(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក សហការយ៉ាងជិតស្និទ្ធជាមួយក្រុមគ្រូពេទ្យជំនាញមកពីការិយាល័យស្រុកប្រតិបត្តិបារាយណ៍-សន្ទុក ព្រមទាំងប្រធានមណ្ឌលសុខភាពទាំង ៨ នៅក្នុងស្រុកតាំងគោក នាព្រឹកថ្ងៃទី៤ ខែសីហា ឆ្នាំ២០២៦នេះ បានចុះបេីកយុទ្ធនាការប្រយុទ្ធប្រឆាំង និងទប់ស្កាត់ការរាតត្បាតនៃជំងឺគ្រុនឈាម ដោយបានធ្វើការផ្សព្វផ្សាយអប់រំសុខភាព ដាក់ថ្នាំអាល់បេត (Abate) និងបាញ់ថ្នាំសម្លាប់មូសខ្លា នៅភូមិគោកត្របែក ឃុំស្រឡៅ ស្រុកតាំងគោក ខេត្តកំពង់ធំ។

យុទ្ធនាការនាព្រឹកនេះ ធ្វើឡើងក្នុងគោលបំណងការពារសុខភាព និងអាយុជីវិតរបស់ប្រជាពលរដ្ឋ ជាពិសេសកុមារតូចៗ ពីការឆ្លងជំងឺគ្រុនឈាម ដែលបង្កឡើងដោយសារមូសខ្លាញីខាំ។

នៅក្នុងឱកាសនោះ ក្រុមការងារបានធ្វើសកម្មភាពយ៉ាងសកម្មរួមមាន៖ ការអប់រំផ្សព្វផ្សាយណែនាំប្រជាពលរដ្ឋឱ្យយល់ដឹងពីវិធានការការពារខ្លួនពីជំងឺគ្រុនឈាម ដោយត្រូវគេងក្នុងមុងជានិច្ចទាំងថ្ងៃ និងយប់ ស្លៀកពាក់ខោអាវវែងៗ និងត្រូវរាយការណ៍ជាប្រញាប់មកកាន់មណ្ឌលសុខភាពដែលនៅជិតបំផុត ប្រសិនបើមានសមាជិកគ្រួសារមានអាការៈក្តៅខ្លួនខ្លាំង។

ការដាក់ថ្នាំអាល់បេត ៖ ចុះដាក់ថ្នាំអាល់បេតតាមពាងទឹក អាងទឹក និងប្រភពស្តុកទឹកប្រើប្រាស់ផ្សេងៗ ដើម្បីកម្ទេចដង្កូវទឹក ដែលជាប្រភពបង្កើតមូសខ្លា។ ការបាញ់ថ្នាំសម្លាប់មូស៖ ធ្វើការបាញ់ថ្នាំសម្លាប់មូសនៅតាមបរិវេណផ្ទះសម្បែង និងទីតាំងស៊ុបទ្រុបជុំវិញភូមិកូនទោះបែក ដើម្បីកាត់បន្ថយជម្រក និងបរិមាណមូសខ្លាដែលហោះហើរ។

បន្ថែមពីនេះ អាជ្ញាធរស្រុក និងក្រុមគ្រូពេទ្យ បានអំពាវនាវយ៉ាងទទូចដល់ប្រជាពលរដ្ឋទាំងអស់នៅក្នុងភូមិគោកត្របែកក៏ដូចជាប្រជាពលរដ្ឋក្នុងឃុំស្រឡៅទាំងមូល ឱ្យចូលរួមធ្វើអនាម័យជុំវិញខ្នងផ្ទះ រៀបចំផ្ទះសម្បែងឱ្យមានពន្លឺចេញចូលគ្រប់គ្រាន់ កាប់ឆ្ការព្រៃ និងប្រមូលបំផ្លាញចោលនូវសម្ភារ:ដក់ទឹកចាស់ៗដូចជា សំបកកង់ឡាន កង់ម៉ូតូ សំបកដប កំប៉ុង និងត្រឡោកដូងជាដើម ដើម្បីលុបបំបាត់ជម្រកមូសខ្លាឱ្យអស់ពីក្នុងសហគមន៍៕