(ភ្នំពេញ)៖ អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចដកតំណែង និងបន្ថយស័ក្តិមន្ត្រីនគរបាលប៉ុស្តិ៍ច្រកទ្វារព្រំដែនអន្តរជាតិត្រពាំងក្រៀលជាប់ព្រំដែនប្រទេសឡាវ ក្នុងខេត្តស្ទឹងត្រែង ចំនួន ៦រូប ដោយសារតែបានប្រព្រឹត្តល្មើសវិន័យនគរបាលជាតិ។

តាមសេចក្តីសម្រេចរបស់លោកអភិសន្តិបណ្ឌិត ស សុខា មន្ត្រីនគរបាលទាំង ៦រូប ដែលត្រូវបានចាត់វិធានការវិន័យនេះ រួមមាន៖ វរសេនីយ៍ឯក អ៊ូច មាន នាយប៉ុស្តិ៍, វរសេនីយ៍ឯក ទិត បូរិន នាយរងប៉ុស្តិ៍ និងអនុសេនីយ៍ទោ មាន វឌ្ឍនា មន្ត្រី ត្រូវបានដកចេញពីតំណែង។

ចំណែកឯវរសេនីយ៍ទោ នូ លិតស៉ីផាន់ណា នាយរងប៉ុស្តិ៍ ត្រូវបានបន្ថយស័ក្តិមកនៅត្រឹមថ្នាក់វរសេនីយ៍ត្រី, អនុសេនីយ៍ឯក ម៉េត ស៉ីម៉ាក់ នាយផ្នែកត្រួតពិនិត្យចល័ត និងអនុសេនីយ៍ឯក ឈុន សេងហ៊ួ នាយផ្នែកបែបបទ ត្រូវបានបន្ថយស័ក្តិមកនៅត្រឹមថ្នាក់អនុសេនីយ៍ទោ។

ការដាក់វិន័យទៅលើមន្ត្រីនគរបាលទាំងនេះ គឺជាការបង្ហាញពីការប្តេជ្ញាចិត្តយ៉ាងមុតមាំរបស់ក្រសួងមហាផ្ទៃ ក្នុងការរក្សាបាននូវភាពស្អាតស្អំ សុចរិតភាព និងប្រសិទ្ធភាពការងាររបស់កងកម្លាំងនគរបាលជាតិ។
វិធានការនេះក៏ជាសារមួយសម្រាប់មន្ត្រីនគរបាលទាំងអស់ ឱ្យបន្តបំពេញភារកិច្ចដោយស្មារតីទទួលខុសត្រូវខ្ពស់ និងគោរពបានយ៉ាងម៉ឺងម៉ាត់នូវវិន័យរបស់កងកម្លាំងប្រដាប់អាវុធ ដើម្បីបម្រើប្រជាពលរដ្ឋ និងការពារសន្តិសុខសណ្តាប់ធ្នាប់សង្គមប្រកបដោយប្រសិទ្ធភាព៕