប់ជំនាន់គោរពប្រតិបត្តិរហូតដល់ពេលបច្ចុប្បន្ន។

ពិធីប្រគេនទៀនព្រះវស្សា និងទេយ្យទាននេះ បានប្រព្រឹត្តទៅក្នុងគោលបំណងបន្តថែរក្សា និងលើកតម្កើងប្រពៃណីព្រះពុទ្ធសាសនាដ៏ល្អផូរផង់ ព្រមទាំងបង្ហាញនូវសទ្ធាជ្រះថ្លារបស់ពុទ្ធបរិស័ទក្នុងការចូលរួមទ្រទ្រង់ព្រះពុទ្ធសាសនា លើកកម្ពស់វប្បធម៌នៃការចែករំលែក និងពង្រឹងសាមគ្គីភាពក្នុងសង្គម។

ក្នុងឱកាសនោះ លោកបណ្ឌិត បានមានប្រសាសន៍សំណេះសំណាល ដោយគូសបញ្ជាក់ថា សន្តិភាពគឺជាមូលដ្ឋានគ្រឹះដ៏រឹងមាំសម្រាប់ការរស់នៅប្រកបដោយសុខដុមរមនា ការអភិវឌ្ឍប្រទេសជាតិ និងការរីកចម្រើនលើគ្រប់វិស័យ។ ដោយសារប្រទេសជាតិមានសុខសន្តិភាព ស្ថិរភាពនយោបាយ និងការអភិវឌ្ឍជាបន្តបន្ទាប់ ទើបប្រជាពលរដ្ឋមានឱកាសពេញលេញក្នុងការគោរពប្រណិប័តន៍ព្រះពុទ្ធសាសនា ថែរក្សាប្រពៃណី វប្បធម៌ និងអត្តសញ្ញាណជាតិឱ្យបានគង់វង្ស។

លោកបណ្ឌិតបានបន្តថា ព្រះពុទ្ធសាសនា មិនត្រឹមតែជាទីពឹងផ្លូវចិត្តរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងមានតួនាទីយ៉ាងសំខាន់ក្នុងការអប់រំសីលធម៌ ចរិយាធម៌ និងការកសាងធនធានមនុស្ស សំដៅរួមចំណែកពង្រឹងសាមគ្គីភាព និងជំរុញការអភិវឌ្ឍសង្គមជាតិប្រកបដោយចីរភាព៕