(ភ្នំពេញ)៖ លោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា រួមជាមួយ លោកបណ្ឌិត ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានសហការរៀបចំពិធីជួបជុំនិស្សិតមុនចេញដំណើរ និងការជួបជុំអតីតនិស្សិត នៅសណ្ឋាគារ Novotel ភ្នំពេញ ដើម្បីជូនដំណើរនិស្សិតកម្ពុជា ២៣ រូប ដែលនឹងបន្តការសិក្សាថ្នាក់ឧត្តមសិក្សានៅទូទាំងទ្វីបអឺរ៉ុប។

ព្រឹត្តិការណ៍នេះ ក៏មានការចូលរួមពី លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងតំណាងក្រសួងរ៉ែ និងថាមពលផងដែរ ដើម្បីអបអរសាទរនិស្សិតដែលទទួលបានអាហារូបករណ៍បន្តថ្នាក់អនុបណ្ឌិត និងបរិញ្ញាបត្រឯកទេស ក្នុងវិស័យអភិវឌ្ឍន៍សំខាន់ៗ រួមមាន ការគ្រប់គ្រងធនធានទឹក ថាមពល បច្ចេកវិទ្យាឌីជីថល និងកម្មវិធីសិក្សាថ្នាក់អនុបណ្ឌិតរួមគ្នា។

បើតាមសេចក្តីប្រកាសព័ត៌មាន ដែលបណ្តាញព័ត៌មាន Fresh News ទទួលបាននៅថ្ងៃទី៤ ខែសីហា ឆ្នាំ២០២៦ ពិធីជួបជុំនេះបានប្រមូលផ្តុំអ្នកចូលរួមជាង ១៥០ នាក់ រួមទាំងអតីតនិស្សិត Erasmus+ ជាង ៨០ នាក់ តំណាងប្រទេសជាសមាជិកសហភាពអឺរ៉ុប និងថ្នាក់ដឹកនាំធុរកិច្ចអឺរ៉ុប ដើម្បីអបអរសាទរសមិទ្ធផលសិក្សា និងកសាងទំនាក់ទំនងអប់រំរយៈពេលវែងដ៏រឹងមាំរវាងកម្ពុជា និងអឺរ៉ុប។ តាមរយៈយុទ្ធសាស្ត្រ Global Gateway របស់សហភាពអឺរ៉ុប និស្សិតដែលទទួលបានអាហារូបករណ៍ឆ្នាំនេះ នឹងបន្តការសិក្សាក្នុងវិស័យកំណើនជាក់ស្តែង រួមមាន និស្សិត ៩ រូប ក្រោមកម្មវិធី Erasmus Mundus Joint Master Degrees និស្សិត ៥ រូប ក្នុងកម្មវិធី Global Gateway Scholarships for Water Professions និស្សិត ៧ រូប បន្តថ្នាក់ Energy Dual Degrees និងនិស្សិត ២ រូប ក្រោមកម្មវិធី European Institute of Innovation and Technology (EIT) Digital Scholarships។

ថ្លែងក្នុងពិធីនោះ លោក Igor Driesmans បានសង្កត់ធ្ងន់លើតម្លៃនៃការផ្លាស់ប្តូរការសិក្សាអន្តរជាតិថា៖ «ការវិនិយោគលើយុវជន និងការអប់រំ គឺចាំបាច់សម្រាប់ការអភិវឌ្ឍន៍រយៈពេលវែង។ អាហារូបករណ៍ទាំងនេះតំណាងឱ្យការប្តេជ្ញាចិត្តរបស់យើងក្នុងការពង្រឹងកម្លាំងពលកម្មជំនាញរបស់កម្ពុជា និងកសាងទំនាក់ទំនងយូរអង្វែងរវាងតំបន់របស់យើង។ មិនថាជាការសិក្សាផ្នែកវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា ថាមពល ឬវិទ្យាសាស្ត្របរិស្ថាននោះទេ និស្សិតដែលទទួលបានអាហារូបករណ៍ទាំងនេះ នឹងទទួលបានជំនាញចាំបាច់សម្រាប់ការរីកចម្រើនរបស់ប្រទេស ដែលនឹងបើកផ្លូវអាជីពដែលមានតម្លៃខ្ពស់ រួមទាំងឱកាសជាមួយក្រុមហ៊ុនអឺរ៉ុបដែលកំពុងប្រតិបត្តិការនៅកម្ពុជា។ យើងសូមជូនពរឱ្យពួកគេធ្វើដំណើរទៅអឺរ៉ុបដោយសុវត្ថិភាព ហើយទន្ទឹងរង់ចាំមើលពីផលប៉ះពាល់ដែលពួកគេនឹងបង្កើតនៅពេលពួកគេត្រឡប់មកវិញ»។

ក្រៅពីការអបអរសាទរនិស្សិតដែលនឹងចេញដំណើរ ពិធីល្ងាចនេះក៏បានសម្គាល់ការណែនាំជាផ្លូវការនូវក្រុមប្រឹក្សាដឹកនាំថ្មីសម្រាប់សមាគមអតីតនិស្សិត Erasmus Mundus ប្រចាំកម្ពុជា (EMA-Cam) ដែលបានគូសបញ្ជាក់ពីតួនាទីសកម្មរបស់អតីតនិស្សិតក្នុងការរក្សាទំនាក់ទំនងដ៏រឹងមាំ៕