(ភ្នំពេញ)៖ បណ្តាញព័ត៌មាន Fresh News ដែលជាស្ថាប័នព័ត៌មានឈានមុខមួយនៅកម្ពុជា នៅព្រឹកថ្ងៃទី៤ ខែសីហា ឆ្នាំ២០២៦នេះ បានទទួលពានរង្វាន់ពីនិយ័តករបរធនបាលកិច្ច ក្នុងនាមជា «អង្គភាពសារព័ត៌មានឆ្នើម» ប្រចាំឆ្នាំ២០២៥ ក្នុងការផ្សព្វផ្សាយព័ត៌មានបរធនបាលកិច្ច ទៅដល់សាធារណជន ដើម្បីរួមចំណែកជាមួយរាជរដ្ឋាភិបាល ជំរុញការយល់ដឹងពី វិស័យបរធនបាលកិច្ចនៅកម្ពុជា។

ពានរង្វាន់នេះប្រព្រឹត្តទៅក្នុង «វេទិកាបរធនបាលកិច្ច ឆ្នាំ២០២៦» ក្រោមមូលបទ «បរធនបាលកិច្ច ក្នុងជវភាពនៃប្រព័ន្ធតួអង្គតែមួយ និងសមិទ្ធផលក្នុងរយៈពេល ៥ឆ្នាំ» ដែលបានប្រព្រឹត្តទៅនៅសណ្ឋាគារសុខា ភ្នំពេញ។ វេទិកានេះ រៀបចំឡើងក្រោមអធិបតីភាព ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ។

គិតចាប់តាំងពីការបង្កើតនិយ័តករបរធនបាលកិច្ច នៅអំឡុងឆមាសទី២ ឆ្នាំ២០២១ រហូតមកទល់ពេលបច្ចុប្បន្ន បណ្តាញព័ត៌មាន Fresh News បាន និងកំពុងចូលរួមយ៉ាងសកម្ម ក្នុងការផ្សព្វផ្សាយនូវព័ត៌មានយ៉ាងច្រើន ជាប្រចាំអំពីវិស័យបរធនបាលកិច្ច ដើម្បីបញ្ជ្រាបចំណេះដឹងដល់សាធារណជន ហើយនេះជាឆ្នាំទី៤ហើយ ដែលអង្គភាពព័ត៌មាន Fresh News ទទួលបានពានរង្វាន់ជា «អង្គភាពសារព័ត៌មានឆ្នើម» ពីនិយ័តករបរធនបាលកិច្ច៕