អង្គការសង្គមស៊ីវិលក្នុងខេត្តកណ្តាល ប្តេជ្ញាចូលរួមជាមួយរាជរដ្ឋាភិបាលក្នុងការកសាងសង្គមឌីជីថលកម្ពុជា និងចូលរួមទប់ស្កាត់ព័ត៌មានក្លែងក្លាយនិងការឆបោកតាមអនឡាញក្នុងសហគមន៍
03-08-2026 15:03
(កណ្តាល)៖ ដោយមានកិច្ចសហការជាមួយរដ្ឋបាលខេត្តកណ្តាល វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី បានរៀបចំវេទិកាសន្ទនា ក្រោមប្រធានបទស្ដីពី «ការពង្រឹងសមត្ថភាពអង្គការ សង្គមស៊ីវិលក្នុងយុគសម័យឌីជីថល» ដែលបានប្រព្រឹត្តទៅនាព្រឹកថ្ងៃទី៣ ខែសីហា ឆ្នាំ២០២៦ នៅសាលាខេត្តកណ្តាល ក្រោមអធិបតីភាពលោក ប៉ៃ សំបូរ អគ្គលេខាធិការនៃអគ្គលេខាធិការដ្ឋាន វ.ស.ស. តំណាងលោក កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមប្រឹក្សាភិបាល វ.ស.ស. និងលោក ណុប ដារ៉ា អភិបាលរងខេត្តកណ្តាល តំណាងលោក គួច ចំរើន អភិបាលខេត្តកណ្តាល ដោយមានការអញ្ជើញចូលរួមពីអង្គការសង្គមស៊ីវិលក្នុងខេត្តកណ្តាល និងអាជ្ញាធរមូលដ្ឋានជាច្រើននាក់។
ថ្លែងក្នុងអង្គវេទិកាសន្ទនានាព្រឹកនេះ លោក ប៉ៃ សំបូរ បានកោតសរសើរចំពោះការចូលរួមចំណែកយ៉ាងសកម្មរបស់អង្គការសង្គមស៊ីវិលក្នុងខេត្តកណ្តាលក្នុងការអភិវឌ្ឍមូលដ្ឋាន រួមទាំងការលើកកម្ពស់សុខុមាលភាពនិងជីវភាពរស់នៅរបស់ប្រជាពលរដ្ឋប្រកបដោយបរិយាបន្ន។
លោកបានលើកទឹកចិត្តឱ្យអង្គការសង្គមស៊ីវិលបន្តចូលរួមដោយស្មោះត្រង់ក្នុងភាពជាដៃគូជាមួយរាជរដ្ឋាភិបាលក្នុងការជំរុញការអភិវឌ្ឍសេដ្ឋកិច្ច សង្គមឱ្យកាន់តែរីកចម្រើនថែមទៀត រួមទាំងការចូលរួមលើកកម្ពស់ការកសាងសង្គមឌីជីថលនៅកម្ពុជា ស្របតាមគោលនយោបាយនិងយុទ្ធសាស្រ្តអភិវឌ្ឍន៍ជាតិ ក្រោមការដឹកនាំប្រកបដោយគតិបណ្ឌិត និងថាមវន្ដរបស់សម្តេចមហាបវរធិបតី ហ៊ុន ម៉ាណែត។
ឆ្លៀតក្នុងឱកាសនេះដែរ ស្របតាមតម្រូវការទីផ្សារការងារក្នុងមូលដ្ឋានខេត្តកណ្តាល លោកក៏បានលើកទឹកចិត្តឱ្យយុវជនពង្រឹងសមត្ថភាព តាមរយៈការចូលរៀនវគ្គបណ្តុះបណ្តាលវិជ្ជាជីវៈនៅវិទ្យាស្ថានជាតិពហុបច្ចេកទេសតេជោសែន (តាខ្មៅ) ដើម្បីទទួលបានឱកាសការងារនៅតាមក្រុមហ៊ុន សហគ្រាស ដែលអាចជួយបង្កើនប្រាក់ចំណូលសម្រាប់គ្រួសារនិងលើកកម្ពស់ជីវភាពរស់នៅកាន់តែល្អប្រសើរ។
ជាមួយគ្នានេះ លោក ណុប ដារ៉ា បានថ្លែងនូវការកោតសរសើរនិងវាយតម្លៃខ្ពស់ចំពោះការចូលរួមចំណែកយ៉ាងសកម្មរបស់អង្គការសង្គមស៊ីវិល ក្នុងការអភិវឌ្ឍខេត្តកណ្តាលនាពេលកន្លងមក។ លោកបានលើកទឹកចិត្តឱ្យអង្គការសង្គមស៊ីវិលនិងដៃគូអភិវឌ្ឍន៍ទាំងអស់ បន្តពង្រឹងសមត្ថភាពក្នុងយុគសម័យឌីជីថល ក្នុងការគ្រប់គ្រងទិន្នន័យនិងព័ត៌មានរបស់ស្ថាប័ន និងពង្រីកវិសាលភាពនៃការផ្សព្វផ្សាយ ជំរុញតម្លាភាព និងសម្រួលដល់ ទំនាក់ទំនងការងារជាមួយរដ្ឋបាលថ្នាក់ក្រោមជាតិកាន់តែមានប្រសិទ្ធភាព។
លោកបានជំរុញឱ្យអង្គការសង្គមស៊ីវិលបន្តចូលរួមសហការជាមួយអាជ្ញាធរមូលដ្ឋាន ក្នុងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព និងទប់ស្កាត់ការឆបោកតាមប្រព័ន្ធបច្ចេកវិទ្យាក្នុងមូលដ្ឋាន ព្រមទាំងរួមគ្នាប្រយុទ្ធប្រឆាំងនឹងព័ត៌មានក្លែងក្លាយនាពេលបច្ចុប្បន្នផងដែរ។
ក្នុងវេទិកាសន្ទនានាព្រឹកនេះ វ.ស.ស. បានសម្របសម្រួលរៀបចំឱ្យមានបទបង្ហាញស្តីពី «ការយល់ដឹងអំពីអក្ខរកម្មឌីជីថល និងសុវត្ថិភាពតាមប្រព័ន្ធបច្ចេកវិទ្យាសម្រាប់អង្គការសង្គមស៊ីវិល» ដោយបណ្ឌិត ឌុច ឌីនីល ព្រឹទ្ធបុរសរងនៃវិទ្យាស្ថានបច្ចេកវិទ្យាឌីជីថលនៃបណ្ឌិត្យសភាបច្ចេកវិទ្យាឌីជីថលកម្ពុជា ដើម្បីផ្សព្វផ្សាយនិងលើកកម្ពស់បរិវត្តកម្មឌីជីថលនិងការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥។
តំណាងអង្គការសង្គមស៊ីវិលក្នុងខេត្តកណ្តាលដែលបានចូលរួមក្នុងអង្គវេទិកានាព្រឹកនេះ ក៏បានលើកឡើងនូវបញ្ហាប្រឈមនិងសំណូមពរមកជជែកពិភាក្សាដោយត្រង់ទៅត្រង់មកយ៉ាងផុសផុល។ ជាលទ្ធផល បញ្ហាប្រឈមនិងសំណូមពរមួយចំនួន ត្រូវបានដោះស្រាយជាក់ស្តែងក្នុងកិច្ចពិភាក្សាដោយផ្ទាល់ ហើយបញ្ហាដែលសេសសល់មួយចំនួនទៀត នឹងត្រូវយកទៅពិភាក្សាជាមួយអាជ្ញាធរនិងសមត្ថកិច្ចពាក់ព័ន្ធ ដើម្បីរួមគ្នាស្វែងរកដំណោះស្រាយ៕
