(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៣ ខែសីហា ឆ្នាំ២០២៦ បានអនុញ្ញាតជូនលោក Michel Parys ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្របែលហ្សិកប្រចាំព្រះរាជាណាចក្រកម្ពុជា ដែលមាននិវេសដ្ឋាននៅរាជធានីបាងកក និងសហការី ចូលជួបសម្តែងការគួរសម និងពិភាក្សាការងារ ដោយផ្លាស់ប្តូរយោបល់ស៊ីជម្រៅលើការបង្កើតកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងពីរ ព្រមទាំងការចូលរួមព្រឹត្តិការណ៍អម «Village Francophonie» ដែលនឹងរៀបចំក្នុងឱកាសកិច្ចប្រជុំកំពូលហ្រ្វង់កូហ្វូនីលើកទី២០ នៅរាជធានីភ្នំពេញ។

រដ្ឋមន្ត្រី ហួត ហាក់ បានថ្លែងអំណរគុណ និងវាយតម្លៃខ្ពស់ចំពោះរាជរដ្ឋាភិបាល និងប្រជាជនបែលហ្សិក ដែលបានបន្តពង្រឹងទំនាក់ទំនងមិត្តភាព និងកិច្ចសហប្រតិបត្តិការជាមួយកម្ពុជា។ លោកក៏បានជម្រាបជូនអំពីស្ថានភាពនយោបាយ សេដ្ឋកិច្ច សង្គម និងវិស័យទេសចរណ៍របស់កម្ពុជា ដោយបញ្ជាក់ថា កម្ពុជានៅតែជាគោលដៅទេសចរណ៍ប្រកបដោយសន្តិភាព សុវត្ថិភាព និងបដិសណ្ឋារកិច្ចកក់ក្តៅសម្រាប់ភ្ញៀវទេសចរអន្តរជាតិ។
ជាមួយគ្នានេះ លោករដ្ឋមន្ត្រីបានលើកឡើងពីយុទ្ធនាការ «Cambodia: Kingdom of Wonder, Feel the Warmth» និង «ទស្សនាកម្ពុជា នារដូវបៃតង» ដែលកំពុងជំរុញការទាក់ទាញភ្ញៀវទេសចរអន្តរជាតិមកកម្ពុជាកាន់តែច្រើន។

ទន្ទឹមនឹងនេះ លោករដ្ឋមន្ត្រីក៏បានជម្រាបជូនលោកឯកអគ្គរាជទូត អំពីចំនួនភ្ញៀវទេសចរបែលហ្សិកដែលបានមកទស្សនាកម្ពុជា និងវិនិយោគិនបែលហ្សិកក្នុងវិស័យបដិសណ្ឋារកិច្ច ដែលមានចំនួនគួរឱ្យកត់សម្គាល់។ កត្តាទាំងនេះបានរួមចំណែកពង្រឹង និងពង្រីកកិច្ចសហប្រតិបត្តិការទេសចរណ៍រវាងប្រទេសទាំងពីរ ជាពិសេសលើការពិនិត្យលទ្ធភាពចុះអនុស្សរណៈយោគយល់ (MoU) ស្តីពីកិច្ចសហប្រតិបត្តិការទេសចរណ៍ ការរៀបចំដំណើរទស្សនកិច្ចសិក្សា (FAM Trip) សម្រាប់ក្រុមហ៊ុនទេសចរណ៍ អ្នកសារព័ត៌មាន និងអ្នកបង្កើតមាតិកា ការរៀបចំវេទិកាវិនិយោគទេសចរណ៍កម្ពុជា–បែលហ្សិក និងការជំរុញកិច្ចសហការរវាងធុរកិច្ចនៃប្រទេសទាំងពីរ (B2B) ដើម្បីទាក់ទាញការវិនិយោគ និងបង្កើនលំហូរភ្ញៀវទេសចររវាងប្រទេសទាំងពីរ។

ជាកិច្ចឆ្លើយតប លោកឯកអគ្គរាជទូតបានគូសបញ្ជាក់ដូចគ្នា អំពីកិច្ចសហប្រតិបត្តិការទ្វេភាគីដ៏ល្អរវាងកម្ពុជា និងបែលហ្សិក លើវិស័យជាច្រើន រួមទាំងការវិនិយោគរបស់ពលរដ្ឋបែលហ្សិក និងវត្តមានប្រជាជនបែលហ្សិកនៅកម្ពុជា។

ក្នុងឱកាសដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលហ្រ្វង់កូហ្វូនីលើកទី២០ នាខែវិច្ឆិកាខាងមុខ ឯកអគ្គរាជទូតក៏បានបញ្ជាក់ថា រាជរដ្ឋាភិបាលបែលហ្សិក នឹងបញ្ជូនប្រតិភូជាន់ខ្ពស់មកចូលរួមកិច្ចប្រជុំ និងចូលរួមព្រឹត្តិការណ៍អម «Village Francophonie» ដែលក្រសួងទេសចរណ៍ទទួលបន្ទុករៀបចំ។

គួរបញ្ជាក់ថា ព្រះរាជាណាចក្រកម្ពុជា និងព្រះរាជាណាចក្របែលហ្សិក បានបង្កើតទំនាក់ទំនងការទូតតាំងពីឆ្នាំ១៩៥៥ និងបានភ្ជាប់ទំនាក់ទំនងឡើងវិញនៅឆ្នាំ១៩៩២។ គិតមកដល់បច្ចុប្បន្ន ប្រទេសទាំងពីរមានទំនាក់ទំនងការទូតជាង៣៤ឆ្នាំ ដែលបន្តរីកចម្រើនលើវិស័យជាច្រើន រួមទាំងវិស័យទេសចរណ៍ផងដែរ៕