(ក្រចេះ)៖ អាជ្ញាធរសង្កាត់ក្រចេះ បានដឹកនាំក្រុមការងារជំនាញ និងអាជ្ញាធរមូលដ្ឋាន ចុះពិនិត្យផ្ទាល់ដល់ការដ្ឋានសាងសង់ប្រព័ន្ធលូរំដោះទឹក ក្នុងសង្កាត់ក្រចេះ ក្រុងក្រចេះ កាលពីថ្ងៃទី០៤ ខែសីហា ឆ្នាំ២០២៦។ ដំណើរការចុះពិនិត្យនេះ គឺក្នុងគោលបំណងតាមដានគុណភាព និងវឌ្ឍនភាពនៃការសាងសង់ ដើម្បីធានាប្រសិទ្ធភាពការងារ និងកាត់បន្ថយផលប៉ះពាល់ផ្សេងៗជូនប្រជាពលរដ្ឋ។

ក្នុងឱកាសនោះ ក្រុមការងារសង្កាត់បានចុះពិនិត្យការដ្ឋានចំនួនពីរខ្សែ ក្នុងចំណោមប្រាំមួយខ្សែ ដែលមានប្រវែងសរុប ៦០៦ម៉ែត្រ នៃគម្រោងឆ្នាំ២០២៦។ ការដ្ឋានទាំងពីរខ្សែនេះ កំពុងដំណើរការសាងសង់ប្រព័ន្ធលូរំដោះទឹកនៅភូមិផ្សាវែង និងភូមិវត្ត ស្ថិតក្នុងសង្កាត់ក្រចេះ។

លោក ឈិន លាងយី សង្កាត់ក្រចេះ បានផ្តល់ការណែនាំ និងជំរុញដល់ក្រុមហ៊ុនទទួលការសាងសង់ ឱ្យពង្រឹងកិច្ចសហការ យកចិត្តទុកដាក់ និងបង្កើនភាពជិតស្និទ្ធជាប្រចាំជាមួយអាជ្ញាធរមូលដ្ឋាន និងផ្នែកពាក់ព័ន្ធ ដើម្បីដោះស្រាយបញ្ហាចំពោះមុខបានទាន់ពេលវេលា និងឆ្លើយតបតាមសំណូមពរចាំបាច់របស់បងប្អូនប្រជាពលរដ្ឋដែលរស់នៅជុំវិញតំបន់ការដ្ឋានឱ្យអស់លទ្ធភាព។

លោកសង្កាត់ក្រចេះ ក៏បានក្រើនរំលឹកដល់ក្រុមហ៊ុនឱ្យបន្តយកចិត្តទុកដាក់លើបទដ្ឋានបច្ចេកទេស ជួយបំពាក់សញ្ញាសុវត្ថិភាពនៅទីតាំងជីកលូ និងពន្លឿនការងារឱ្យបានឆាប់រហ័ស ដើម្បីកាត់បន្ថយការរំខានដល់ការធ្វើដំណើរ និងការរស់នៅរបស់ប្រជាពលរដ្ឋ។

ជាមួយគ្នានេះ លោកក៏បានស្នើសុំបងប្អូនប្រជាពលរដ្ឋដែលរស់នៅ និងធ្វើដំណើរឆ្លងកាត់តំបន់ការដ្ឋាន មេត្តាយោគយល់ និងអធ្យាស្រ័យចំពោះការរំខាន ឬផលប៉ះពាល់បណ្តោះអាសន្នមួយចំនួនក្នុងអំឡុងពេលសាងសង់ ហើយសូមចូលរួមសហការ និងផ្តល់ព័ត៌មានមកអាជ្ញាធរមូលដ្ឋាន ឬក្រុមការងារសាងសង់ ប្រសិនបើមានបញ្ហាប្រឈម ឬផលប៉ះពាល់ណាមួយកើតឡើង ដើម្បីរួមគ្នារកដំណោះស្រាយឱ្យបានល្អប្រសើរ។ អាជ្ញាធរសង្កាត់ក្រចេះ នៅតែបន្តតាមដានយ៉ាងយកចិត្តទុកដាក់លើរាល់គម្រោងហេដ្ឋារចនាសម្ព័ន្ធក្នុងមូលដ្ឋាន ដើម្បីធានាបាននូវផលប្រយោជន៍ និងសុខុមាលភាពរបស់ប្រជាពលរដ្ឋជាធំ៕