អង្គការសង្គមស៊ីវិលក្នុងរាជធានីភ្នំពេញ ប្តេជ្ញាបន្តចូលរួមជាមួយរាជរដ្ឋាភិបាលក្នុងការលើកកម្ពស់ការអភិវឌ្ឍសេដ្ឋកិច្ច សង្គម និងជំរុញបរិវត្តកម្មឌីជីថលឱ្យកាន់តែទូលំទូលាយក្នុងសហគមន៍
04-08-2026 14:38
(ភ្នំពេញ)៖ នៅព្រឹកថ្ងៃទី៤ ខែសីហា ឆ្នាំ២០២៦ នៅរាជបណ្ឌិត្យសភាកម្ពុជា វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី បានសហការជាមួយរដ្ឋបាលរាជធានីភ្នំពេញ រៀបចំវេទិកាសន្ទនា ក្រោមប្រធានបទស្ដីពី «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» ដែលបានប្រព្រឹត្តទៅក្រោមអធិបតីភាពលោក ប៉ៃ សំបូរ អគ្គលេខាធិការ នៃអគ្គលេខាធិការដ្ឋាន វ.ស.ស. តំណាងលោក កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមប្រឹក្សាភិបាល វ.ស.ស. និងលោក សុខ ពេញវុធ អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ។
ថ្លែងក្នុងអង្គវេទិកាសន្ទនាដែលមានការអញ្ជើញចូលរួមពីតំណាងអង្គការសង្គមស៊ីវិលក្នុងរាជធានីភ្នំពេញ និងអាជ្ញាធរមូលដ្ឋានជាច្រើននាក់ លោក ប៉ៃ សំបូរ បានជម្រាបជូនអង្គវេទិកាអំពីការយកចិត្តទុកដាក់ខ្ពស់របស់រាជរដ្ឋាភិបាលចំពោះអង្គការសង្គមស៊ីវិល ដែលជាដៃគូមិនអាចខ្វះបានសម្រាប់ការអភិវឌ្ឍសង្គមជាតិ និងការលើកកម្ពស់សុខុមាលភាពរបស់ប្រជាពលរដ្ឋនៅថ្នាក់មូលដ្ឋាន។
លោកបានលើកទឹកចិត្តឱ្យអង្គការសង្គមស៊ីវិលបន្តអនុវត្តបេសកកម្មរបស់ខ្លួនដោយស្មោះត្រង់ និងគោរពតាមច្បាប់ជាធរមាន ដើម្បីចូលរួមអភិវឌ្ឍប្រទេសជាតិ ដោយផ្តោតលើអាទិភាព «មនុស្ស ផ្លូវ ទឹក ភ្លើង និងបច្ចេកវិទ្យា» ស្របតាមគោលនយោបាយនិងយុទ្ធសាស្រ្តអភិវឌ្ឍន៍ជាតិ ក្រោមការដឹកនាំប្រកបដោយគតិបណ្ឌិត និងភាពប៉ិនប្រសប់របស់សម្តេចធិបតី ហ៊ុន ម៉ាណែត។
ក្នុងឱកាសនោះ លោក សុខ ពេញវុធ បានគូសបញ្ជាក់អំពីសារៈសំខាន់និងភាពចាំបាច់នៃការរៀបចំវេទិកាសន្ទនានាពេលនេះ ដែលមិនត្រឹមតែអាចជួយសម្រាលបញ្ហាលំបាកដែលនៅសេសសល់ក្នុងមូលដ្ឋានប៉ុណ្ណោះទេ ប៉ុន្តែថែមទាំងបានផ្តល់ឱកាសដល់រដ្ឋបាលរាជធានីភ្នំពេញ ជាពិសេសអាជ្ញាធរមូលដ្ឋាន និងអង្គការសង្គមស៊ីវិល ទទួលបាននូវអនុសាសន៍ល្អៗ បន្ថែមពីស្ថាប័ន មន្ទីរ អង្គភាព និងផ្នែកពាក់ព័ន្ធលើការងារអភិវឌ្ឍន៍មូលដ្ឋាននិងការផ្តល់សេវាសាធារណៈជូនប្រជាពលរដ្ឋ និងការពង្រឹងនិងពង្រីកកិច្ចសហប្រតិបត្តិការរវាងអាជ្ញាធរមូលដ្ឋាននិងអង្គការសង្គមស៊ីវិល ព្រមទាំងលើកកម្ពស់សុខដុមនីយកម្មសង្គមស៊ីវិល។
លោកបានបន្ថែមថា បន្ថែមលើវេទិកាសន្ទនាដែលរៀបចំដោយ វ.ស.ស. រដ្ឋបាលរាជធានីភ្នំពេញបានរៀបចំនិងចូលរួមវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានានៅក្នុងរាជធានីភ្នំពេញ ចំនួន ៨លើក គិតត្រឹមខែកក្កដា ឆ្នាំ២០២៦ ហើយវេទិកាជួបជុំនេះគឺជាការចូលរួមលើកកម្ពស់ប្រសិទ្ធភាពការងារ និងបង្កើនកិច្ចសហការជិតស្និទ្ធរវាងអាជ្ញាធរមូលដ្ឋានជាមួយអង្គការសង្គមស៊ីវិលក្នុងមូលដ្ឋាន ដើម្បីបម្រើដល់ផលប្រយោជន៍របស់ប្រជាពលរដ្ឋ។
ឆ្លៀតក្នុងឱកាស នៃការចូលរួមក្នុងអង្គវេទិកានាព្រឹកនេះ តំណាងអង្គការសង្គមស៊ីវិលបានលើកឡើងនូវបញ្ហាប្រឈមនិងសំណូមពរមកជជែកពិភាក្សាដោយត្រង់ទៅត្រង់មកយ៉ាងផុសផុល។ បញ្ហាប្រឈមនិងសំណូមពរមួយចំនួន ត្រូវបានដោះស្រាយជាក់ស្តែងក្នុងកិច្ចពិភាក្សាដោយផ្ទាល់។ ដោយឡែក បញ្ហាដែលសេសសល់មួយចំនួនទៀត នឹងត្រូវយកទៅពិភាក្សាជាមួយអាជ្ញាធរនិងសមត្ថកិច្ចពាក់ព័ន្ធ ដើម្បីរួមគ្នាស្វែងរកដំណោះស្រាយ។
ជាមួយគ្នានេះដែរបណ្ឌិត ឌុច ឌីនីល ព្រឹទ្ធបុរសរងនៃវិទ្យាស្ថានបច្ចេកវិទ្យាឌីជីថលនៃបណ្ឌិត្យសភាបច្ចេកវិទ្យាឌីជីថលកម្ពុជា បានចូលរួមធ្វើបទបង្ហាញជូនអង្គវេទិកា ស្តីពី «ការយល់ដឹងអំពីអក្ខរកម្មឌីជីថល និងសុវត្ថិភាពតាមប្រព័ន្ធបច្ចេកវិទ្យាសម្រាប់អង្គការសង្គមស៊ីវិល» ដើម្បីផ្សព្វផ្សាយនិងលើកកម្ពស់បរិវត្តកម្មឌីជីថលនិងការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥៕
