(ភ្នំពេញ)៖ ដោយទទួលបានការចង្អុលបង្ហាញពីសំណាក់លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី៣ ខែសីហា ឆ្នាំ២០២៦ មូលនិធិជនពិការ សហការជាមួយ​សមា​គមតន្ត្រីសំនៀងជនពិការ បានរៀបចំដំណើរទស្សនកិច្ចសិក្សា និងស្វែងយល់អំពីការផ្តល់សេវា​ស្តារ​លទ្ធភាពពលកម្មកាយសម្បទាជូនជនមានពិការភាព។

ពិធីនោះ មានការអញ្ជើញចូលរួមពីសំណាក់កញ្ញា កុយ អេនណា អនុ​ប្រធានសមាគម និងជាទូត​សុ​ឆន្ទៈ​សមាគមតន្ត្រីសំនៀងជនពិការ និងមានការអញ្ជើញចូលរួមជា​កិត្តិ​យស​ពីលោកស្រី ញ៉ែម មរកត រដ្ឋ​លេ​ខាធិការក្រសួងកិច្ចការនារី លោក ចាប តូ អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិ​សម្បទា លោក ខុម ផលលឿន ប្រតិភូរាជរដ្ឋាភិបាលកម្ពុជាទទួលបន្ទុកជានាយកមូលនិធិជនពិការ ព្រម​ទាំងថ្នាក់ដឹកនាំ មន្ត្រីជំនាញ បុគ្គលិកនៃមជ្ឈមណ្ឌលស្តារលទ្ធភាពពលកម្មកាយសម្បទាភ្នំពេញ និង​ជន​មានពិការភាពដែលកំពុងទទួលសេវាជាច្រើនរូប។

ក្នុងឱកាសនោះ ថ្នាក់ដឹកនាំមជ្ឈមណ្ឌលស្តារបានធ្វើបទបង្ហាញអំពីបេសកកម្ម តួនាទី សមិទ្ធផល និង​សេវាកម្មសំខាន់ៗរបស់មជ្ឈមណ្ឌល រួមមាន៖ ការព្យាបាលដោយចលនា ការផលិត និងបំពាក់ជើង​ដៃ​សិប្បនិម្មិត រណប និងសេវាស្តារលទ្ធភាពពលកម្មកាយសម្បទាផ្សេងៗ ដែលមានគោលបំណងជួយឱ្យ​ជនមានពិការភាពអាចវិលត្រឡប់ទៅរស់នៅក្នុងសហគមន៍ ប្រកបរបរចិញ្ចឹមជីវិត និងចូលរួម​ក្នុងសង្គម​ប្រកបដោយសេចក្តីថ្លៃថ្នូរ។

កញ្ញា កុយ អេនណា បានអញ្ជើញទស្សនាតាមផ្នែកនីមួយៗរបស់មជ្ឈមណ្ឌលស្តារ ដោយបានស្វែង​យល់​ពីដំណើរការផ្តល់សេវា បច្ចេកទេសរបស់មន្រ្តីជំនាញ និងបានជួបសំណេះសំណាលដោយ​ផ្ទាល់​ជា​មួយជនមានពិការភាពដែលកំពុងទទួលសេវាផងដែរ។ កញ្ញាក៏បានស្តាប់បទពិសោធន៍ និងរឿងរ៉ាវ​ជោគ​ជ័យរបស់អ្នកទទួលសេវា ដែលបានស្តារសមត្ថភាពបន្លាស់ទី និងអាចវិលត្រឡប់ទៅរស់នៅ និងធ្វើ​ការ​បានប្រសើរឡើងវិញ។

កញ្ញា កុយ អេនណា បានសម្តែងការកោតសរសើរចំពោះការយកចិត្តទុកដាក់ និងការខិតខំប្រឹង​ប្រែង​របស់ក្រុមការងារមជ្ឈមណ្ឌលស្តារក្នុងការផ្តល់សេវាប្រកបដោយវិជ្ជាជីវៈ និងមនុស្សធម៌។ កញ្ញា បាន​លើក​ឡើងថា ដំណើរទស្សនកិច្ចនេះបានធ្វើឱ្យកញ្ញាយល់ដឹងកាន់តែ​ច្បាស់អំពីសារៈ​សំខាន់នៃសេវា​ស្តារ​លទ្ធភាពពលកម្មកាយសម្បទា និងជំរុញឱ្យសាធារណៈជនចូលរួមគាំទ្រ ផ្សព្វផ្សាយ និងផ្តល់ឱកាស​ដល់​ជន​មានពិការភាពក្នុងការរស់នៅប្រកបដោយសមភាព និងបរិយាបន្ន។

មជ្ឈមណ្ឌលស្តារលទ្ធភាពពលកម្មកាយសម្បទាភ្នំពេញ បានថ្លែងអំណរគុណយ៉ាង​ជ្រាលជ្រៅចំ​ពោះ​វត្តមានរបស់កញ្ញា កុយ អេនណា ថ្នាក់ដឹកនាំក្រសួង ភ្ញៀវកិត្តិយស និងដៃគូពាក់ព័ន្ធទាំងអស់ ដែល​បាន​ចូលរួមគាំទ្រ និងផ្សព្វផ្សាយសេវាស្តារលទ្ធភាពពលកម្មកាយសម្បទា ដើម្បីឱ្យប្រជាពលរដ្ឋ ជាពិសេស​ជនមាន​ពិការភាព អាចទទួលបានព័ត៌មាន និងសេវាចាំបាច់សម្រាប់ការកែលម្អគុណភាពជីវិត៕