(ភ្នំពេញ)៖ ក្រោមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ, លោក ហ៊ាង ថារ៉េត អធិការខណ្ឌឫស្សីកែវ បានដឹកនាំកម្លាំងសមត្ថកិច្ចសហការជាមួយរដ្ឋបាលខណ្ឌឫស្សីកែវ ចុះបង្ក្រាបជាប្រចាំករណីអ្នកប្រើប្រាស់គ្រឿងញៀននៅតំបន់មិនរៀបរយ ដោយឃាត់ខ្លួនជនសង្ស័យជាបន្តបន្ទាប់ចំនួន២០នាក់។

សមត្ថកិច្ចបានឲ្យដឹងថា ករណីបង្ក្រាបនេះធ្វើឡើងជាបន្តបន្ទាប់ រួមមាន៖ នៅថ្ងៃទី១១ ខែកក្កដា ឆ្នាំ២០២៦ លោក ជិន ប៊ុនធឿន ប្រធានគណៈបញ្ជាការឯកភាព និងលោក ហ៊ាង ថារ៉េត អធិការខណ្ឌឫស្សីកែវ រួមជាមួយកម្លាំងសង្កាត់ និងប៉ុស្តិ៍នគរបាលរដ្ឋបាលច្រាំងចំរេះ១ បានចុះបង្ក្រាបទីតាំងប្រមូលផ្ដុំប្រើប្រាស់គ្រឿងញៀននៅសំណង់មិនរៀបរយ ក្រោយខ្សាច់ទ្រុងទា ក្នុងនោះឃាត់ខ្លួនអ្នកប្រើប្រាស់បានចំនួន០៧នាក់។

នៅថ្ងៃទី១៨ ខែកក្កដា ឆ្នាំ២០២៦ គណៈបញ្ជាការឯកភាពខណ្ឌឫស្សីកែវ និងនាយរងការិយាល័យប្រឆាំងគ្រឿងញៀនរាជធានីភ្នំពេញ រួមជាមួយអធិការនគរបាលខណ្ឌឫស្សីកែវ ចៅសង្កាត់ច្រាំងចំរេះ១ នាយប៉ុស្តិ៍នគរបាលរដ្ឋបាលច្រាំងចំរេះ១ និងនាយការិយាល័យសង្គមកិច្ចខណ្ឌ បានចុះរដ្ឋបាលនៅក្រោយខ្សាច់ និងទ្រុងទា ក្រុម៥ ភូមិ៣ សង្កាត់ច្រាំងចំរេះ១។ ជាលទ្ធផល ឃាត់ខ្លួនអ្នកប្រើប្រាស់គ្រឿងញៀនបានចំនួន០៥នាក់។

នៅថ្ងៃទី៣០ ខែកក្កដា ឆ្នាំ២០២៦ គណៈបញ្ជាការឯកភាពសង្កាត់ និងប៉ុស្តិ៍ បានចុះរដ្ឋបាលនៅទីតាំងក្រោយខ្សាច់ និងទ្រុងទា ប្រមូលអ្នកប្រើប្រាស់បានចំនួន០៤នាក់ (ស្រីចំនួន០១នាក់)។ នៅថ្ងៃទី០៣ ខែសីហា ឆ្នាំ២០២៦ គណៈបញ្ជាការឯកភាពសង្កាត់ និងប៉ុស្តិ៍នគរបាលរដ្ឋបាល បានចុះរដ្ឋបាលនៅទីតាំងខាងលើ ប្រមូលអ្នកប្រើប្រាស់បានចំនួន០៤នាក់។

នៅថ្ងៃទី០៤ ខែសីហា ឆ្នាំ២០២៦ គណៈបញ្ជាការឯកភាពខណ្ឌឫស្សីកែវ អធិការនគរបាលខណ្ឌឫស្សីកែវ គណៈបញ្ជាការឯកភាពសង្កាត់ និងប៉ុស្តិ៍នគរបាលរដ្ឋបាលច្រាំងចំរេះ១ បានចុះកាប់ឆ្ការព្រៃ និងរុះរើសំណង់មិនរៀបរយលើដីសាធារណៈច្រាំងទន្លេរបស់រដ្ឋ។

ចំពោះទីតាំងខាងលើ គណៈបញ្ជាការឯកភាពបានចុះចំនួន០៤លើក ប្រមូលអ្នកប្រើប្រាស់គ្រឿងញៀនបានចំនួន២០នាក់ (ស្រី០១នាក់)។ ចំពោះអ្នកប្រើប្រាស់គ្រឿងញៀនខាងលើ ត្រូវបានប្រគល់ឲ្យសង្គមកិច្ចខណ្ឌឫស្សីកែវ ដើម្បីបន្តនីតិវិធី៕