(កំពត)៖ បន្ទាប់ពីរកឃើញមានករណីបំពានច្បាប់ របស់ក្រុមហ៊ុន ASIA EUROPE METAL KH CO., LTD. ស្ថិតនៅភូមិភូមិមនោណុប ឃុំជំពូវន្ត ស្រុកជុំគិរី ខេត្តកំពត ដែលបានដំណើរការ ដោយគ្មានរបាយការណ៍ វាយតម្លៃហេតុប៉ះពាល់បរិស្ថាន និងគ្មានលិខិតអនុញ្ញាតបញ្ចេញសំណល់ ក្រសួងបរិស្ថាន បានចាត់វិធានការច្បាប់ចំពោះក្រុមហ៊ុន ត្រូវផ្អាកដំណើរការផលិកម្មជាបន្ទាន់ទោះរូបភាពណាក៏ដោយ។

នៅថ្ងៃទី៤ ខែសីហា ឆ្នាំ២០២៦ ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថានដឹកនាំដោយលោក ឡៅ គឹមឈី អនុប្រធាននាយកដ្ឋាន ដោយមានការចូលរួម ពីមន្ទីរបរិស្ថានខេត្តកំពត បានធ្វើការចុះត្រួតពិនិត្យក្រុមហ៊ុន ASIA EUROPE METAL KH CO., LTD. ដែលជាប្រភេទរោងចក្រកែច្នៃលោហធាតុ នៅទីតាំងខាងលើ និងបានរកឃើញ ក្រុមហ៊ុនមិនបានអនុវត្តច្បាប់ជាធរមាននៅកម្ពុជា ដោយគ្មានលិខិតអនុញ្ញាតបញ្ចេញសំណល់ និងការរៀបចំរបាយការណ៍វាយតម្លៃហេតុប៉ះពាល់បរិស្ថាន (EIA) ស្របតាមក្រមបរិស្ថាន និងធនធានធម្មជាតិ។

សូមបញ្ជាក់ថា រោងចក្រខាងលើជាប្រភេទរោងចក្រកែច្នៃលោហៈ ក្នុងនោះមានការទាញយកសារធាតុ អង់ទីម៉ូនី (Antimony)ដែលជាសារធាតុរ៉ែដ៏សំខាន់មួយ ដែលប្រើក្នុងអាគុយ គ្រឿងអេឡិចត្រូនិច សម្ភារៈធន់នឹងចរន្តអគ្គិសនី និងបច្ចេកវិទ្យាទំនើបៗជាច្រើន។ ដោយសារតម្រូវការសារធាតុរ៉ែដ៏សំខាន់នេះកើនឡើង ការទទួលខុសត្រូវរបស់រោងចក្រកេច្នៃ មិនបានគិតគូរក្នុងការធានាការពារ ផលប៉ះពាល់ដល់បរិស្ថាន ឬសុខភាពសាធារណៈ ឱ្យបានត្រឹមត្រូវនៅឡើយ។

បើគ្មានការការពារបរិស្ថានត្រឹមត្រូវទេ ការកែច្នៃទាញយកសារធាតុ អង់ទីម៉ូនី អាចបញ្ចេញធូលី លោហធាតុធ្ងន់ និងទឹកសំណល់ដែលបំពុលខ្យល់ ទឹក និងដី។ សារធាតុបំពុលទាំងនេះ អាចបង្កគ្រោះថ្នាក់ដល់ការរស់នៅរបស់មនុស្ស សត្វ បំពុលប្រភពទឹក បំពុលដី កាត់បន្ថយផលិតភាពកសិកម្ម និងបង្កហានិភ័យសុខភាពសាធារណៈ។ លើសបីនេះការខូចខាតបរិស្ថាន អាចមានរយៈពេលជាច្រើនឆ្នាំ ប្រសិនបើការបំពុលមិនត្រូវបានគ្រប់គ្រងឱ្យបានត្រឹមត្រូវ។

បើតាមលោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានបញ្ជាក់ថា បន្ទាប់ពីផ្អាកដំណើរសកម្មភាពផលិតកម្មក្រុុមហ៊ុនត្រូវតែមករៀបចំបែបបទ និងធ្វើការសិក្សាវាយតម្លៃហេតុប៉ះពាល់បរិស្ថាន និងរៀបចំការទប់ស្កាត់ការបំពុលបបរិស្ថាន ឱ្យស្របតាមច្បាប់​ ទើបអនុញ្ញាតឱ្យបើកដំណើរការអាជីវកម្មឡើងវិញ។ យើងគាំទ្ររាល់ការវិនិយោគទាំងអស់ឱ្យតែស្របបនឹងច្បាប់​ ប៉ុន្តែ យើងមិនគាំទ្រការធ្វើអាជីវកម្មមិនគោរពច្បាប់នោះទេ ច្បាប់ និងបែបបទត្រូវតែគោរព និងធ្វើតាមហើយ ដើម្បីសុវត្ថិភាពបរិស្ថានយើងអស់គ្នា»៕