(ពោធិ៍សាត់)៖ ក្នុងព្រឹត្តិការណ៍ជាប្រវត្តិសាស្ត្រដ៏គួរឱ្យមានមោទនភាពក្រៃលែង សម្រាប់ព្រះរាជាណាចក្រកម្ពុជា ទឹកដីខេត្តពោធិ៍សាត់ បានត្រៀមខ្លួនរួចជាស្រេច ក្នុងការស្វាគមន៍វត្តមានកសិដ្ឋានចិញ្ចឹមគោយកទឹកដោះ ដែលមានទំហំធំ និងទំនើបជាងគេបំផុតក្នុងប្រទេស ដែលជាការសហការវិនិយោគអន្តរជាតិ ដ៏មានតម្លៃមហាសាល។

នាថ្ងៃពុធ ទី៥ ខែសីហា ឆ្នាំ២០២៦ ក្រុមហ៊ុន សូណាវីទ្យ (SONAVITH Co., Ltd.) របស់កម្ពុជា បានចាប់ដៃគូសហការគ្នាយ៉ាងរឹងមាំ ជាមួយក្រុមហ៊ុនយក្សផលិតទឹកដោះគោម៉ាឡេស៊ី Farm Fresh Berhad (Farm Fresh Malaysia) និងក្រុមហ៊ុន Alpha Group ដើម្បីបង្កើតគម្រោងវិនិយោគខ្នាតយក្ស ក្រោមឈ្មោះ "FARM FRESH PURSAT" ស្ថិតក្នុងស្រុកវាលវែង ខេត្តពោធិ៍សាត់ លើផ្ទៃដីទំហំរហូតដល់១ពាន់ហិកតា ជាមួយនឹងទុនវិនិយោគសរុបចំនួន៦៨លានដុល្លារអាមេរិក។

លោក ខូយ រីដា អភិបាលខេត្តពោធិ៍សាត់ បានមានប្រសាសន៍ក្នុងឱកាសនោះថា៖ តាមរយៈការវិនិយោគដ៏ធំនេះ ខេត្តពោធិ៍សាត់នឹងមានកសិដ្ឋានចិញ្ចឹមគោយកទឹកដោះដ៏ធំបំផុតនៅកម្ពុជា ដែលនឹងបង្កើតឱកាសការងារជាច្រើនសម្រាប់ប្រជាពលរដ្ឋ និងជាប្រវត្តិសាស្ត្រថ្មីរបស់ខេត្ត ក៏ដូចជាសម្រាប់ប្រទេសកម្ពុជាទាំងមូល។

លោកស្រី សុខ ចាន់សូណា ប្រធានក្រុមប្រឹក្សាភិបាលក្រុមហ៊ុន SONAVITH Co., Ltd. បានថ្លែងបញ្ជាក់ថា ភាពជោគជ័យក្នុងការទាក់ទាញទុនវិនិយោគនេះ គឺកើតចេញពីការខិតខំប្រឹងប្រែងលើកទឹកចិត្ត និងការសម្របសម្រួលយ៉ាងយកចិត្តទុកដាក់ពីប្រមុខរាជរដ្ឋាភិបាលកម្ពុជា ជាពិសេស លោក កែវ រតនៈ រដ្ឋមន្ត្រីក្រសួងរ៉ែ និងថាមពល ប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ និងលោក ខូយ រីដា អភិបាលនៃគណៈអភិបាលខេត្តពោធិ៍សាត់ ដែលបានបើកផ្លូវយ៉ាងទូលំទូលាយ ដល់វិស័យឯកជន។

លោក Loi Tuan Ee នាយកក្រុមហ៊ុន Farm Fresh Berhad Malaysia បានបង្ហាញក្តីរំភើប និងមោទនភាព ដោយលើកឡើងថា ក្នុងនាមជាក្រុមហ៊ុនផលិតទឹកដោះគោឈានមុខមួយ នៅតំបន់អាស៊ីអាគ្នេយ៍ ការបោះទុនវិនិយោគនៅក្នុងទឹកដីនៃខេត្តពោធិ៍សាត់នាពេលនេះ មិនត្រឹមតែពង្រីកសក្តានុពលអាជីវកម្មប៉ុណ្ណោះទេ ប៉ុន្តែថែមទាំងជួយភ្ជាប់ឈ្មោះរបស់ខេត្តពោធិ៍សាត់ និងកម្ពុជា ឱ្យលេចត្រដែតនៅលើឆាកតំបន់អាស៊ីអាគ្នេយ៍ និងពិភពលោកផងដែរ។

គម្រោង FARM FRESH PURSAT ត្រូវបានរំពឹងទុកយ៉ាងមុតមាំថា នឹងក្លាយជាកម្លាំងចលករដ៏មានឥទ្ធិពល ក្នុងការជំរុញកំណើនសេដ្ឋកិច្ចមូលដ្ឋាន បង្កើតការងារជំនាញកម្រិតខ្ពស់ និងលើកកម្ពស់វិស័យកសិឧស្សាហកម្មរបស់ប្រទេសកម្ពុជាឱ្យ ឈានដល់កម្រិតស្តង់ដារថ្មីមួយទៀត។

គួរជម្រាបជូនថា គម្រោងវិនិយោគជាប្រវត្តិសាស្ត្រនេះ មានទំហំទឹកប្រាក់វិនិយោគ ចំនួន៦៨លានដុល្លារអាមេរិក លើផ្ទៃដីអនុវត្តគម្រោង ១,០០០ហិកតា ស្ថិតក្នុងស្រុកវាលវែង ខេត្តពោធិ៍សាត់។ ការវិនិយោគនេះ ជាកិច្ចសហការគ្នារវាងក្រុមហ៊ុន SONAVITH Co., Ltd. (កម្ពុជា), Farm Fresh Berhad (ម៉ាឡេស៊ី) និងAlpha Group។ គោលដៅនៃគម្រោង គឺដើម្បីអភិវឌ្ឍកសិដ្ឋានចិញ្ចឹមគោយកទឹកដោះកម្រិតស្តង់ដារអន្តរជាតិ និងសាងសង់រោងចក្រកែច្នៃទឹកដោះគោក្នុងស្រុក៕